سوال: جو شخص شہرت کے لیے کپڑے پہنے گا، اللہ اس کو قیامت کے دن رسوائی کے کپڑے پہنائے گا اور اس میں آگ بھڑکائے گا۔ (ابن ماجہ) مندرجہ بالا حدیث کی تصدیق فرمادیں۔

جواب: سوال میں مذکور حدیث متعدد مستند کتبِ حدیث میں صحیح سند سے مذکور ہے، ذیل میں سنن ابن ماجہ کی روایت کا ترجمہ پیش کیا جاتا ہے:
حضرت عبداللہ بن عمر رضی اللّٰہ عنہما سے روایت ہے کہ رسول اللہ ﷺ نے ارشاد فرمایا: جو شخص دنیا میں نمائش اور شہرت کا لباس پہنے گا، اللہ تعالیٰ اسے قیامت کے دن ذلت ورسوائی کا لباس پہنائے گا، پھر اس میں آگ بھڑکا دے گا۔ ("ثوب شھرة" سے کونسا لباس مراد ہے؟ اس حوالہ سے علماء کرام سے چار قسم کے اقوال منقول ہیں:
١- اس سے مراد ایسا لباس جسے فخر و تکبر اور اپنی بڑائی جتلانے کے لیے پہنا جائے۔
٢- ایسا لباس جو شرعا اس شخص کے لیے پہننا حرام ہو، مثلا مرد کے لیے ریشم پہننا۔
٣-ایسا لباس جو محض تمسخر اور لوگوں کو ہنسانے کے لیے اختیار کیا جائے۔
٤- بعض شارحین کی رائے یہ ہے کہ "شہرت کے لباس" سے مراد "جسمانی لباس" نہیں ،بلکہ لفظ "لباس"یہاں پر "انسانی اعمال "سے کنایہ ہے، یعنی جو لوگ دکھاوے کی غرض سے نیک اعمال کرتے ہیں، تو وہ گویا شہرت کا لباس پہنے ہوئے ہیں۔
ملا علی قاری، علامہ طیبی ودیگر عام شارحین رحمہم اللہ نے پہلے قول کو راجح قرار دیا ہے۔(مرقاة المفاتیح، کتاب اللباس، 2782/7،دار الفکر)
سابقہ گفتگوسے پیدا ہونے والے ايک اشکال اور اس کا جواب:
مذکورہ بالا حدیث میں تو "شہرت کا لباس" پہننے سے ممانعت فرمائی گئی ہے، جبکہ سنن الترمذی ميں حضرت عبد اللہ بن عمرو بن العاص رضی اللہ عنہ سے مروی ہے : "إن الله يحب أن يرى أثر نعمته على عبده". (بے شك الله تعالى يہ پسند کرتا ہے کہ وہ اپنی نعمتوں کا اثر اپنے بندے پر دیکھے). (سنن الترمذي: 4/ 421، (رقم الحدیث:2819)
اس حدیث سے تو اچھے اور عمدہ کپڑے پہننے کی اجازت معلوم ہوتی ہے، چنانچہ ان دونوں احادیث پر کس طرح عمل ممکن ہے؟
سو اس حوالہ سے واضح رہنا چاہیے کہ انسان کا تنگ دل وبخیل ہونااور( باوجود وسعت )میلا کچیلا لباس پہنے رکھنا شرعا مذموم ہے، تو دوسری جانب تکبر، نام ونمود کی خواہش اور دوسروں کو حقیر وکم تر سمجھنے کا ایک ناسور مرض، یہ بھی ایک انتہائی نا پسندیدہ عمل ہے، چنانچہ جس حدیث میں نعمت کا اثر بندوں پر ظاہر ہونے کی ترغیب دی گئی ہے اس ارشاد سے درحقیقت انسان کو بخیل بننے اور میلا کچیلا رہنے سے منع فرمایا گیا ہے، اور جس حدیث میں "شہرت کا لباس" اختیار کرنے کی ممانعت وارد ہے تو اس کا مقصد یہ ہے جب انسان کوئی اچھا لباس پہنے تو دل میں بڑائی آنے نہ دے، اس لباس کو نمائش کی نیت سے نہ پہنے، بلکہ خدا تعالى کا شکر بجا لائے۔
یہ بات بھی ذہن نشین کرنی چاہیے کہ لباس پہننے کا مقصد کیا ہے، اس کا تعلق انسان کی نیت سے ہے ، اس کی نیت پر فیصلہ ہوگا کہ اس شخص نے وہ لباس شہرت کی غرض سے پہنا ہے، یا ستر پوشی کے لیے۔ اور نیت کا تعلق دل سے ہے اور دلوں کا حال الله تعالی ہی بخوبی جانتے ہیں، لہذا کسی عمدہ لباس زیب تن شخص کو دیکھ کر حدیث شریف میں وارد وعیدات کا مصداق قرار دینا یہ ایک انتہائی نا مناسب حرکت ہے۔