عنوان: رجوع کے بعد طلاقوں کے شمار اور ایک مجلس میں متعدد طلاقیں دینے کا حکم

سوال: ‎السلام علیکم ورحمۃ اللہ وبرکاتہ، مفتی صاحب! براہِ کرم میرے معاملے کا قرآن و سنت اور اہلِ حدیث موقف کے مطابق شرعی حکم بتا دیں۔
میرے شوہر نے پہلی مرتبہ مجھے صرف ایک طلاق دی، اس وقت میں پاک (طاہرہ) تھی، اس کے بعد میری عدت کے اندر میرے شوہر نے رجوع کر لیا اور ہم دوبارہ میاں بیوی کی طرح رہنے لگے۔ کچھ عرصے بعد میرے شوہر نے دوسری مرتبہ، جب میں دوبارہ پاک تھی، ایک ہی دن اور تقریباً ایک ہی وقت میں یہ الفاظ چھ مرتبہ کہے: "میں تمہیں طلاق دیتا ہوں، میں تمہیں طلاق دیتا ہوں..." یعنی انہوں نے "میں تمہیں طلاق دیتا ہوں" کے الفاظ چھ مرتبہ ایک ہی مجلس/موقع پر کہے، اس کے چار دن بعد مجھے حیض شروع ہوا، اس کے بعد میں نے اپنی عدت مکمل کی، عدت مکمل ہونے کے بعد تقریباً چار ماہ تک ہمارا نکاح نہیں ہوا، پھر تقریباً پانچ ماہ بعد میرے شوہر نے مجھ سے نیا نکاح کیا اور ہم دوبارہ میاں بیوی کی حیثیت سے رہنے لگے۔ ہم نے اس وقت ایک اہلِ حدیث عالم کے فتویٰ/موقف کے مطابق نیا نکاح کیا تھا، جس میں ایک مجلس میں دی گئی متعدد طلاقوں کو ایک طلاق شمار کیا گیا تھا۔
براہِ کرم درج ذیل سوالات کا واضح جواب قرآن و صحیح احادیث کی روشنی میں دیں:
1) پہلی ایک طلاق کے بعد رجوع کرنے سے کیا پہلی طلاق شمار رہتی ہے؟
2) ایک ہی مجلس میں "میں تمہیں طلاق دیتا ہوں" چھ مرتبہ کہنے سے ایک طلاق شمار ہوگی یا تین؟
3) اگر چھ طلاقوں کو ایک طلاق شمار کیا جائے تو پہلی طلاق + دوسری مرتبہ کی ایک طلاق = کیا کل دو طلاقیں شمار ہوں گی؟
4) دوسری عدت مکمل ہونے کے بعد کئی ماہ گزرنے پر اسی شوہر سے نیا نکاح کرنا شرعاً درست تھا؟
5) اگر اس وقت نیا نکاح صحیح شرائط کے ساتھ ہوا تھا تو کیا ہمارا موجودہ نکاح صحیح اور قائم ہے؟
6) براہِ کرم اس مسئلے کے متعلق قرآن کی آیات اور صحیح احادیث کے واضح حوالہ جات بھی عطا فرمائیں۔ میں چاہتی ہوں کہ آپ پورا واقعہ دیکھ کر واضح فتویٰ دیں، تاکہ ہمیں اپنے موجودہ نکاح کے بارے میں اطمینان حاصل ہو۔ جزاکم اللہ خیراً

جواب: 1) جی ہاں، پہلی طلاق واقع ہونے کے بعد اگر شوہر نے عدت کے اندر رجوع کرلیا ہو تو رجوع سے نکاح برقرار ہوجاتا ہے، لیکن پہلی طلاق ختم نہیں ہوتی بلکہ وہ طلاق شمار رہتی ہے، عدت کے اندر رجوع کر لینے کے بعد آئندہ کے لیے شوہر کے پاس صرف دو طلاقوں کا اختیار باقی رہتا ہے، اگر بعد میں مزید دو طلاقیں دے دے تو تین طلاقیں مکمل ہوجائیں گی، لہٰذا رجوع کا مطلب یہ نہیں کہ پہلی طلاق کالعدم ہوگئی، بلکہ پہلی طلاق اپنے شمار کے اعتبار سے برقرار رہتی ہے۔
5/2) شوہر کا ایک ہی مجلس میں اپنی بیوی کو ’’میں تمہیں طلاق دیتا ہوں‘‘ چھ مرتبہ کہنے سے تین طلاقیں واقع ہو کر حرمتِ مغلظہ ثابت ہوگئی ہے اور اب محض رجوع یا تجدیدِ نکاح سے دوبارہ نکاح ممکن نہیں ہے۔ ہاں! اگر آپ عدت گزار کر کسی اور مرد سے نکاح کریں اور اس سے ازدواجی تعلقات قائم کریں، پھر وہ اپنی مرضی سے آپ کو طلاق دیدے یا اس کا انتقال ہوجائے تو آپ اس کی عدت گزار کردوبارہ سابقہ شوہر سے نکاح کرنا چاہیں تو کرسکتی ہیں۔
6) واضح رہے کہ تین طلاقیں دینے کی صورت میں ائمہ اربعہ (امام ابوحنیفہؒ، امام شافعیؒ، امام مالکؒ، امام احمدؒ) کا اس بات پر اجماع ہے کہ دونوں میاں بیوی ایک دوسرے پر حرام ہوجاتے ہیں، اس اجماع کے خلاف کوئی بات بھی کہی جائے تو وہ قابل قبول نہیں ہوگی اور کسی سے خلافِ اجماع فتویٰ لے کر اس پر عمل کرنا اور بھی سخت گناہ اور بڑے خطرے کی بات ہے۔
مزید واضح ہو کہ محض خواہشِ نفس کے خاطر ایسے لوگوں سے فتویٰ لے کر مطلّقہ کو اپنے گھر رکھنا بدترین گناہ ہے، فوراً ایک دوسرےسے الگ ہونا لازم ہے ، ورنہ ساری عمر حرام کاری کے مرتکب رہیں گے۔
نوٹ: دلائل کے خانے میں قرآنِ کریم، احادیثِ مبارکہ اور فقہ کی معتبر کتابوں کے حوالہ جات درج کر دیے گئے ہیں، ملاحظہ فرما لیجیے۔