عنوان: مسجد کے باہر بوسیدہ قرآنِ کریم اوراق کو غیر محفوظ حالت میں رکھنے کا شرعی حکم

سوال: السلام علیکم ورحمۃاللہ وبرکاتہ، محترم مفتی صاحب! میں ہمارے محلے کی ایک مسجد میں نماز پڑھنے جاتا تھا، مجھے اس مسجد کے باہر ایک چبوترے پر اکثر کچھ بورے اور دوسری طرف ضعیف قرآن کریم رکھے ہوئے نظر آتے تھے، ایک دفعہ جب میں نے اور کچھ نمازیوں نے ایک بورے کو کھولا تو حیران رہ گئے کہ اس بورے میں کافی تعداد میں قرآن کریم اور دیگر مقدس کتابیں انتہائی خستہ حالت میں موجود تھیں، اندر چوہےبھی تھے۔
ایک نمازی بھائی نے بتایا کہ کئی دفعہ میں نے تیز ہوا چلنے کے سبب قرآن کریم کے اوراق زمین سے اُٹھائے ہیں، میں نے اور کچھ نمازیوں نےمسجد والوں سے یہ شکایت کی تو جواب ملا ہمارے پاس مسجد کے اندر جگہ نہیں ہے، بہرحال یہ سلسلہ کئی سالوں سے ایسا ہی چل رہا ہے، یہ بورے دھوپ ،مٹی اور گاڑیوں کا کالا دھواں لگنے کی وجہ سے جگہ جگہ سے پھٹنے لگے ہیں۔ کئی دفعہ اللہ معاف کرے ان بوروں پر بلیاں بھی گھومتی، بیٹھتی اور پیشاب پاخانہ بھی کرتی دیکھی ہیں، کئی مرتبہ کتے بھی ان پر بیٹھے دیکھے گئے ہیں، ایک بورا کھولا تو اس میں چوہے تھےجو ان بوروں میں گھس کر ان قرآنی اوراق اور دیگر مقدس اوراق کوکتررہے تھے، جس سے قرآن کریم کے اوراق ریزہ ریزہ ہوگئے تھے، کئی مرتبہ نشہ کرنے والےاور کچرا چننے والے بھی ان بوروں سے مقدس اوراق چوری کرکے ردی والے کو فروخت کرتے دیکھے گئے ہیں، تیز ہوائیں چلنے کے سبب قرآن کریم کے مقدس اورا ق کبھی زمین پر تو کبھی گلیوں میں بھی دیکھے گئے ہیں۔
محترم مفتی صاحب ! مجھے آپ سے یہ معلوم کرنا تھا کہ کیا اس طرح مسجد کے باہر قرآن کریم یا وہ بورے جس میں قرآن کریم بھی موجود ہوں باہر رکھ سکتے ہیں؟

جواب: واضح رہے کہ قرآنِ کریم اللہ تعالیٰ کی مقدس کتاب ہے، اس کی تعظیم و احترام ہر مسلمان پر لازم ہے، جب قرآنِ کریم کے اوراق بوسیدہ ہوجائیں اور تلاوت کے قابل نہ رہیں تو انہیں ایسی جگہ رکھنا ضروری ہے جہاں ان کی بے حرمتی نہ ہوتی ہو۔
پوچھی گئی صورت میں مسجد کے باہر کھلے ماحول میں بوسیدہ قرآنِ کریم اور دیگر مقدس کتابوں کو ایسے بوریوں میں رکھنا، جہاں بارش، دھوپ، مٹی، جانوروں کے پیشاب و پاخانے، چوہوں اور دیگر اسباب سے ان کی بے حرمتی ہو رہی ہو، شرعاً درست نہیں ہے۔ اسی طرح قرآنِ کریم کے اوراق کا ہوا سے اڑ کر زمین اور گلیوں میں بکھرنا اور ان کا ضائع ہونا بھی بے حرمتی کا سبب ہے، لہٰذا مسجد کی انتظامیہ پر لازم ہے کہ ان مقدس اوراق کی حفاظت کا مناسب انتظام کرے۔
مسجد کے اندر جگہ نہ ہونے کی صورت میں انہیں کسی محفوظ، پاک اور مناسب جگہ پر رکھا جائے، جہاں بارش، دھوپ، جانوروں اور دیگر اسباب سے ان کی بے حرمتی کا اندیشہ نہ ہو۔ اگر یہ اوراق بالکل ناقابلِ استعمال ہوچکے ہوں تو انہیں شرعی طریقے کے مطابق محفوظ طور پر دفن کیا جائے یا کسی مستند ادارے کے ذریعے ان کی بے حرمتی سے بچانے کا انتظام کیا جائے۔
لہٰذا مسجد کی انتظامیہ کو چاہیے کہ اس معاملے کو معمولی نہ سمجھے، بلکہ فوری طور پر ان مقدس اوراق کی حفاظت کا انتظام کرے اور انہیں اس طرح باہر نہ رکھے۔