سوال: میں نے ایک جگہ پڑھا ہے کہ بیت اللہ پر پہلی نگاہ پڑتے وقت دعا کرنی چاہیے، کیونکہ بیت اللہ پر جب پہلی نگاہ پڑتی ہے تو اس وقت جو دعا کی جائے قبول ہوتی ہے، کیا یہ بات حدیث سے ثابت ہے؟

جواب: واضح رہے کہ حج اورعمرے کے لیےحاضر ى كے وقت بیت اللہ شریف پر پہلی نظر پڑنے پر ہاتھ اٹھا کر دعا کرنا جمہور فقہائے کرام (حنفیہ، حنابلہ ، شافعیہ اور متاخرین مالکیہ ) کے نزدیک مستحب ہے۔ متعدد احادیث (مرفوع، مرسل اور موقوف) سے یہ بات ثابت ہے کہ مکہ مکرمہ میں داخل ہونے کے بعد جب آنحضرت ﷺکى پہلى نظر بیت اللہ شریف پر پڑى تو آپ ﷺنے ہاتھ اٹھا کر دعا فرمائى ہے، ذیل میں اس سلسلے کى مرفوع روایات ، صحابہ کرام رضی اللہ عنہم اجمعین کے آثار اور ائمہ کرام رحمہم اللہ کے اقوال ذکر کیے جاتے ہیں، جن کے مطالعے سے یہ ثابت ہوتا ہے کہ بیت اللہ شریف پر پہلى نظر پڑنے کے وقت ہاتھ اٹھا کر دعا کرنا مستحب ہے۔
اس سلسلے میں پانچ مرفوع روایات :حضرت عبد اللہ بن عباس، حضرت عبد اللہ بن عمر، حضرت ابو امامہ ،حضرت حذیفۃ بن اسید اور حضرت ام عبد الرحمن بن طارق رضی اللہ عنہم اجمعین سے مروى ہیں اور تین مرسل روایات: حضرت ابن جریج، حضرت مکحول الشامی اور حضرت طاؤس بن کیسان رحمہم اللہ سے مروى ہیں۔
فقہ حنفی کے راجح قول کے مطابق بیت اللہ شریف پر پہلى نظر کے وقت دعا کرنا مستحب ہے، جیساکہ حضرت شیخ الاسلام مفتى محمد تقى عثمانی صاحب دامت برکاتہم نے اس موضوع پر مفصل فتوے میں تحریر فرمایا ہے، جو کہ ماہنامہ البلاغ جلد ۵۰ شمارہ۲ ،ص۲۵۔۳۴ ،میں شائع ہوا ہے، جس میں مذکورہ روایات کو ذکر فرما کر اس بات کو ثابت فرمایا ہے کہ بیت اللہ شریف پر پہلى نظر پڑنے پر دعا مانگنا مستحب ہے۔
ذیل میں اس حوالے سےتمام روایات مرفوع ومرسل روایات کا ترجمہ اور ان کی اسنادی حیثیت ذکر کی جاتی ہے:
۱) حدیث عبد اللہ بن عباس رضی اللہ عنہما:
حضرت ابن عباس رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: سات مواقع پر ہاتھ اٹھائیں گے، جب نماز شروع کی جائے اور جب مسجد حرام میں داخل ہوئے ہوئے بیت اللہ پر نظر پڑے اور جب صفا اور مروہ پہاڑی پر کھڑا ہو اور عرفہ میں بعد از زوال جب لوگوں کے ساتھ وقوف کرے اور مزدلفہ میں وقوف کے وقت اور جمرتین کی رمی کرتے وقت (المعجم الکبیر للطبرانی،حديث نمبر:12072)
تخریج الحدیث:
۱۔اس روایت کو امام طبرانی (م360ھ)نے ’’المعجم الکبیر‘‘(11/385،رقم الحديث:12072،ط:مكتبة ابن تيمية)میں ذکرکیا ہے۔
۲۔ امام ابن ابی شیبہ (م235ھ)’’مصنف ابن ابی شیبہ ‘‘((2 / 417،رقم الحديث:2465 ، (8 / 763،رقم الحديث:15992 ، (8 / 764،رقم الحديث:15996۔ط:دارالقبلة)میں ذکرکیا ہے۔
۳۔ امام طحاوی (م321ھ)نے ’’شرح معانی الأثار‘‘(2/176،رقم الحديث:3821،ط:عالم الكتب)میں ذکرکیا ہے۔
۴۔امام بیہقی (م458ھ)نے’’السنن الکبری‘‘(5/117،رقم الحديث:9210،ط:دارالكتب العلمية)میں ذکرکیا ہے۔
مذکورہ روایت کی اسنادی حیثیت:
علامہ ہیثمی (م807ھ) نے ’’مجمع الزوائد‘‘ میں اس روایت کو امام طبرانی رحمہ للہ کےحوالے سے نقل کیا ہے اور فرمایا ہے:انہوں نے اس روایت کو ’’المعجم الکبیر ‘‘اور ’’المعجم الأوسط ‘‘میں نقل کیا ہے ۔۔۔اور اس کی سند میں ’’محمد بن ابی لیلی‘‘ روای اپنے حافظےکے اعتبار سے کمزور ہیں ، تاہم ان کی حدیث’’حسن ‘‘ہے۔
علامہ ظفر احمد عثمانی (م1394ھ) اس روایت کو ’’إعلاء السنن‘‘ میں نقل کرنے کے بعد فرماتے ہیں:’’اس روایت کے رجال ثقہ ہیں سوائے’’محمد ابن ابی لیلی‘‘کے ،اگرچہ ان پر کلام کیا گیا ہے ،لیکن وہ حسن الحدیث ہیں‘‘۔
محدث العصر علامہ محمد انورشاہ کشمیری (م1352ھ) اس روایت کو علامہ زیلعی (م762ھ) کے حوالے سے نقل کرنے کے بعد فرماتے ہیں:اس کی اسناد قوی ہے اوراس سند میں امام نسائی کا وجود ہی کافی ہے، جیسا کہ معلوم ہے امام نسائی نہ خود کمزور روایت نقل کرتے ہیں اور نہ ہی کسی کمزور روایت کرنے والے سے روایت نقل کرتے ہیں۔
۲)حدیث حضرت عبد اللہ بن عمر رضی اللہ عنہما:
امام طحاوی نے’’شرح المعانی الآثار‘‘(2/176،رقم الحديث:3822،ط:عالم الكتب)ميں حضرت عبد اللہ بن عباس رضی اللہ عنہما کى مذکورہ بالا روایت نقل کرنے کے بعد حضرت عبداللہ بن عمر رضی اللہ عنہ کی روایت ’’ابن ابی لیلى ‘‘کے طریق سےذکر فرما کر الفاظ کى جگہ ’’مثلہ‘‘کہا ہے، یعنى حضرت عبد اللہ بن عمر رضی اللہ عنہما کى حدیث کے الفاظ حدیث ابن عباس رضی اللہ عنہما جیسے ہیں ، جو کہ اوپر مذکور ہیں۔
تخریج الحدیث:
۱۔امام طحاوی رحمہ اللہ نے’’شرح المعانی الآثار‘‘(2/176،رقم الحديث:3822،ط:عالم الكتب)ميں اس روایت کو نقل فرمایا ہے۔
۲۔امام بیہقی رحمہ اللہ نے ’’السنن الکبرى‘‘ (5/177، رقم الحديث (9210)، ط: دار الكتب العلمية) ميں اس روایت کو محمد بن عبدالرحمن بن ابی لیلی ،عن الحکم، عن مقسم ،عن ابن عباس اور محمد بن عبد الرحمن بن ابی لیلى، عن نافع ،عن ابن عمر کی طریق سے ایک مرتبہ مرفوعاً اور ایک مرتبہ موقوفاً نقل کیا ہے۔
۳)حديث ام عبد الرحمن بن طارق رضی اللہ عنہا:
ترجمہ: حضرت عبدالرحمٰن بن طارق اپنی والدہ سے روایت کرتے ہیں، وہ کہتی ہیں کہ جناب رسول اللہ ﷺ جب یعلیٰ کے گھر کی جگہ سے آگے بڑھتے (اس جگہ کا نام عبیداللہ بھول گئے) تو بیت اللہ کی جانب رخ کرتے اور دعا مانگا کرتے تھے۔ (سنن ابی داؤد،حدیث نمبر: 2007)
تخریج الحدیث:
۱۔اس روایت کو امام ابوداؤدرحمہ اللہ (م275ھ)نے ’’سنن أبی داؤد‘‘(3/359،رقم الحديث:2007،ط:دارالرسالة العالمية)میں ذکر کیا ہے۔
۲۔امام عبدالرزاق بن ہمام رحمہ اللہ (م211ھ)نے ’’مصنف عبدالرزاق‘‘(4/432،رقم الحديث:9268،ط:دارالتأصيل) میں ذکر کیا ہے۔
۳۔امام احمدبن حنبل رحمہ اللہ (م241ھ)نے ’’مسندأحمد‘‘(27/130،رقم الحديث:16587،ط:مؤسسة الرسالة) میں ذکر کیا ہے۔
۴۔امام ابن أبی عاصم رحمہ اللہ (م287ھ)نے’’الآحاد والمثاني‘‘(6/87،رقم الحديث:3299،ط:دارالراية) میں ذکر کیا ہے۔
۵۔امام نسائی رحمہ اللہ (م303ھ)نے’’سنن الصغری‘‘(5/213،رقم الحديث:2896،ط: مكتب المطبوعات الإسلامية)اور ’’السنن الكبرى‘‘(4/108،رقم الحديث:3865،ط:مؤسسة الرسالة) میں ذکر کیا ہے۔
۶۔امام طبرانی رحمہ اللہ (م360ھ)نے ’’المعجم الكبير‘‘(8 / 323،رقم الحديث: 8213،ط:مكتبة ابن تيمية) میں ذکر کیا ہے۔
۷۔حافظ أبونعیم اصفہانی رحمہ اللہ(م430ھ) نے ’’معرفة الصحابة‘‘(6/3532،رقم الحديث:7986،ط:دارالوطن) میں ذکر کیا ہے۔
مذکورہ روایت کی اسنادی حیثیت :
اس روایت پر امام ابو داود رحمہ اللہ نے سکوت اختیار فرمایا، نیز حافظ منذرى رحمہ اللہ نے بھى ’’مختصر سنن ابى داود‘‘ میں اس روایت پر سکوت فرمایا ہے۔
علامہ ہیثمی (م807ھ)فرماتے ہیں :’’اس روایت کے راوی ’’عبدالرحمن بن طارق‘‘ کے بارے میں جرح و توثیق کوئی تفصیل نہیں ملی اور اس روایت کے باقی راوى صحیح حدیث کے راویوں کى طرح ہیں۔
تشریح:
الدرالمنضود(3/297) میں اس حدیث کی تشریح میں ہےکہ آپ راستہ میں اس مقام پر پہنچ کر ٹھہر کر کیوں دعا مانگتے تھے ،اس کی طرف امام نسائی نے ایک ترجمتہ الباب کے ذریعہ اشارہ فرمایا ہے وہ یہ کہ اس جگہ سے بیت اللہ شریف نظر آتا ہے اس لئے آپ اس کو دیکھ کر وہاں دعا مانگتے تھے۔ کذا قال السندی فی حاشیہ فجزاہ.
۴)حدیث حضرت ابوامامہ صدی بن عجلان الباھلی رضی اللہ عنہ:
حضرت ابو امامہ باہلی رضی اللہ عنہ سے روایت ہے کہ جناب رسول اللہ ﷺ نے فرمایا: ’’آسمان کے دروازے کھول دیےجاتے ہیں اور چار مقامات میں دعا قبول ہوتی ہے: جب صفیں اللہ کی راہ میں (جنگ کے لیے) مل کر کھڑی ہوں، بارش برستے وقت، نماز قائم ہوتے وقت اور دیدارِ کعبہ کے وقت‘‘۔ (المعجم الکبیر ،حدیث نمبر:7713)
تخریج الحدیث:
۱۔اس روایت کو امام طبرانی رحمہ اللہ(م360ھ) نے ’’المعجم الکبیر‘‘(8/169،رقم الحديث:7713،ط:مكتبة ابن تيمية) میں ذکر کیا ہے۔
۲۔ امام بیہقی رحمہ اللہ (م458ھ)نے’’السنن الکبری‘‘(3/502،رقم الحديث:6460،ط:دارالكتب العلمية)میں ذکرکیا ہے۔
مذکورہ روایت کی اسنادی حیثیت :
علامہ ہیثمی رحمہ اللہ اس روایت کے بارے میں فرماتے ہیں کہ ’’ اس روایت کو امام طبرانی نے روایت کیا ہے،اور اس میں راوی ’’ عفير بن معدان‘‘ کے ضعف پر اتفاق ہے۔
حافظ ابن حجرعسقلانی رحمہ اللہ (م852ھ) نے ’’نتائج الأفکار‘‘(1/383)میں لکھا ہے کہ ’’محدثین کی اصطلاح میں یہ حدیث ’’غریب‘‘ ہے ،امام بیہقی نے اسی سند کے ساتھ ’’ الهيثم بن خارجة، عن الوليد بن مسلم ‘‘ سے نقل کیا ہے اور ہمارے پاس اس کی عالی سند موجود ہے ،اور امام بیہقی نے سنن میں بوجہ عفیر بن معدان کے ضعیف ہونے کے اس روایت کے ضعف کی طرف اشارہ کیا ہے اور اس حدیث کا شاہد بھی موجود ہے۔
حافظ ابن حجرعسقلانی رحمہ اللہ نے ’’نتائج الأفکار‘‘ (5/257)میں حضرت ابن عباس رضی اللہ عنہما سے مروی روایت ’’ ترفع الأيدي إذا رأيت البيت وعلى الصفا وعلى المروة وبعرفة وبجمع وعند رمي الجمرة وإذا أقيمت الصلاة. ‘‘ کو بطور شاہد ذکرکرکے اس کو ’’شرط حسن ‘‘پر قرارد یا ہے،گویا اس طرح سے حافظ ابن حجرعسقلانی رحمہ اللہ حدیث ِ ابوامامہ کےضعف کی تلافی کرنا چاہ رہے ہیں، واللہ اعلم بالصواب۔
۵)حدیث حذیفۃ بن اسید ابو سریحۃ الغفاری رضی اللہ عنہ:
حضرت حذیفہ بن اسید ابوسریحہ غفاری رضی اللہ عنہ سے مروی ہے کہ جناب رسول اللہ ﷺ جب بیت اللہ کی طرف دیکھتے تو فرماتے :’’اللهم زد بيتك هذا تشريفا، وتعظيما، وتكريما، وبرا، ومهابة، وزد من شرفه، وعظمه ممن حجه أو اعتمره تعظيما، وتشريفا، وتكريما، وبرا، ومهابة‘‘ (اے اللہ! اس گھر کی تعظیم وتکریم ، اس کے شرف كو زياده فرما اور اس کے زائرین کی تعداد میں اضافہ فرما اور اس کی ہیبت کو زیادہ کردیجیے اور جو شخص اس کا حج و عمرہ کرے اس کی تعظیم و تکریم اور شرف و ثواب زیادہ کردیجیے۔) (المعجم الأوسط ،حدیث نمبر: 6132)
تخریج الحدیث:
اس روایت کو امام طبرانی رحمہ اللہ(م360ھ) نے ’’المعجم الکبیر‘‘(3/181،رقم الحديث:3053،ط:مكتبة ابن تيمية) ، ’’المعجم الأوسط‘‘(6/183،رقم الحديث:6132،ط:مكتبة الحرمين) اور’’الدعاء‘‘(2/119،رقم الحديث:854،ط:دارالبشائر الإسلامية) میں ذکر کیا ہے۔
مذکورہ روایت کی اسنادی حیثیت :
علامہ ہیثمی فرماتے ہیں :اس روایت کو امام طبرانی نے ’’المعجم الأوسط ‘‘میں نقل کیا ہےاور اس کی سند میں’’عاصم بن سلیمان الکوزی ‘‘ہیں جوکہ متروک ہیں ۔
۶)حدیث عبد اللہ بن عباس رضی اللہ عنہما:
حضرت ابن عباس رضی اللہ عنہما سے روایت ہے کہ جناب رسول اللہ ﷺ اپنی اونٹنی قصوا ء پر سوار ہوکر دن کے وقت’’کدی‘‘(جگہ کا نام ) کی طرف سے ابطح میں مکہ میں داخل ہوئے یہاں تک مکہ کے بالائی طرف سے باب بنی شیبہ کے پاس پہنچے ،تو جب آپ ﷺ نے مکہ کو دیکھا تو ہاتھ اٹھائے تو اونٹنی کی لگام گر گئی تو اسے بائیں سے پکڑ لیا ،پھر جب آپ نے بیت اللہ کو دیکھا تو یہ دعا پڑھی ’’اللهم زد هذا البيت تشريفا وتعظيما وتكريما ومهابة وبرا‘‘. (اے اللہ! اس گھر کے شرف ،اس کی تعظیم وتکریم اور اس کی ہیبت کو زیادہ کردیجیےاور اس کے زائرین کی تعداد میں اضافہ فرما دیجیے۔) (مغازی للواقدی :(3/1097،ط:عالم الكتب)
تخریج الحدیث:
اس روایت کو امام واقدی (م207ھ) نے (مغازی للواقدی :(3/1097،ط:عالم الكتب) میں نقل کیا ہے۔
مذکورہ روایت کی اسنادی حیثیت :
امام واقدی(م207ھ) محدثین کرام کی نظر میں ’’متکلم فیہ ‘‘ہیں اور خاص طور پراحکام میں ا ن کی روایات کو معتبر نہیں مانا گیا ہے، نیز اس روایت میں ان کے شیخ’’ابن ابی سَبْرہ‘‘ کے بارے میں حافظ ابن حجرعسقلانی رحمہ اللہ لکھتے ہیں:محدثین کرام نے ان پر وضع(احادیث گھڑنے کا الزام )لگایا ہے۔
۷)حدیث ابن جریج رحمہ اللہ:
حضرت ابن جریج سے مرسلاً روایت ہے کہ جناب رسول اللہﷺ جب بیت اللہ کو دیکھتے تو دعا کے لیے ہاتھ اٹھاتے اور فرماتے’’اللهم زد هذا البيت تشريفا وتعظيما وتكريما ومهابة، وزد من شرفه وكرمه ممن حجه واعتمره تشريفا وتكريما وتعظيما وبرا ‘‘( اے اللہ! اس گھر کے شرف، اس کی تعظیم وتکریم اور ہیبت کو زیادہ کردیجیے اور جو شخص اس کا حج و عمرہ کرے اس کی تعظیم و تکریم اور شرف و ثواب زیادہ کردیجیے۔)(كتاب الام ،2/250)
تخريج الحديث:
۱۔ اس روایت کو امام شافعی رحمہ اللہ(م204ھ)نے’’ كتاب الأم ‘‘(2/250،ط:دارالمعرفة) میں ذکرکیا ہے۔
۲۔ ا مام بیہقی رحمہ اللہ (م458ھ)نے’’السنن الکبری‘‘(5/118،رقم الحديث:9213،ط:دارالكتب العلمية) میں ذکرکیا ہے۔
مذکورہ روایت کی اسنادی حیثیت :
ا مام بیہقی نے’’السنن الکبری‘‘ اس روایت کو ذکر کرنے بعد فرماتے ہیں:’’یہ روایت منقطع ہے اور سفیان ثوری اور مکحول شامی رحمہما اللہ سے مرسلاً مروی روایات اس کا شاہد ہیں ۔‘‘ اور اس کے بعد مکحول رحمہ اللہ کی روایت بطور شاہد ذکر کی ہے۔
علامہ ابن ملقن رحمہ اللہ(م804ھ)فرماتے ہیں :علامہ ابن الصلاح اور امام نووی رحمہااللہ فرماتے ہیں :یہ حدیث مرسل معضل ہے۔
علامہ ابن حجرعسقلانی ’’نتائج الأفكار‘‘ میں لکھتے ہیں: ابن جريج کی روایت کا جید متابع موجود ہے جس کو ’’سعید بن منصور‘‘نے اپنی’’سنن‘‘ میں نقل کیا ہے کہ برد بن سنان سے مروی ہے کہ میں نے عباد بن قسامہ کو یہ کہتے ہوئے سنا کہ جب تم بیت اللہ کو دیکھو تو کہو ’’اللھم زد بیتک ھذا۔۔۔الخ اور برد بن سنان کی روایت سند کے اعتبار سے حسن ہے جس سے ابن جریج کی روایت کو تقویت مل جاتی ہے۔
امام شافعی (م204ھ) نے ’’کتاب الأمّ‘‘میں اس روایت کو ذکرکرنے کے بعد فرمایا:لہذا میں اس بات کو مستحب سمجھتا ہوں کہ جب انسان بیت اللہ کو دیکھے تو وہ الفاظ کہے جو میں نے نقل کیے ہیں ۔اور جو کوئی اچھے کلمات کہے تو اس کے لیے ان شاء اللہ کافی ہے۔
ا مام بیہقی نے’’معرفة السنن والآثار ‘‘ میں امام شافعی (م204ھ) کا یہ قول ابو سعید کی کتاب الاملاء سے نقل کیا ہے کہ’’ بیت اللہ کو کچھ کر ہاتھ اٹھانے میں نہ کوئی ایسی بات ہے جسے میں مکروہ کہوں، اور نہ میں اسے مستحب کہتا ہوں ، البتہ وہ میرے نزدیک اچھی بات ہے‘‘ ۔

۸)حدیث مکحول الشامی رحمہ اللہ:
حضرت مکحول شامی رحمہ اللہ سے مرسلاً مروی ہے کہ جب جناب رسول اللہ ﷺ مکہ میں داخل ہوتے اور کعبہ پر نظر پڑتی تو دعا کے لیے ہاتھ اٹھاتے، تکبیرکہتے اور فرماتے’’ اللهم أنت السلام ومنك السلام فحينا ربنا بالسلام ، اللهم زد هذا البيت تشريفا وتعظيما وتكريما ومهابة وزد من حجه أو اعتمره تكريما وتشريفا وتعظيما وبرا ‘‘ (اے اللہ! تو ہی سلامتی دینے والا ہے اور سلامتی تیری ہی طرف سے ہے،لہذاہم کو سلامتی کے ساتھ زندہ رکھ اور اے اللہ ! اس گھر کے شرف، اس کی تعظیم وتکریم اور رعب و ہیبت میں مزید اضافہ کردیجیے اور جو شخص اس کا حج و عمرہ کرے اس کی تعظیم و تکریم اور شرف و ثواب کو زیادہ کردیجیے)۔( السنن الکبری ،حديث نمبر: 9213)
تخریج الحدیث :
۱۔ا مام بیہقی رحمہ اللہ (م458ھ) نے’’السنن الکبری‘‘(5/118،رقم الحديث:9213،ط:دارالكتب العلمية) میں ذکرکیا ہے۔
۲۔امام ابن ابی شیبہ رحمہ اللہ(م235ھ)نے الفاظ کے کچھ فرق کے ساتھ ’’مصنف ابن أبی شیبہ‘‘(8/765،رقم الحديث:15999 )(15/317،رقم الحديث:30240،ط:دارالقبلة)میں ذکرکیا ہے۔
۳۔امام ازرقی رحمہ اللہ (م250ھ)نے ’’أخبار مکة‘‘(1/279،ط:دارالأندلس للنشر) میں ذکرکیا ہے۔
مذکورہ روایت کی اسنادی حیثیت :
حافظ ابن حجرعسقلانی رحمہ اللہ فرماتے ہیں:اس روایت میں’’أبو سعيد محمد بن سعيد المصلوب ‘‘ہیں جو کہ ’’كذاب‘‘(جھوٹے)ہیں ۔
۹)حديث طاوس بن کیسان رحمہ اللہ:
طاوس بن کیسان رحمہ اللہ سے مرسلاًمروی ہے کہ جناب رسول اللہ ﷺ جب بیت اللہ کو دیکھا تو دعا کے لیے ہاتھ اٹھائے تو آپ کی اونٹنی کی لگام گر گئی تو اس کو بائیں ہاتھ سے پکڑ لیا اور دایاں ہاتھ دعا کے لیے اٹھادیا۔( معرفة السنن والآثار للبیھقی ،حدیث نمبر: 9809)

تخریج الحدیث:
۱۔ا مام بیہقی رحمہ اللہ (م458ھ) نے’’معرفة السنن والآثار ‘‘(7/201،رقم الحديث:9809،ط: جامعة الدراسات الإسلامية،كراتشي) میں ذکرکیا ہے۔
واضح رہے کہ مرسل روایات حنفیہ کے نزدیک حجت اور قابل ِ استدال ہیں ،کیونکہ یہ بات معروف ہے کہ حنفیہ کے نزدیک قرونِ ثلاثہ میں انقطاع صحتِ حدیث کے لیے مضر نہیں ہے۔(تفصیل کے لیے قواعد فی علوم الحدیث للعلامة ظفر احمد العثمانی،ص۱۳۵ ملاحظہ فرمائیں ) لہذا یہ مرسل روایات حنفیہ کے ہاں قابل ِ استدلال ہیں ،بالخصوص اس لیے بھی کہ اس کی تائید حضرت عمر رضی اللہ عنہ اور حضرت سعید بن المسیب رحمہ اللہ کے عمل سے بھی ہو رہی ہے۔
حضرت عمر بن الخطاب رضی اللہ عنہ کا عمل:
حضرت سعید بن المسیب رحمہ اللہ سے مروی ہے کہ میں حضرت عمر رضی اللہ عنہ سے ایسی بات سنی ہے کہ لوگوں میں سے میرے علاوہ کوئی بھی باقی نہیں ہے جس یہ بات سنی ہوکہ حضرت عمر رضی اللہ عنہ جب بیت اللہ کو دیکھتے تو یہ دعا پڑھتے:’’ اللهم أنت السلام ومنك السلام فحينا ربنا بالسلام ‘‘(اے اللہ! تو ہی سلامتی دینے والا ہے اور سلامتی تیری ہی طرف سے ہے،لہذاہم کو سلامتی کے ساتھ زندہ رکھ ۔) (السنن الکبری للبیھقی،حدیث نمبر: 9216)
تخریج الحدیث:
۱۔ا مام بیہقی رحمہ اللہ (م458ھ) نے’’السنن الکبری‘‘(5/118،رقم الحديث:9216،ط:دارالكتب العلمية) میں ذکرکیا ہے۔
۲۔ امام ابن ابی شیبہ رحمہ اللہ (م235ھ)نے’’مصنف ابن أبی شیبہ‘‘(8/766،رقم الحديث:16000 )(15/318،رقم الحديث:30243،ط:دارالقبلة)میں ذکرکیا ہے۔
۳۔ امام ازرقی رحمہ اللہ (م250ھ)نے ’’أخبار مکة‘‘(1/278،ط:دارالأندلس للنشر) میں ذکرکیا ہے۔
۴۔ حافظ حسین بن اسماعیل محاملی رحمہ اللہ (م330ھ) نے ’’أمالي ص295، رقم الحديث:308،ط:المكتبة الإسلامية) میں ذکرکیا ہے۔
مذکورہ روایت کی اسنادی حیثیت :
حافظ ابن حجرعسقلانی رحمہ اللہ نے ’’نتائج الأفكار‘‘(5/261) میں اس روایت کو موقوف غریب فرمایا ہے،لیکن علامہ عراقی (م806ھ)فرماتے ہیں :محب الطبری نے کہا ہے کہ حدیث ابن المسیب عن عمر صحیح ہے،اس کو حفاظ حدیث نے ’’صحیح ‘‘قراردیا ہے۔
ان تمام روایات کے مجموعہ سے یہ بات ثابت ہوتی ہے کہ بیت اللہ پر پہلی نظر پڑنے کے وقت ہاتھ اٹھا کر دعا کرنا مستحب ہے۔حضرت ابن عباس رضی اللہ عنہما،حضرت عمر رضی اللہ عنہ، حضرت ابن عمر رضی اللہ عنہ اور سعید ابن المسیب کے اثار سے بھی ثابت ہے کہ وہ کعبہ کو دیکھ کر دعا کیا کرتے تھے،ان میں اکثر روایات سنداً اگرچہ کمزور ہیں لیکن مجموعی اعتبار سے یہ آثار مل کر حضرت ابن عباس رضی اللہ عنہما سے مروی روایت کو مؤکد(مضبوط) کرتے ہیں۔
محب الدین الطبری رحمہ اللہ اس سلسلے کى تمام روایات وآثار کو نقل کركے فرماتے ہیں :یہ تمام آثار اگرچہ بعض مرسل اور بعض موقوف ہیں ،یہ سب مل کر متصل روایت کو مؤکد(مضبوط) کرتے ہیں ۔
امام بغوی فرماتے ہیں :یہی بات (بیت اللہ کو دیکھ کر دعا کرنا) ابن عمر اورابن عباس سے مروی ہے اور یہی سفیان ثوری،احمد ،ابن مبارک اور اسحاق بن راہویہ کا مسلک ہے۔
فقہاء امت کے اقوال:
1) امام سرخسی (م483ھ)نے حضرت جابر رضی اللہ عنہ سے روایت نقل کی ہے کہ جناب رسول اللہ ﷺ مکہ تشریف لائے ،مسجدحرام میں داخل ہوئے تو جب آپ ﷺ کی نظر بیت اللہ پڑی تو آپ نے یہ دعا پڑھی: اللهم زد بيتك تشريفا وتعظيما وتكريما وبرا ومهابة۔
اسی طرح ابن عمر رضی اللہ عنہ کے بارے میں نقل کرتے ہیں کہ جب وہ بیت اللہ کو دیکھتے تو ’’ بسم الله والله أكبر. ‘‘ کہتے۔
حضرت عطا ء سے روایت نقل کرتے ہیں کہ جناب رسول اللہ ﷺ جب وہ بیت اللہ کو دیکھتے تو دعا پڑھتے:’’ أعوذ برب البيت من الدين والفقر ومن ضيق الصدر وعذاب القبر.‘‘
امام سرخسی فرماتے ہیں:کتاب(کافی للحاکم ) نے حج کی دعاؤں میں کسی خاص دعا کی تعین نہیں کی ہے کیونکہ امام محمد کا نظریہ ہے کہ مخصوص دعاؤں کی تعیین کی وجہ سے رقتِ قلب جاتی رہتی ہے، لہذا اس موقع پر جو دعائیں یادآئیں وہ مانگ لی جائیں ،البتہ تبرک کے طور رسول اللہ ﷺ سے منقول الفاظ پڑھنا بہتر ہے۔
غنیۃ الناسک میں مولانا محمد حسن شاہ (م1346ھ)نے لکھا ہے کہ محققین احناف جیسے كرمانی ،بصروی، ،و ابن الهمام اور ملا علی قاری رحمہم اللہ بیت اللہ پر پہلی نظر پڑنے کے وقت دعا مانگنے کومستحب کہتے ہیں ۔
2)شیخ ابوبکر کشناوی مالکی (م1397 ھ)’’ إرشاد السالك في مذهب مالك‘‘ کی شرح میں لکھتے ہیں کہ حاصل یہ ہے کہ بیت اللہ کو دیکھ کر اللہ اکبر کہنا اور دعا کرنا مستحب ہے کیونکہ بیت اللہ کو دیکھتے ہوئے دعا کرنا مستجاب ہے ۔
3)امام نووی (م676ھ) ’’المجموع شرح المهذب‘‘ میں لکھتے ہیں کہ بیت اللہ کو دیکھ کر دعا کرنا مستحب ہے اور یہی امام شافعی کا مذہب ہے اور اس کی صراحت مھذب کے مصنف ابواسحاق شیرازی ،ابوحامد غزالی، أبو علي البندنيجی،دارمی،ماوردی ،ابوالطیب،محاملی ،قاضی حسین ،متولی ،امام بغوی اور صاحب ِ عدہ نے کی ہے۔
4)علامہ ابن قدامہ حنبلی (م620ھ) نے بھی اس کو مستحب کہا ہے۔
خلاصہ بحث:مذکورہ بالا روایات وآثار،ائمہ کرام کے اقوال سے یہ ثابت ہوا کہ بیت اللہ شریف پر پہلی نظر پڑنےکے وقت دعا کرنا مستحب ہے۔