عنوان: مطلقہ کا موبائل فون پر کسی مرد کو اپنے ساتھ نکاح کرنے کی اجازت دینے سے نکاح کا حکم

سوال: السلام علیکم ورحمۃ اللہ وبرکاتہ! مجھے ایک مسئلہ پوچھنا ہے، میں ایک مطلقہ خاتون ہوں اور میری ایک بیٹی بھی ہے۔ میں ایک ایسے شخص سے محبت کرتی ہوں جو پہلے سے شادی شدہ ہے اور اس کے بچے بھی ہیں، فون اور سوشل میڈیا پر ہماری کافی گفتگو ہوئی اور ہم دونوں نے ایک دوسرے کو نکاح کے لیے پسند بھی کرلیا ہے، لیکن میرے گھر والے میری اس پسند پر راضی نہیں ہیں۔
اب مجھے اس شخص سے بہت زیادہ محبت ہوگئی ہے، لہٰذا میں اسی سے نکاح کرنا چاہتی ہوں۔ اس شخص نے مجھے کہا کہ آپ مجھے اپنے ساتھ نکاح کرنے کی اجازت دے دیں، میں دو گواہوں کے سامنے آپ سے نکاح کرلوں گا، یعنی آپ کو قبول کرلوں گا۔ اس طرح آپ شرعی طور پر میری بیوی بن جائیں گی اور پھر ہماری گفتگو اور ملاقات بھی حرام نہیں ہوگی، چنانچہ میں نے اسے اس طرح نکاح کرنے کی اجازت دے دی۔
اب مسئلہ یہ پوچھنا ہے کہ کیا اس طریقے سے نکاح ہوسکتا ہے؟ اگر ہوسکتا ہے تو اس نکاح کا کیا حکم ہے؟ کیا میں شرعی طور پر اس کی بیوی بن گئی ہوں؟ اور کیا اب ہماری گفتگو یا ملاقات ہمارے لیے حلال ہے؟ نیز یہ بھی بتادیں کہ جب میں نے اسے فون پر نکاح کی اجازت دی تھی تو کیا اس طرح نکاح منعقد ہوسکتا ہے؟
اس شخص کا کہنا ہے کہ میں نے علماءِ کرام سے سنا ہے کہ جو عورت مطلقہ یا بیوہ ہو، اسے اپنے والدین کی اجازت کی ضرورت نہیں ہوتی۔ اگر وہ خود نکاح کرنا چاہے تو وہ اپنی مرضی سے بغیر کسی کی اجازت کے نکاح کرسکتی ہے۔ اسی لیے اس نے مجھ سے کہا کہ آپ مجھے نکاح کی اجازت دے دیں کہ میں آپ سے نکاح کرلوں یا آپ مجھ سے نکاح کرلیں تو میں دو گواہوں کے سامنے آپ کو قبول کرلوں گا، لہٰذا میں پوچھنا چاہتی ہوں کہ کیا ہمارا نکاح ہوگیا ہے یا نہیں؟ مہربانی فرما کر اس مسئلے کا شرعی حکم بیان فرمادیں۔ شکریہ

جواب: پوچھی گئی صورت میں اگر موبائل فون پر نکاح کی اجازت دینے کے بعد باقاعدہ گواہوں کی موجودگی میں نکاح نہیں کیا گیا ہو تو محض فون پر اجازت دینے سے نکاح نہیں ہوا ہے، لہٰذا آپ دونوں کے لیے ملاقات یا کسی بھی اعتبار سے تعلق قائم کرنا جائز نہیں ہوگا۔
البتہ اجازت دینے کے بعد اگر مذکورہ شخص نے آپ کی طرف سے وکیل بن کر دو گواہوں کے سامنے اپنے ساتھ باقاعدہ نکاح کرلیا ہو تو ایسی صورت میں نکاح منعقد ہوگیا ہے، بشرطیکہ جن گواہوں کی موجودگی میں نکاح کیا گیا ہو، وہ آپ کی شناخت اور تعارف سے اچھی طرح واقف ہوں۔
تاہم گھر والوں کی رضامندی کے بغیر ایسا اقدام اٹھانا مناسب نہیں ہے، لہٰذا گھر والوں کی رضامندی اور اعتماد حاصل کرتے ہوئے اس رشتے کے سلسلے میں آگے بڑھنا چاہیے۔
واضح رہے کہ نکاح میں گواہوں کے لیے نکاح میں دی جانے والی عورت کو بخوبی پہچاننا ضروری ہے، تاکہ کسی قسم کا کوئی اشتباہ باقی نہ رہے۔ اگر گواہ اس عورت کو اچھی طرح جانتے ہوں تو نکاح کے وقت اس کا نام اور اس کے والد کا نام ذکر کرنا کافی ہوتا ہے، لیکن اگر گواہ اسے نہ جانتے ہوں تو پہچان کرانے کے لیے اس عورت کا نام، اس کے والد کا نام، اس کے دادا کا نام اور اس کے متعلق دیگر ضروری معلومات ذکر کرنا بھی ضروری ہے، تاکہ اس کی اچھی طرح پہچان ہوسکے؛ کیونکہ نکاح میں گواہی قائم کرنے کا مقصد ہی یہی ہے کہ لوگوں کو یہ معلوم ہوجائے کہ فلاں عورت فلاں مرد کے نکاح میں آگئی ہے۔