سوال: السلام علیکم، حضرت ! سفر سے واپسی پر بیٹیوں سے ملنے کا صحیح طریقہ کیا ہے؟
بڑی بیٹیوں سے سفر سے واپسی پر مصافحہ کرنا، ان کے ہاتھ چومنا، ماتھا چومنا کیسا ہے؟
جزاک اللہ خیرا

جواب: سفر سے واپسی پر بیٹیوں سے ملنے کا شرعا کوئی خاص طریقہ مقرر نہیں ہے٬ لہذا حسب موقع و سہولت کوئی صورت اختیار کی جا سکتی ہے٬ نیز والد کا اپنی بیٹی سے مصافحہ و معانقہ کرنا٬ اسی طرح ہاتھ یا ماتھے کا بوسہ لینا عموماً بلا شہوت پیار ومحبت کی وجہ سے ہوتا ہے؛ اس لیے اس کی گنجائش ہے٬ بشرطیکہ اس سے تحریک شہوت اور کسی فتنہ کا کوئی اندیشہ نہ ہو.
چنانچہ حضور اکرم صلی اللہ علیہ وسلم حضرت فاطمہ رضی اللہ عنہا سے بہت زیادہ محبت فرماتے تھے٬ اور جب وہ تشریف لاتیں٬ تو آپ صلی اللہ علیہ وسلم کھڑے ہوکر ان کا استقبال کرتے اور ہاتھ پکڑ کر ان کو بوسہ دیتے ہوئے اپنے پاس بٹھاتے تھے. لہذا جہاں فتنہ کا اندیشہ نہ ہو٬ تو مصافحہ٬ معانقہ اور ہاتھ یا ماتھے کا بوسہ لے کر اپنی بیٹی سے محبت و شفقت کا اظہار کیا جاسکتا ہے٬ لیکن جہاں فتنے کا اندیشہ ہو٬ وہاں احتیاط بہتر ہے.