عنوان: سسر کے شہوت کے ساتھ چھونے سے حرمتِ مصاہرت اور ازدواجی تعلق کی شرعی حیثیت

سوال: میرا مسئلہ یہ ہے کہ میری شادی کو دو سال ہو گئے ہیں، میرے سسر میرے حقیقی تایا بھی ہیں،میرے سسر مجھ سے بہت بے تکلف ہونے لگے تھے، وہ کہتے تھے کہ میں تمہارے باپ، دوست اور شوہر کی جگہ ہوں، چہرے پر بوسہ دیتے اور کہتے کہ تم بیٹی جیسی ہو، کبھی بازو دباتے، کبھی پاؤں دبانے کو کہتے، جب گھر میں کوئی نہ ہوتا تو تنہائی میں مجھے گلے لگاتے۔
ایک دن صبح گھر پر کوئی نہیں تھا، انہوں نے اپنے کمرے میں بلایا اور مجھے سینے سے لگایا اور کہا کہ میرے اوپر آ کر بیٹھ جاؤ۔ میں نے انکار کیا اور کہا کہ میں آپ کی بیٹی جیسی ہوں، آپ ایسا کیسے کہہ سکتے ہیں۔ اس کے بعد وہ ڈر گئے، میں نے یہ ساری بات اپنے شوہر کو بتائی تو انہوں نے ثبوت مانگا۔
اب سوال یہ ہے کہ بعض لوگ کہتے ہیں کہ اگر سسر بہو کو شہوت کی نظر سے چھوئے تو اس کا نکاح اپنے شوہر سے ٹوٹ جاتا ہے تو کیا ہمارا نکاح ٹوٹ گیا ہے؟ ہم دونوں میاں بیوی الگ نہیں ہونا چاہتے، اس صورت میں حرمتِ مصاہرت کا حکم کیا ہے؟ اور ہمارے نکاح کا کیا حکم ہے؟

جواب: اگر سسر نے شہوت کے ساتھ بلا کسی حائل کے ساتھ ہاتھ لگایا ہو، یا شہوت کے ساتھ ہاتھ لگاتے وقت درمیان میں کپڑا تھا مگر اس کے باوجود بدن کی حرارت محسوس ہوئی ہو، یا ہونٹوں پر بوسہ دیا ہو تو ان صورتوں میں حرمتِ مصاہرت واقع ہو جاتی ہے۔
البتہ گال پر بوسہ دینے میں علماء کے دو اقوال ہیں، راجح یہ معلوم ہوتا ہے کہ اگر سسر گال پر بوسہ دینے میں شہوت کا انکار کرے اور اس عورت کا شوہر بھی اپنے والد کی تصدیق کرے تو اس صورت میں حرمتِ مصاہرت ثابت نہیں ہوگی۔
واضح رہے کہ جن صورتوں میں حرمت کی بات کی گئی ہے اگر ان میں گواہ نہ ہوں تو شوہر پر حرمت کے مکمل ثبوت اور علیحدگی کے واجب ہونے کے لیے "شوہر کا بھی ان باتوں کی تصدیق کرنا" لازمی ہوگا، لہٰذا اگر شوہر ان باتوں کی تصدیق کر دے تو آپ اپنے شوہر پر ہمیشہ کے لیے حرام ہو چکی ہے، دونوں کا ساتھ رہنا ناجائز ہے اور فوری علیحدگی کے ساتھ شوہر پر زبان سے الفاظِ متارکت (مثلاً: "میں نے تمہیں چھوڑ دیا") کہنا واجب ہے، لیکن جب تک شوہر تصدیق نہ کرے اور ثبوت طلب کرے، تب تک قضاءً ( عدالتی طور پر) اس پر متارکت لازم نہیں ہوتی، البتہ اگر آپ کو خود سسر کے اس فعل اور شہوت کا قطعی یقین ہے تو آپ کے اپنے حق میں حرمت ثابت ہو جانے کی وجہ سے آپ کے لیے شوہر کو اپنے قریب آنے دینا شرعاً جائز نہیں ہوگا۔