سوال: درج ذیل حدیث کی وضاحت فرمادیں: "رسول اللہﷺ نے فرمایا: ایسا جسم جنت میں نہیں جائےگا، جس کو حرام مال سے پالا گیا ہو۔(مسند ابو یعلی، حدیث نمبر: 83، 84/1، مسند ابوبکر رضی اللہ عنہ)

جواب: سوال میں ذکر کردہ روایت "مسند أبي يعلى" میں مذکور ہے، ذیل میں اسے سند ومتن، ترجمہ اور تشریح کے ساتھ ذکر کیا جاتا ہے۔
حدثنا يحيى بن معين حدثنا أبوعبيدة الحداد عن عبد الواحد بن زيد عن فرقد السبخي عن مرة الطيب عن زيد بن أرقم : عن أبي بكر الصديق أن النبي صلى الله عليه و سلم قال : "لا يدخل الجنة جسد غذي بحرام".
(مسند أبي يعلى، ج:۱، ص:۸۴۔ط: دار المأمون للتراث)
والحدیث أوردہ الھیثمي فی "المجمع" رواه أبو يعلى، و البزار و الطبراني في الأوسط و رجال أبي يعلى ثقات و بعضهم خلاف.
ترجمہ:
حضرت ابوبکر صدیق رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ "ایسا جسم جنت میں نہیں جائےگا جس کو حرام مال سے پالا گیا ہو۔"
حدیث کا حکم
علامہ ھیثمی نے اس روایت کو اپنی کتاب" مجمع الزوائد" نقل کرنے کے بعد فرمایا کہ اس روایت کو ابویعلی نے مسند ابی یعلی میں ذکر کیا ہے اور اس حدیث کے رجال ثقہ ہیں، لہذا اس روایت کو بیان کرنا درست ہے۔
تشریح:
 حدیث شریف کا ظاہری مطلب یہ ہے کہ  دنیا میں جو شخص حرام غذا سے پلا بڑھا ہو، وہ جنت کے داخلے سے محروم رہے گا اور دوزخ ہی اس کا ٹھکانہ ہوگا۔
 شارحین حدیث نے قرآن و سنت کی دوسری نصوص کی روشنی میں اس جیسی احادیث کے کئی مطالب بیان کیے ہیں:
1۔ایسا  آدمی حرام خوری کی سزا پائے بغیر جنت میں نہیں جاسکے گا،  اگر وہ مؤمن ہوگا تو حرام کا عذاب بھگتنے کے بعد جنت میں جاسکے گا اور اگر مرنے سے پہلے اس کو سچی توبہ نصیب ہوگئی، یا کسی مقبول بندے نے اس کی مغفرت کی دعا کی اور وہ دعا اس کے حق میں قبول ہوگئی،  یا خود رحمت الہی نے مغفرت کا فیصلہ فرما دیا تو عذاب کے بغیر بخشا جاسکتا ہے۔
2۔ ایسا شخص جنت کے اعلی درجات میں داخل نہیں ہو سکے گا۔
3۔ ایسا آدمی جو حرام مال کو حلال مال سمجھ کر کھاتا ہے، وه جنت میں داخل نہیں ہوگا۔
4۔ اس ارشاد گرامی کا اصل مقصد حرام مال کھانے کی برائی اور سخت وعید کا بیان کرنا ہے۔