عنوان: محض دستخط سے نکاح، طلاق اور تجدیدِ نکاح کا شرعی حکم

سوال: السلام علیکم ورحمۃ اللہ وبرکاتہ!میں درج ذیل صورتِ حال کے بارے میں فقہِ حنفی کے مطابق تفصیلی شرعی حکم معلوم کرنا چاہتا ہوں۔
چند روز قبل ایک بالغ مرد اور ایک بالغ عورت اپنے گھر والوں کو اطلاع دیے بغیر خفیہ طور پر عدالت گئے، وہاں 2، 3 بالغ مسلمان گواہوں کی موجودگی میں انہوں نے نکاح نامہ (کابین نامہ) اور عدالتی حلف نامے پر دستخط کیے۔ تاہم نہ مرد نے زبانی طور پر ایجاب کیا اور نہ عورت نے زبانی طور پر قبول کیا، نکاح کے ایجاب و قبول کے واضح الفاظ زبانی طور پر ادا نہیں کیے گئے، پورا معاملہ صرف گواہوں کی موجودگی میں دستاویزات پر دستخط کرنے تک محدود رہا، جس کے بعد وہ میاں بیوی کی حیثیت سے ساتھ رہنے لگے، بعد میں شدید ازدواجی اختلافات کی وجہ سے شوہر نے جھگڑے کے دوران زبانی طور پر تین مرتبہ سے زیادہ لفظ ’’طلاق‘‘ استعمال کیا۔
اب دونوں کو اپنے کیے پر ندامت ہے، ان کے گھر والوں کو بھی اس معاملے کا علم ہوگیا ہے اور وہ گھر پر شرعی طریقے سے گواہوں، مہر اور واضح زبانی ایجاب و قبول کے ساتھ نیا نکاح کروانا چاہتے ہیں، تاہم دونوں کو پہلے کہے گئے طلاق کے الفاظ کے بارے میں بہت تشویش ہے۔
1) کیا فقہِ حنفی کے مطابق ان کا پہلا نکاح سرے سے منعقد ہی نہیں ہوا تھا، کیونکہ زبانی ایجاب و قبول نہیں ہوا اور صرف گواہوں کی موجودگی میں دستاویزات پر دستخط کیے گئے تھے؟
2) اگر پہلا نکاح صحیح نہیں ہوا تھا تو بعد میں شوہر کی جانب سے زبانی طور پر کہے گئے طلاق کے الفاظ، اگرچہ تین سے زیادہ مرتبہ کہے گئے ہوں، کیا شرعاً مؤثر ہوں گے؟ کیا اس صورت میں کوئی طلاق واقع ہوئی یا آخری جدائی واقع ہوگئی؟
3) اگر پہلا نکاح صحیح نہیں ہوا تھا تو کیا اب دونوں بغیر حلالہ یا کسی اور شخص سے نکاح کیے، نیا مہر مقرر کرکے اور گواہوں کی موجودگی میں واضح زبانی ایجاب و قبول کے ساتھ آپس میں نیا نکاح کرسکتے ہیں؟

جواب: 1) پہلے نکاح کے عدمِ انعقاد کا حکم
پوچھی گئی صورت میں اگر نکاح کی مجلس میں دونوں فریقین موجود تھے، لیکن نکاح کے وقت صرف نکاح نامہ یا دیگر دستاویزات پر دستخط کیے گئے اور فریقین میں سے کسی نے زبانی ایجاب و قبول نہیں کیا، نہ کسی وکیل نے ان کی طرف سے زبانی ایجاب و قبول کیا اور نہ گواہوں کے سامنے کسی جانب سے ایسا زبانی اقرار ہوا جس سے شرعی ایجاب و قبول متحقق ہو تو محض دستخط کرنے سے شرعی نکاح منعقد نہیں ہوا، کیونکہ جو شخص بولنے پر قادر ہو، اس کے لیے حضوری مجلس میں محض کتابت عقدِ نکاح کے انعقاد کے لیے کافی نہیں، لہٰذا اگر واقعتاً یہی صورت تھی تو عورت اس شخص کی شرعی منکوحہ نہیں بنی، اس کے بعد دونوں نے اگر میاں بیوی سمجھ کر باہمی تعلق قائم کیا تو اس کا حکم وطی بالشبہہ کا ہوگا، کیونکہ دونوں نکاح کے انعقاد کا گمان رکھتے تھے۔
2)بعد میں کہے گئے طلاق کے الفاظ کا شرعی اثر
جب شرعی نکاح منعقد ہی نہیں ہوا تو بعد میں مرد کی جانب سے کہے گئے طلاق کے الفاظ بھی شرعاً واقع نہیں ہوں گے، کیونکہ طلاق کا محل وہ عورت ہے جو نکاح میں ہو، اور جب نکاح ہی قائم نہیں تھا تو طلاق کا محل بھی موجود نہ تھا، لہٰذا اگر نکاح کے عدمِ انعقاد کی صورت میں مرد نے ایک، دو یا تین مرتبہ طلاق کے الفاظ کہے ہوں تو ان سے کوئی طلاق واقع نہیں ہوئی، اور طلاقِ مغلظہ یا آخری جدائی کا بھی کوئی حکم نہیں ہوگا۔
3)تجدیدِ نکاح، دوسرے شخص سے نکاح اور عدت کا مسئلہ
اگر نکاح کے عدمِ انعقاد کے باوجود دونوں کے درمیان مباشرت ہوچکی ہو تو وطی بالشبہہ کی وجہ سے تفریق کے بعد عورت پر عدت لازم ہوگی۔ عدت کا آغاز باہمی ترکِ تعلق یا شرعی تفریق کے بعد ہوگا، اگر عورت کو حیض آتا ہو تو تین حیض عدت ہوگی، اور اگر حاملہ ہو تو وضعِ حمل تک عدت رہے گی۔ محض خلوت کی صورت میں وطی بالشبہہ کی عدت کا حکم نہیں ہوگا، بلکہ مباشرت کا تحقق ضروری ہے۔
عدت مکمل ہونے کے بعد اگر دونوں دوبارہ ازدواجی زندگی اختیار کرنا چاہیں تو باہمی رضامندی سے نئے مہر کے ساتھ شرعی گواہوں کی موجودگی میں زبانی ایجاب و قبول کے ذریعے نیا نکاح کرسکتے ہیں، چونکہ سابقہ نکاح منعقد ہی نہیں ہوا اور اس کے بعد کہی گئی طلاقیں بھی واقع نہیں ہوئیں، اس لیے سابقہ شوہر سے نکاح کرنے کے لیے کسی دوسرے شخص سے نکاح کرنے کی کوئی ضرورت نہیں۔
تنبیہ: اس پورے حکم کا دار و مدار اس بات پر ہے کہ پہلے نکاح کی مجلس میں واقعی کوئی زبانی ایجاب و قبول نہیں ہوا تھا۔ اگر نکاح خواں، قاضی، وکیل یا کسی دوسرے شخص نے ایجاب یا قبول کے شرعی الفاظ ادا کیے تھے اور فریقین نے ان الفاظ کو قبول کیا تھا تو حکم مختلف ہوسکتا ہے، اس لیے ایسی صورت میں نکاح کے وقت پیش آنے والے واقعہ اور ادا کیے گئے الفاظ کی مکمل تحقیق ضروری ہوگی ۔