سوال: اللہ تعالی کی طرف سے انسان پر جو مشکلات اور تکالیف آتی ہیں، کیا یہ اللہ تعالی کی طرف سے آزمائش ہوتی ہیں یا سزا ہوتی ہیں؟

جواب: انسان کوجتنی پریشانیاں دنیا میں پیش آتی ہیں، وہ دوقسم کی ہوتی ہیں:
۱) پہلی قسم کی پریشانیاں وہ ہیں جو دراصل اللہ تعالیٰ کی طرف سے قہر اور  گناہوں کی وجہ سےعذاب ہوتا ہے۔ واضح رہے کہ گناہوں کی اصل سزا تو انسان کے لیے  آخرت میں رکھی گئی ہے، لیکن بعض اوقات اللہ تعالیٰ انسان کو دنیا میں بھی عذاب کا مزہ چکھادیتے ہیں، جیسے قرآن کریم میں ارشاد باری تعالی ہے:وَلَنُذِیْقَنَّہُمْ مِّنَ الْعَذَابِ الْاَدْنٰی دُوْنَ الْعَذَابِ الْاَکْبَرِ لَعَلَّہُمْ یَرْجِعُوْنَ(سورۂ الٓم سجدہ: پ ۲۱)
ترجمہ: آخرت میں جو بڑا عذاب آنے والا ہے ہم اس سے پہلے دنیامیں بھی تھوڑا سا عذاب چکھا دیتے ہیں تاکہ یہ لوگ اپنی بداعمالیوں سے باز آجائیں ۔
۲) دوسری قسم کی پریشانیاں وہ ہوتی ہیں جن کے ذریعہ بندے کے درجات بلند کیے جاتے ہیں۔
اب سوال یہ پیدا ہوتا ہے کہ ان دونوں میں فرق کیسے کریں گے؟ علماء کرام نے قرآن وحدیث کی روشنی میں اس کی چند علامات بیان کی ہیں ، جن سے آزمائش اور عذاب میں فرق واضح ہو جاتا ہے۔
پہلا فرق:
اگر انسان ان تکالیف میں مبتلاء ہونے کے بعد اللہ تعالیٰ کی طرف رجوع کرنا چھوڑدے اور اس تکلیف کے نتیجے میں وہ اللہ تعالیٰ کی تقدیرکا شکوہ کرنے لگے یا اللہ تعالیٰ کی طرف سے دیئے ہوئے احکامات چھوڑدے اور اللہ تعالی سے مزید دور ہو جائے تو یہ اس بات کی علامات ہیں کہ جو تکلیف اس پر آئی ہے، یہ اللہ تعالیٰ کی طرف سے اس انسان پر قہر، عذاب اور سزا ہے۔
اور اگر انسان تکالیف آنے پر اللہ تعالیٰ کی طرف رجوع کر رہا ہو اور دعا کر رہا ہو کہ یا اللہ ! میں کمزور ہوں ، اس تکلیف کو برداشت نہیں کرسکتا وغیرہ تو یہ اس بات کی علامت ہے کہ یہ تکلیف اللہ تعالیٰ کی طرف سے آزمائش ہے جو اس کے لئے اجر و ثواب کا باعث ہے، یعنی عذاب اور آزمائش میں بس اتنا فرق ہے کہ آزمائش میں سجدے طویل ہو جاتے ہیں اور عذاب میں گناہ۔
دوسرافرق:
اگر پریشانیاں بدکاریوں اور بد اعمالیوں کی وجہ سے ہوں تو یہ اللہ تعالیٰ کی طرف سے سزا اور عذاب کی ایک شکل ہے، اوراگر پریشانیاں اللہ تعالیٰ کی فرمانبرداری کے نتیجہ میں ہوں، جیسےکسی سنت رسول ﷺ پر عمل کرنےکی وجہ سے پریشانیوں کا سامنا کرنا پڑے تو اس طرح کی پریشانیاں اللہ تعالیٰ کی طرف سے آزمائش ہوتی ہیں۔
انسان کو ہر پریشانی پر اپنے کردار کا محاسبہ کرنا چاہیے، کیونکہ انسان کو جو مصیبت پہنچتی ہے اس کے پیچھے اس کا کوئی عمل کارفرما ہوتا ہے اور جو نعمت ملتی ہے یہ محض اللہ تعالیٰ کا فضل ہوتا ہے۔
اللہ تعالی کا ارشاد ہے:مَا أَصَابَكَ مِنْ حَسَنَةٍ فَمِنَ اللَّهِ وَمَا أَصَابَكَ مِنْ سَيِّئَةٍ فَمِنْ نَفْسِكَ (سورة النساء :79) ترجمہ: تمہیں جو کوئی اچھائی پہنچتی ہے تو وہ محض اللہ کی طرف سے ہوتی ہے اور جو کوئی برائی پہنچتی ہے تو وہ تمہارے اپنے سبب سے ہوتی ہے۔