سوال: اس کی تصدیق فرمادیں: "حضرت جابر رضی اللہ عنہ فرماتے ہیں: میں بدھ کے دن ظہر سے عصر کے درمیان دعا کرتا ہوں، میری دعا قبول ہو جاتی ہے"۔(مسند امام احمد، رقم الحدیث 14568)

جواب: سوال میں مذکور الفاظ مشہور صحابی حضرت جابر بن عبداللہ رضی اللّٰہ عنہما کے ہیں، جو انہوں نے ایک حدیث مرفوع کے آخر میں فرمائے ہیں، وہ حدیث مسند احمد میں مذکور ہے، ذیل میں اسے سند ومتن اور ترجمہ کے ساتھ درج کیا جاتا ہے:
حَدَّثَنَا أَبُو عَامِرٍ، حَدَّثَنَا كَثِيرٌ، يَعْنِي: ابْنَ زَيْدٍ، حَدَّثَنِي عَبْدُ اللهِ بْنُ عَبْدُ الرَّحْمَنِ بْنِ كَعْبِ بْنِ مَالِكٍ، حَدَّثَنِي جَابِرٌ، يَعْنِي: ابْنَ عَبْدِ اللهِ، أَنَّ النَّبِيَّ ﷺ دَعَا فِي مَسْجِدِ الْفَتْحِ ثَلَاثًا: يَوْمَ الاِثْنَيْنِ، وَيَوْمَ الثُّلَاثَاءِ، وَيَوْمَ الأَرْبِعَاءِ، فَاسْتُجِيبَ لَهُ يَوْمَ الأَرْبِعَاءِ بَيْنَ الصَّلاتَيْنِ، فَعُرِفَ الْبِشْرُ فِي وَجْهِهِ، قَالَ جَابِرٌ: فَلَمْ يَنْزِلْ بِي أَمْرٌ مُهِمٌّ غَلِيظٌ، إِلَّا تَوَخَّيْتُ تِلْكَ السَّاعَةَ، فَأَدْعُو فِيهَا فَأَعْرِفُ الإِجَابَةَ.
(مسند احمد: ٢٢/ ٤٢٥ (١٤٥٦٣)، وأورده الهيثمي في «المجمع» ٣/ ٦٨٤ (٥٩٠١) كتاب الحج/ باب في مسجد الفتح، وقال: رواه أحمد، والبزار، ورجال أحمد ثقات.
ترجمہ:
حضرت جابر بن عبداللہ رضی اللّٰہ عنہما سے مروی ہے کہ رسول اکرم صلی اللّٰہ علیہ وسلم نے مسجد الفتح میں تین دن (پیر، منگل اور بدھ) تک دعا مانگی، بالآخر بدھ کے روز دو نمازوں ( ظہر اور عصر) کے درمیان آپ کی دعا قبول ہو گئی، دعا کی قبولیت پر آپ کے چہرہ انور پر خوشی کے آثار دیکھے گئے۔
حضرت جابر رضی اللّٰہ عنہما کہتے ہیں: جب بھی مجھے کوئی اہم معاملہ درپیش ہوتا، تو میں اسی گھڑی کا انتظار کرتا (بدھ کے دن ظہر اور عصر کی درمیانی گھڑی) اور اس وقت میں دعا مانگتا تھا، تو میری دعا قبول ہو جاتی تھی۔
حدیث کا حکم
علامہ ہیثمی رحمہ اللّٰہ نے اپنی کتاب "مجمع الزوائد" میں اس حدیث کے تمام راویوں کو ثقہ قرار دیا ہے، لہذا مذکورہ بالا حدیث صحیح ہے۔