سوال: حضرت حسن رضی اللہ عنہ کہتے ہیں کہ رسول اللہ صلی اللہ علیہ وسلم نے اپنے رب کے حوالے سے یہ حدیث بیان فرمائی کہ اللہ تعالیٰ فرماتا ہے: اے آدم کے بیٹے! تو اپنا خزانہ میرے پاس جمع کرکے مطمئن ہو جا، نہ آگ لگنے کا خطرہ، نہ پانی میں ڈوبنے کا اندیشہ اور نہ چوری کا ڈر، میرے پاس رکھا گیا یہ خزانہ، میں پورا تجھے دوں گا، اس دن جب تو اس کا سب سے زیادہ محتاج ہوگا۔ (ترغیب بحوالۂ طبرانی) مفتی صاحب ! اس حدیث کی تصدیق فرمادیں۔

جواب: سوال میں ذکرکردہ روایت حضرت حسن بصریؒ (م 110ھ ) سے مرسلاًمروی ہے اور ان سے مرسل ہونے کی صراحت کے ساتھ بیان کرنا درست ہے۔اس روایت کا ترجمہ ،تخریج اور اسنادی حیثیت مندرجہ ذیل ہے:
ترجمہ:حضرت حسن بصری سے روایت ہے کہ جناب رسول اللہ ﷺ نے اپنے رب کے حوالے سے یہ حدیث بیان فرمائی کہ اللہ تعالیٰ فرماتا ہے: اے آدم کے بیٹے! تو اپنا خزانہ میرے پاس امانت رکھوا(کرمطمئن ہو جا)‘ نہ آگ لگنے کا خطرہ‘ نہ پانی میں ڈوبنے کا اندیشہ اور نہ چوری کا ڈر۔ میرے پاس رکھا گیا یہ خزانہ، میں پورا تجھے دوں گا ، اس دن جب تو اس کا سب سے زیادہ محتاج ہوگا۔(شعب الإیمان للبیھقی،حدیث نمبر: 3342،ط: دارالكتب العلمية)
تخریج الحدیث:
۱۔امام بیھقی (م 458ھ)نے ’’شعب الإیمان‘‘(3/211)،رقم الحديث: 3342،ط: دارالكتب العلمية) میں ذکر کیا ہے۔
۲۔علامہ منذری (م 656)نے ’’الترغیب و الترھیب‘‘ ( 2/10) رقم الحدیث: 1292، ط: دار الکتب العلمیة)میں امام طبرانی (م 360ھ)اور امام بیھقی(م 458ھ) کے حوالے سے ایک لفظ کے فرق کے ساتھ نقل کیا ہے۔
مذکورہ روایت کی اسنادی حیثیت:
مذکورہ بالا روایت حضرت حسن بصریؒ (م 110ھ) کی مرسل روایت ہے اور محدثین کی اصطلاح میں مرسل حدیث اسے کہتے ہیں، جس میں صحابیؓ کا نام چھوڑ دیا جائے، جیسا کہ کوئی تابعی کہے، قال رسول اللہ ﷺ(رسول اللہ ﷺ نے فرمایا۔)(2)
مرسل روایات کا حکم
مرسل روایات کے بارے میں علمائے احناف کثراللہ سوادھم کا مسلک یہ ہے کہ قرون ِ ثلاثہ(صحابہ کرام ،تابعین کرام اور تبع تابعین کرام رحمہم اللہ )کے مراسیل مطلقا ًقابل ِ قبول ہیں۔(3)
حضرت حسن بصری (م 110ھ) کی مراسیل کا حکم
حضرت حسن بصری (م 110ھ) علم و علمل کے اعتبارسے اپنے زمانے کے سربرآودردہ شخصیت تھے،انھوں نے صحابہ کرام کی ایک بڑی تعداد سے علم حاصل کیا ۔(4)حسن بصریؒ (م 110ھ) مرسل روایت بیان کرتے ہیں ان کے مراسیل کے بارے میں محدثین کرام رحمہم اللہ کے مختلف اقوال ہیں۔
امام ابن المدینیؒ (م 234ھ)کہتے ہیں کہ حسن بصریؒ (م 110ھ) کی ثقہ روای سے مروی مراسیل ’’صحیح ‘‘ہیں ،البتہ ایسی روایات صحاح کے درجے سے کچھ کم ہوں گی ۔
امام ابوزرعہ(م302ھ) فرماتے ہیں کہ حسن بصریؒ (م 110ھ) جس روایت کو قال رسول اللہ ﷺ کہہ کر روایت کرتے ہیں، اس کی کوئی نہ کوئی اصل مجھے ضرور ملی ہے سوائے چار روایات کے،جو نہیں ملی ہیں ۔(5)
امام یحیی ٰ بن سعید القطان(م198 ھ)فرماتے ہیں کہ حسن بصریؒ (م 110ھ) نےجس روایت کو قال رسول اللہ ﷺ کہہ کر روایت کیا ہے ،ہمیں اس کی اصل ملی ہے ،البتہ ایک دو حدیثیں ایسی ہیں جو نہیں ملیں۔ (6)
امام ابوبكرالجصاص (م 370ھ)نے حضرت حسن بصریؒ (م 110ھ) کے حوالے سے لکھا کہ وہ فرماتے ہیں کہ جب مجھے کوئی حدیث چار صحابہ کرام سے مل جاتی ہے تو میں اس میں ارسال کرتاہوں۔ (7)
اس تفصیل سے معلوم ہوا کہ حضرت حسن بصریؒ (م 110ھ )کی مرسل روایات قابل قبول ہیں۔