سوال: مفتی صاحب ! استخارہ کی دعا بتادیں۔

جواب: جب کوئی شخص کوئی کام کرنا چاہے اور یہ فیصلہ کرنا ہو کہ یہ کام کرے یا نہ کرے، تو استخارہ کرنا مسنون ہے، جس کا طریقہ یہ ہے کہ دو رکعتیں استخارے کی نیت سے پڑھے، پھر سلام کے بعد یہ دعا کرے:

اَللّٰھُمَّ اِنِّیْ أَسْتَخِیْرُکَ بِعِلْمِکَ، وَ أَسْتَقْدِرُکَ بِقُدْرَتِکَ، وَ أَسْأَلُکَ مِنْ فَضْلِکَ الْعَظِیْمِ ، فَاِنَّکَ تَقْدِرُ وَ لاَ أَقْدِرُ، وَ تَعْلَمُ وَلاَ أَعْلَمُ، وَ أَنْتَ عَلاَّمُ الْغُیُوْبِ․ اَللّٰھُّمَّ اِنْ کُنْتَ تَعْلَمُ أَنَّ ھٰذَا الْأَمْرَ خَیْرٌ لِّیْ فِیْ دِیْنِیْ وَ مَعَاشِیْ وَ عَاقِبَةِ أَمْرِیْ، فَاقْدِرْہُ لِیْ، وَ یَسِّرْہُ لِیْ، ثُمَّ بَارِکْ لِیْ فِیْهِ․ وَ اِنْ کُنْتَ تَعْلَمُ أَنَّ ھٰذَا الْأَمْرَ شَرٌّ لِّیْ فِیْ دِیْنِیْ وَمَعَاشِیْ وَ عَاقِبَةِ أَمْرِیْ، فَاصْرِِفْهُ عَنِّیْ وَاصْرِفْنِیْ عَنْهُ، وَاقْدِرْ لِیَ الْخَیْرَ حَیْثُ کَانَ ثُمَّ اَرْضِنِیْ بِه
ترجمہ: اے اللہ ! میں تیرے علم کے ذریعے استخارہ کرتا ہوں، اور تیری قدرت سے طاقت چاہتا ہوں، اور تیرے فضلِ عظیم کا سوال کرتا ہوں، کیونکہ تو قدرت رکھتا ہے، میں قدرت نہیں رکھتا، تو علم رکھتا ہے، میں علم نہیں رکھتا، بیشک تو غیب کی باتوں کو خوب جاننے والا ہے، اے اللہ ! اگر تو جانتا ہے کہ یہ کام میرے لیے بہتر ہے، میرے دین کے اعتبار سے بھی، میری دنیوی زندگی کے اعتبار سے بھی، اور میرے انجامِ کار کے لحاظ سے بھی، تو اسے میرے لیے مقدر فرما، اسے میرے لیے آسان فرما، اور اس میں مجھے برکت عطا فرما، اور اگر تو جانتا ہے کہ یہ کام میرے لیے بُرا ہے، میرے دین کے اعتبار سے یا میری دنیوی زندگی کے اعتبار سے یا میرے انجامِ کار کے لحاظ سے، تو اسے مجھ سے دور کردے، اور مجھے اس سے دور کردے، اور میرے لیے جہاں بھی بہتری ہو، اس کو مقدر کردے، اور اس پر مجھے راضی بھی کردے۔

(صحیح بخاری، باب ماجاء فی التطوع مثنی مثنی، رقم الحدیث: 1162)
دعا کرتے وقت جب ”ھذا الامر “پر پہنچے تو اگر عربی جانتا ہے تو اس جگہ اپنی حاجت کا تذکرہ کرے، یعنی ”ھذا الامر “کی جگہ اپنے کام کا نام لے، مثلا ”ھذا السفر “یا ”ھذا النکاح “ یا ”ھذہ التجارة “یا ”ھذا البیع “کہے ، اور اگر عربی نہیں جانتا تو ”ھذا الأمر “ہی کہہ کر دل میں اپنے اس کام کے بارے میں سوچے اور دھیان دے، جس کے لیے استخارہ کررہا ہے۔