سوال:
میں اپنی زکوۃ کی رقم لاہور سے دوسرے شہر کے ایک رفاہی ادارے کے مستحقین کے لئے بھیجنا چاہتا ہوں اور بینک یا ڈاکخانہ سے بھیجنے کی وجہ سے کچھ چارجز ادا کرنا ہوں گے، کیا میں یہ چارجز زکوٰۃ کے مال میں سے ادا کرسکتا ہوں؟
جواب: بینک اور ڈاکخانہ کے ذریعہ زکوٰۃ کی رقم مستحق تک پہنچانا جائز ہے، البتہ زکوۃ کی رقم سے بینک اور ڈاکخانہ کے چارجز (charges) ادا کرنا جائز نہیں ہے، اگر اس کے چارجز زکوٰۃ سے ادا کیے گئے، تو چارجز کی مد میں ادا کردہ رقم کے بقدر زکوٰۃ ادا نہیں ہوگی اور اتنی رقم کا دوبارہ زکوۃ میں ادا کرنا لازم ہوگا، کیونکہ اتنی رقم کا مستحق مالک نہیں بنے گا اور زکوۃ کی ادائیگی کے لئے مستحق کو مالک بنانا ضروری ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الدر المختار: (256/2، ط: دار الفکر)
كتاب الزكاة۔۔۔۔۔۔(هي) لغة الطهارة والنماء، وشرعا (تمليك) خرج الإباحة، فلو أطعم يتيما ناويا الزكاة لا يجزيه إلا إذا دفع إليه المطعوم كما لو كساه بشرط أن يعقل القبض إلا إذا حكم عليه بنفقتهم (جزء مال) خرج المنفعة، فلو أسكن فقيرا داره سنة ناويا لا يجزيه (عينه الشارع) وهو ربع عشر نصاب حولي۔۔۔الخ
الھندیۃ: (170/1، ط: دار الفکر)
هي تمليك المال من فقير مسلم غير هاشمي، ولا مولاه بشرط قطع المنفعة عن المملك من كل وجه لله - تعالى - هذا في الشرع كذا في التبيين
واللہ تعالٰی اعلم بالصواب
دارالافتاء الاخلاص،کراچی