سوال: ابن عباس رضی اللہ عنہما نے انار کے ایک دانہ کو اٹھایا اور اس کو کھالیا، ان سے کہا گیا کہ آپ نے یہ کیوں کیا؟ انہوں نے فرمایا: مجھے یہ بات پہنچی ہے کہ زمین کے ہر انار میں جنت کے دانوں میں سے ایک دانہ ڈالا جاتا ہے، شاید یہ وہی ہو۔ ( طبرانی بسند صحیح ) کیا یہ حدیث صحیح اور ثابت ہے؟

جواب: سوال میں دریافت کردہ روایت حضرت عبد اللہ بن عباس رضی اللہ عنہما سے دو طرح سے منقول ہے:
(1) مرفوعاً: جس میں اس روایت کو نبیﷺ کی جانب منسوب کیا گیا ہے۔
(2)موقوفاً: ا س روایت کا قائل حضرت عبداللہ بن عباس رضی اللہ عنہما کو قرار دیا گیا ہے۔
تاہم دونوں روایات کی سند کمزور ہے، البتہ اس کو موضوع (من گھڑت) قرار دیا جانا درست نہیں ہے، سو اس روایت کو آگے نقل کرنے کی گنجائش ہے۔
مذکورہ روایت پر محدثین کے کلام کا خلاصہ ذیل میں نقل کیا جاتا ہے، اس سے قبل مرفوع و موقوف دونوں روایات کا ترجمہ ملاحظہ ہو:
مرفوع روایت کا ترجمہ:
حضرت ابن عباس رضی اللہ عنہما نبی ﷺ سے نقل کرتے ہیں کہ دنیا میں موجود انار میں جنت کے دانوں میں ایک دانہ ضرور ڈالا جاتا ہے۔
موقوف روایت کا ترجمہ:
حضرت عبد اللہ بن عباس رضی اللہ عنہما سے متعلق آتا ہے کہ آپ انار کا دانہ اٹھا کر کھا لیا کرتے تھے، ان سے عرض کیا گیا: اے ابن عباس، آپ ایسا کیوں کرتے ہیں؟ تو آپ رضی اللہ عنہما جواب میں فرماتے: مجھے یہ بات پہنچی ہے کہ زمین میں موجود انار جنت کے انار کے ایک دانہ پر ضرور مشتمل ہوتا ہے، سو میں اس دانہ کو اٹھا کر اس لیے کھاتا ہوں کہ ہو سکتا یہ دانہ وہی ہو جو جنت کے انار کا ہے۔
مذکورہ مرفوع روایت کو امام دیلمی رحمہ اللہ نے اپنی "مسند"میں اور ابن عدی رحمہ اللہ نے "الکامل" میں ذکر کیا ہے، جبکہ موقوف روایت کو امام طبرانی رحمہ اللہ نے "المعجم الکبیر" میں، أبو نعيم اصبہانى رحمہ اللہ نے "حلیۃ الاولیاء" میں، اور بیہقی رحمہ اللہ نے "شعب الإیمان" میں نقل کیا ہے۔
دونوں روایات پر محدثین کے کلام کا خلاصہ:
مرفوع روایت کو ابن عدی رحمہ اللہ نے "الکامل فی ضعفاء الرجال" میں دو سندوں سے نقل کرنے کے بعد تبصرہ کرتے ہوئےدونوں سندوں کو باطل قرار دیا ہے، اسی طرح علامہ ابن جوزی رحمہ اللہ نے اپنی کتاب "الموضوعات" میں انہی دو سندوں کے ساتھ روایت کو نقل کیا ہے، اور راویوں سے متعلق کلام کرتے ہوئے فرمایا کہ (مرفوع حدیث کی) پہلی سند میں راوی "عبد السلام بن عبید" ہے، جس کے متعلق ابن حبان رحمہ اللہ نے فرمایا ہے کہ وہ "سرقہ حدیث "کے مرتکب تھے، لہذا ان کی روایت کو بطور دلیل بیان کرنا کسی طور بھی جائز نہیں ہے اور دوسری سند میں "محمد بن ولید" راوی موجود ہے، جس کے متعلق ابن حبان رحمہ اللہ نے فرمایا کہ یہ شخص خود ساختہ روایت کو آگے چلتا کرتے اور "سرقہ حدیث" کے مرتکب تھے، اس کے علاوہ اسانید اور متون میں الٹ پھیر کیا کرتے تھے۔(الكامل في ضعفاء الرجال لابن عدي، ترجمة محمد بن الوليد بن أبان القلانسي البغدادي، 543/7، الکتب العلمية)
البتہ علامہ سخاوی رحمہ اللہ مذکورہ روایت سے متعلق لکھتے ہیں کہ یہ ابن عباس رضی اللہ عنہما سے مرفوعاً منقول ہے، اور اس کی سند میں ضعف ہے، یہی بات (رفع سے متعلق) علامہ ذہبی رحمہ اللہ نے بھی ذکر کی ہے۔ اسی بات کو علامہ عجلونی رحمہ اللہ نے بھی "کشف الخفاء" میں ذکر کیا ہے۔(المقاصد الحسنة فیما اشتهر علی الألسنة لشمس الدین السخاوي، حرف المیم، 587/1، المحقق: محمد عثمان الخشت، الناشر: دار الكتاب العربي - بيروت)
چنانچہ ابن عراق الکنانی نے اپنی کتاب " تنزيه الشريعة المرفوعة عن الأخبار الشنيعة الموضوعة " میں ابن جوزی کی جانب سے روایات کو موضوع قرار دیئے جانے کے بعد تعاقب پیش کیا ہے، لکھتے ہیں:
" پہلی سند کے راوی "محمد بن ولید" سے متعلق حافظ ابن حجر رحمہ اللہ نے "لسان المیزان" میں بحوالہ ابن حبان نقل کیا ہے کہ موصوف شام میں سکونت اختیار کرنے کے بعد اہلیانِ شام کو حدیثیں بیان کرتے تھے، موصوف عبیداللہ بن موسی اور اہل عراق سے روایات نقل کرتے تھے، ان سے ہمارے مشایخ بالخصوص قطان رحمہم اللہ نے روایت نقل کی ہے، موصوف کبھی کبھی غلطی کرجاتے اور بعض اوقات غیر معروف مضمون بیان کرتے تھے۔ مذکورہ روایت کے حوالہ سے "معجم کبیر" میں ابن عباس رضی اللہ عنہما سے موقوفاً روایت شاہد کے درجہ میں ہے۔
پھر خود فرماتے ہیں کہ "اس موقوف روایت سے متعلق علامہ ہیثمی رحمہ اللہ فرماتے ہیں کہ اس کے تمام راوی صحیح حدیث کے راوی ہیں، اور امام بیہقی نے بھی" شعب الایمان" میں روایت کو نقل کیا ہے"۔