سوال: مفتی صاحب ! اگر کوئی شخص سلام کرے، اور سلام سننے والا سلام کا جواب نہ دے، تو اس بارے میں کیا شرعی حکم ہے؟

جواب: ارشاد باری تعالیٰ ہے:
اِذَا حُیِّیْتُمْ بِتَحِیَّةٍ فَحَیُّوْا بِاَحْسَنَ مِنْهَاۤ اَوْ رُدُّوْهَاؕ-اِنَّ اللّٰهَ كَانَ عَلٰى كُلِّ شَیْءٍ حَسِیْبًا۔
ترجمہ: "اور جب تم کو کوئی سلام کرے، تو تم(جواب میں) اس سے اچھے الفاظ میں سلام کرو، یا ویسے ہی الفاظ کہہ دو، بلاشبہ اللہ تعالیٰ ہر چیز پر حساب لیں گے"۔
(سورۃ النساء، رقم الآیۃ:86)
مسلمان کے سلام کا جواب دینا واجب ہے، بلاوجہ جواب نہ دینے والا گناہگار ہوگا۔
البتہ کچھ مخصوص اعمال میں مصروف لوگوں پر سلام کا جواب دینا واجب نہیں، جیسے :
1۔نمازپڑھنے والا۔
2۔تلاوت کرنے والا۔
3۔حدیث، فقہ وغیرہ کا درس دینے والا۔
4۔ذکر و اذکار میں مشغول شخص۔
5۔اذان دینے والا۔
6۔اقامت کہنے والا۔
7۔خطیب جب خطبہ دے رہا ہو۔
8۔اذان، اقامت اور خطبات کے دوران۔
9۔کھانے میں مصروف شخص۔
10۔ قضاء حاجت میں مشغول آدمی۔
11۔جماع میں مشغول فرد۔
12۔جس آدمی کا ستر کھلا ہو۔
13۔ وضو میں مصروف شخص۔
مندرجہ بالا صورتوں میں سلام کا جواب دینا واجب نہیں ہے، البتہ ان میں سے بعض صورتوں میں عمل موقوف کرکے جواب دیا جا سکتا ہے، اور بعض صورتوں میں جواب کی بالکل بھی گنجائش نہیں ہے۔