سوال: کیا یہ حدیث صحیح ہے کہ رسول اللہ ﷺ نے فرمایا:زندہ در گور کرنے والی اور زندہ درگور کی گئی بچی دونوں جہنم میں جائیں گی۔؟

جواب: دریافت کردہ روایت کو کلمات کے اختصار وتفصیل کے ساتھ متعدد محدثین عظام رحمہم اللہ نے اپنی کتب میں ذکر کیا ہے، متعدد طرق سے منقول ہونے اور مؤید روایات کی وجہ سے روایت کو تقویت مل رہی ہے، لہذا مذکورہ روایت کو(تشریح سمجھنے کے بعد) آگے نقل کرنا درست ہے،سنن ابی داؤد میں مذکورہ روایت نہایت اختصار کے ساتھ نقل کی گئی ہے،چنانچہ اس کا ترجمہ درج ذیل ہے:
"حضرت عامر رضی اللہ عنہ سے روایت ہے کہ رسول اللہﷺ نے ارشاد فرمایا:" زندہ درگور ہونے والی( بچی)، اور درگور کرنے والی(بچی کی ماں یا کوئی بھی انسان) دونوں جہنم میں جائیں گے"۔(سنن أبي داؤد، أوّل کتاب السنة، باب في ذراري المشرکین،99/7، رقم الحدیث:4717، المحقق: شعَيب الأرنؤوط - محَمَّد كامِل قره بللي، الناشر: دار الرسالة العالمية)
جبکہ مسند احمد میں اسی روایت کو قدرے تفصیل سے نقل کیا گیا ہے، ترجمہ درج ذیل ہے:
حضرت سلمہ بن یزید سے روایت ہے کہ میں اور میرا بھائی رسول اللہﷺ کی خدمت میں حاضر ہوئے، ہم نے عرض کیا: یارسول اللہ، ہماری والدہ "ملیکہ " صلہ رحمی ، مہمان نوازی ، اور فلاں فلاں اچھے اعمال کرتی تھیں، البتہ دورِ جاہلیت میں (کفر کی حالت پر) وصال ہوا، کیا یہ اچھے اعمال ان کے لئے نفع بخش ثابت ہونگے؟ رسول اللہﷺ نے ارشاد فرمایا: بالکل نہیں۔ ہم نے عرض کیا کہ انہوں نے ہماری بہن کو زندہ درگور کیا تھا، کیا دورِ جاہلیت کایہ عمل ان کے لیے قابلِ گرفت ہوگا؟ رسول اللہﷺ نے ارشاد فرمایا: زندہ درگور کرنے والی اور جس کو درگور کیا گیا دونوں مستحق جہنم ہیں، البتہ اگر درگور کرنے والی خاتون نے اسلام قبول کرلیا تو اللہ عز وجل اس کو معاف فرمادیں گے۔(مسند أحمد،مسند المکیین، حدیث سلمة بن یزید الجعفي،268/25، رقم الحدیث:15923، المحقق: شعيب الأرنؤوط - عادل مرشد، وآخرون، إشراف: د عبد الله بن عبد المحسن التركي، الناشر: مؤسسة الرسالة)
حدیث کا مفہوم ومصداق:
اس حدیث کے سلیس ترجمہ پر یہ اشکال وارد ہوتا ہے کہ زندہ درگور کی جانے والی بچی کا کیا جرم ہے کہ وہ جہنم کی مستحق ٹھہرائی گئی ہے؟ اس روایت کے حوالہ سے عام طور پر شارحینِ حدیث کی جانب سےیوں تأویل ذکر کی جاتی ہےکہ:
"اس حدیث میں زندہ درگور کرنے والی خاتون سے مراد غیر مسلمہ اور کافرہ ہے، چنانچہ وہ بچی ، جس کو اس خاتون نے درگور کیا ، وہ اپنے والدین کے تابع ہوکر جہنم کی مستحق ہوئی، اس قول کو امام ابو حاتم رحمہ اللہ نے اختیار کیا ہے۔ چنانچہ اس بات کی تائید روایت کے ان کلمات سے ہوتی ہے " الوائدة والموءودة في النار، إلا أن تدرك الوائدة الإسلام، فيعفو الله عنها" (صحیح ابن حبان، باب صفة النار وأهلها، 523/16، مؤسسة الرسالة، بيروت)
نوٹ:روایت بالا کی روشنی میں معلوم ہوتا ہے کہ کفار ومشرکین کی نابالغ اولاد انتقال کی صورت میں والدین کے تابع ہوکر جہنم کی مستحق ہوگی، مگر جمہور علماء کے نزدیک روایت کی ذکر کردہ تأویل وتوجیہ دیگر اصولی روایات کے معارض ہے، جن کے مطابق اللہ رب العزت بغیر کسی گناہ کے سزا میں گرفتار نہیں فرماتے ۔ چنانچہ اسی بناء پر بعض ائمہ کبار رحمہم اللہ آخرت میں دوبارہ ان بچوں کے امتحان کے قائل ہیں، مگر جمہور علماء رحمہم اللہ جن میں امام ابو حنیفہ رحمہ اللہ سرفہرست ہیں، ان کا موقف یہ ہے کہ اس حوالہ سے سکوت اختیار کیا جائے، اور معاملہ کو اللہ رب العزت کےسپرد کردیا جائے۔
حدیث بالا کی بے غبار تشریح وتوجیہ:
اس حوالہ سے دوتاویلات ایسی ہیں جن پر ذکر کردہ اعتراض وارد نہیں ہوتا، ذیل میں ان کو با حوالہ نقل کیا جاتا ہے:
(1)یہ ایک مخصوص واقعہ ہے، جس میں نبیﷺ کو بذریعہ وحی اطلاع ہوگئی تھی کہ درگور کی جانے والی بچی بھی جہنم کی مستحق ہے(اگرچہ بلوغت سے قبل درگور کردی گئی )، چنانچہ روایت کا مفہوم "ام سلمہ بنت یزید (جس کا نام "ملیکہ" تھا) اور ان کی زندہ درگور کی جانے والی بچی کے ساتھ خاص ہوگا ۔ یہ قول ابن عبدالبر اور ابن قیم رحمہما اللہ نے اختیار کیا ہے۔
(2) یہاں "موؤدة"سے مراد وہ بچی نہیں، بلکہ وہ خاتون ہے جس کی رضامندی کے ساتھ"وائدة"(درگور کرنے والی داعیہ خاتون نے ) نے زندہ دفن کیا، گویا یہاں پر "وائدة" کا مصداق "داعیہ خاتون" ہے، اور "موؤدة" سے مراد "بچی کی ماں" ہے، گویااصل عبارت یوں ہے"الموؤدة لها"(جس کے لئے درگور کیا گیا ہو)،چونکہ بچی کی ماں اس عمل پر مکمل طور پر رضامند ہے، سو اسی کے لیے ہی درگور کیا گیا۔ اس قول کو قاضی بیضاوی رحمہ اللہ نے اپنی شرح میں ذکر کیا ہے۔