سوال: مفتی صاحب! شبِ معراج کا واقعہ کس تاریخ کو پیش آیا، نیز کیا ہر سال آنے والی شب معراج کی کوئی فضیلت یا مخصوص عبادت شریعت میں ثابت ہے؟

جواب: واضح رہے کہ جناب رسول اللہ ﷺ کا " اسراء اورسفرِمعراج " برحق ہے اوراس واقعے کی تفصیل تقریباً پنتالیس صحابہ کرامؓ سے منقول ہے، اس لئے اس کے انکار کی قطعاً کوئی گنجائش نہیں ہے۔
اب یہاں دو سوال پیدا ہوتے ہیں :( ۱) اس رات کی امت کےحق میں کیا فضیلت ہے؟(۲) یہ کونسی رات ہے؟
پہلے سوال کا جواب یہ ہے کہ قرآن اور حدیث سے یہ بات ثابت ہے کہ آپ ﷺ کا سفرِ معراج آپ ﷺ کا بہت بڑا اعزاز اور شرف تھا، لیکن امت کے حق میں اس بارے میں قرآن اور حدیث سے کسی قسم کی کوئی فضیلت ثابت نہیں ہے۔شیخ الاسلام علامہ ابن تیمیہؒ سے پوچھا گیا کہ شبِ قدر اور شبِ معراج ان دونوں راتوں میں سے کون سی رات افضل ہے؟ تو انہوں نے جواب دیا کہ نبی اکرم ﷺ کے حق میں لیلة المعراج افضل ہے اور امت کے حق میں لیلة القدر ، اس لیے کہ اِس رات میں جن انعامات سے نبی اکرم ﷺ کو مختص کیا گیا، وہ ان (انعامات ) سے کہیں بڑھ کے ہیں جو (انعامات آپ ﷺ کو) شبِ قدر میں نصیب ہوئے،اور امت کو جو حصہ (انعامات)شبِ قدر میں نصیب ہوا، وہ اس سے کامل ہے جو(امت کو شبِ معراج میں ) حاصل ہوا ، اگرچہ امتیوں کے لیے شبِ معراج میں بھی بہت بڑا اعزاز ہے، لیکن اصل فضل اور شرف اُس ہستی کے لیے ہے جِس کو معراج کروائی گئی۔
دوسرے سوال کا جواب یہ ہے کہ آپ ﷺ کے سفرِ معراج کے سال،مہینے اور تاریخ کے بارے میں بھی بہت زیادہ اختلاف پایا جاتا ہے۔
معراج کے سال کےبارے میں عموماً دس اقوال ملتے ہیں:(۱)معراج ہجرت سے ایک سال قبل کروائی گئی۔(٢)معراج ہجرت سے آٹھ ماہ قبل ہوئی۔ (۳)ہجرت سے چھ ماہ قبل ہوئی۔(۴) ہجرت سے گیارہ ماہ قبل ہوئی۔(۵)ہجرت سے ایک سال اور دو ماہ قبل کی ہے۔(۶)ہجرت سے ایک سال اور تین ماہ قبل کی ہے ۔(۷)ہجرت سے ایک سال اور پانچ ماہ قبل کا قول نقل کیا ہے۔ (۸) ہجرت سے تین سال قبل کا قول اختیار کیا ہے۔ (۹)واقعہ معراج ہجرت سے پانچ سال قبل پیش آیا۔ (۱۰) ایک قول بعثت سے پہلے وقوعِ معراج کا بھی ہے، لیکن یہ قول شاذ ہے، اس کو تسلیم نہیں کیا گیا۔
مشہور سیرت نگار سید فضل الرحمن صاحب لکھتے ہیں کہ معراج نبوی سن دس نبوی کے بعد سن گیارہ نبوی میں طائف کے سفر سے واپسی کے بعد کسی مہینے میں ہوئی۔
اسی طرح مہینے کی تعیین میں بھی اختلاف ہے کہ واقعہِ معراج کس مہینے میں پیش آیا، ربیع الاول ، ربیع الاخر، رجب، رمضان یا شوال ، یہ پانچ اقوال ملتے ہیں۔
اسی طرح شبِ معراج کس روز اور کس تاریخ میں ہوئی؟دن کے بارے میں جمعہ ، ہفتہ اور پیرکے تین اقوال مشہور ہیں (سُبُل الہدیٰ والرشاد: 65/3،دارالکتب العلمیہ )
تاریخ کے بارے میں سترہ ربیع الاول ،ستائیس ربیع الاول ، انتیس رمضان اور ستائیس ربیع الثانی کے اقوال ہیں ، علامہ ابن کثیر ؒ تمام اقوال ذکر کرنے کے بعد فرماتے ہیں کہ بعض احادیث میں جن کی سند صحیح نہیں ،یہ بھی وارد ہے کہ" اسرا" ستائیس رجب کو ہوئی۔
علماء ِسیر نے خوب تحقیق کے بعد اُن صحابہ کی تعداد اور نام لکھے ہیں ،جنہوں نے قصہٴ معراج کو نقل کیا،کسی نے مختصر اور کسی نے تفصیل سے، چنانچہ علامہ زرقانی نے پینتالیس صحابہ کرام کے نام ذکر کئے ہیں،غرض یہ کہ کوئی قول کسی دلیل پر مبنی نہیں ہے، سب محض اندازے ہیں۔
اس ساری تفصیل کے بعد قابلِ غور بات یہ ہے کہ اس قصے کی تفصیل بیان کرنے والے اصحاب ِ رسول کی اتنی بڑی تعداد ہے اور اس کے باوجود جس رات میں یہ واقعہ پیش آیا ، نہ تو کسی صحابی نے اس رات کو کسی مخصوص عبادت کے لیے متعین کیا اور نہ ہی زبانِ نبوت سے اس بارے میں کوئی ارشاد صادر ہوا ،اور نہ ہی اس رات کی اس طرح سے تعظیم کسی صحابیِ رسول کے ذہن میں پیدا ہوئی،حتی کہ اس رات کی حتمی تاریخ بھی کسی نے بھی نقل نہیں کی، آخر اس شب سے اس قدر بے توجہی کی وجہ کیا ہے؟
اس کی وجہ یہ ہے کہ اس رات یا دن سے متعلق کوئی حکم شرعی اور کسی قسم کی کوئی عبادت ثابت نہیں ہے، اس لئے نہ تو حضوراکرم ﷺ نے از خود اس کی طرف اشارہ کیا اور نہ ہی صحابہ کرامؓ میں سے کسی نے اس کے بارے میں سوال کرنے کی ضرورت سمجھی، بلکہ اس کی تعیین کو ایک طرح سے لغو قرار دے کر اس بارے میں خاموشی اختیار کی۔
مذکورہ تفصیل سے ثابت ہوا کہ اگر شب معراج بھی شبِ قدر کی طرح کوئی مخصوص عبادت کی رات ہوتی اور اس کے بارے میں بھی شب قدر کی طرح کوئی خاص احکام اور فضائل ثابت ہوتے تو شریعت میں اس کی تاریخ اور مہینہ کو بھی محفوظ رکھنے کا اہتمام ضرور کیا جاتا۔
چونکہ شب معراج کی تاریخ محفوظ نہیں ہے، لہذا یقینی طور سے ستائیس رجب کو شبِ معراج قرار دینا درست نہیں ہے اور اگر یہ تسلیم بھی کر لیا جائے کہ آپ ﷺ ستائیس رجب کو ہی معراج کے لیے تشریف لے گئے تھے تو یہ فضیلت صرف اسی رات کو حاصل ہوگی، جس میں یہ معراج کا واقعہ پیش آیا تھا، لہذا کسی مسلمان کو اس کی فضیلت میں کوئی شبہ بھی نہیں ہونا چاہیے، البتہ ہر سال ستائیس رجب کو عبادت کرنے کی قرآن و حدیث میں کوئی فضیلت ثابت نہیں ہے، لہذا ہر سال اس رات میں مخصوص عبادات اور دن میں روزے کا اہتمام و التزام کرنا یا اس کو دین کا حصہ اور سنت قرار دینا بدعت کے زمرے میں آئے گا۔