سوال: السلام علیکم، مفتی صاحب ! لڑکی کے حق مہر کے متعلق وضاحت کردیں کہ فی زمانہ کیا حق مہر ہونا چائیے؟ نیز مہر فاطمی کیا ہے اور کتنا ہے؟ دوسری بات یہ کہ ایک بچی جس کا باپ غریب آدمی ہے اور بیٹی کو جہیز یا کسی قسم کا سامان نہیں دیتا، اس کا حق مہر کتنا ہونا چائیے؟ اور میں اپنی بیٹی کو فرنیچر اس کے سسرال والوں کو کپڑے بارات کے دو ڈھائی سو لوگوں کو کھانا بھی کھلاؤں گا، یعنی فضول رواج کی تمام شرائط پوری کروں گا، تو اس صورت میں میری بیٹی کا حق مہر کتنا ہونا چائیے؟

جواب: 1- حق مہر سے متعلق آپ صلی اللہ علیہ وسلم کی تعلیمات سے یہ بات معلوم ہوتی ہے، کہ مہر کی مقدار اتنی کم بھی نہیں ہونی چاہیے کہ بالکل معمولی سی ہو اور بہت زیادہ مہر مقرر کرنا بھی آپ صلی اللہ علیہ وسلم کو پسند نہیں تھا، چنانچہ حضرت عمر رضی اللہ عنہ سے مروی ہے کہ آپ رضی اللہ عنہ نے فرمایا کہ مہر میں غلو نہ کرو، اگر مہر کا زیادہ رکھنا دنیا میں عزت اور اللہ کے نزدیک تقویٰ کی بات ہوتی، تو حضور صلی اللہ علیہ وسلم اس کے زیادہ مستحق تھے، اسی وجہ سے احناف کے نزدیک مہر کی کم سے کم مقدار دس درہم (تقریباً دو تولے ساڑھے سات ماشے چاندی) ہے۔
حضرت جابر بن عبداللہ رضی اللہ عنہ سے مروی ہے کہ آپ صلی اللہ علیہ وسلم نے فرمایا کہ مہر دس درھم سے کم نہیں ہونا چاہیے اور زیادہ مہر کی کوئی مقدار مقرر نہیں۔ حسب حیثیت جتنا مهر رکھنا چاہیں رکھ سکتے ہیں، اس پر فقہاء کا اجماع ہے، تاہم مہر میں اعتدال اور میانہ روی بہتر ہے۔

2- "مہرِ فاطمی" کی مقدار احادیث میں ساڑھے بارہ اوقیہ منقول ہے اور ایک اوقیہ چالیس درہم کا ہوتا ہے، تو اس حساب سے "مہر فاطمی" پانچ سو درہم بنتے ہیں۔
موجودہ دور کے حساب سے اس کی مقدار ایک سو اکتیس تولہ تین ماشہ چاندی بنتی ہے۔
اور آج کل کے مروجہ گرام کے حساب سے ایک کلو پانچ سو تیس (530) گرام اور نو سو (900) ملی گرام چاندی بنتی ہے۔
واضح رہے کہ مہر کی کم از کم مقدار دس درہم ہے، چاندی کے حساب سے اس کی مقدار تیس گرام چھ سو اٹھارہ ملی گرام (30.618) اور تولہ کے حساب سے 31.5 ماشہ چاندی بنتی ہے۔
حضرت ام حبیبہ رضی اللہ عنہا کو چھوڑ کر آپ صلی اللہ علیہ وسلم کی بقیہ تمام ازواجِ مطہرات رضی اللہ عنہن اور بناتِ طاہرات رضی اللہ عنہن کا مہر پانچ سو درھم (ایک سو اکتیس (۱۳۱) تولے تین ماشے چاندی) تھا اور آج کل کے مروجہ گرام کے حساب سے ایک کلو پانچ سو تیس (530) گرام اور نو سو (900) ملی گرام چاندی بنتی ہے۔
آج مؤرخہ 12/01/2021 کے مطابق کراچی میں ایک تولہ چاندی کی قیمت تقریباً پندرہ سو ستائیس روپے (1527) ہے، لہذا آج کی قیمت کے اعتبار سے ایک سو اکتیس تولہ تین ماشہ چاندی کی قیمت تقریباً دو لاکھ چار سو اٹھارہ (200,418.75) روپے بنتی ہے۔
اسی کو مہر فاطمی بھی کہا جاتا ہے اور اتنا ہی مہر رکھنا مستحب و پسندیدہ ہے۔
نیز واضح رہے کہ مہر کی کم از کم مقدار دس درہم ہے، چاندی کے حساب سے اس کی مقدار تیس گرام چھ سو اٹھارہ ملی گرام (30.618) اور تولہ کے حساب سے 31.5 ماشہ چاندی بنتی ہے۔
3- لڑکی کی شادی سے پہلے کے تمام اخراجات والد کے ذمہ ہیں،اس لیے لڑکی کے بالغ ہونے کے بعد اس کی شادی کروانا اور شادی کے ضروری اخراجات اٹھانا عرفاً والدین کے ذمہ ہیں، البتہ اس سلسلے میں اپنی حیثیت کو ملحوظ رکھنا چاہیے، بلا ضرورت قرض لینا فضول خرچی کے زمرے میں آتا ہے، نیز ان اخراجات کے عوض مہر میں اضافہ کرنا بھی درست نہیں ہے، جبکہ مہر خالصتاً لڑکی کی ملکیت ہے، اس میں والد کا حصہ نہیں ہے، البتہ اگر لڑکے والے بطور تعاون کچھ رقم دیں، تو اس میں کوئی حرج نہیں ہے۔