سوال: ایک صاحب اوابین کی چھ رکعت ایک ہی سلام کے ساتھ پڑھنے کا بتارہے ہیں، جس میں سے دو رکعتیں مغرب کی سنت موکدہ ہو جائینگی اور باقی چار رکعتیں اوابین کی ہو جائینگی، کیا اوابین پڑھنے کا یہ طریقہ درست ہے؟

جواب: واضح رہے کہ صحیح احادیث میں ہے کہ رسول اللہ صلی اللّٰہ علیہ وسلم نے چاشت کی نماز کو اوابین کی نماز فرمایا ہے، چنانچہ صحیح مسلم کی روایت ہے:
عَنْ أَيُّوبَ عَنْ الْقَاسِمِ الشَّيْبَانِيِّ أَنَّ زَيْدَ بْنَ أَرْقَمَ رَأَى قَوْمًا يُصَلُّونَ مِنْ الضُّحَى فَقَالَ أَمَا لَقَدْ عَلِمُوا أَنَّ الصَّلَاةَ فِي غَيْرِ هَذِهِ السَّاعَةِ أَفْضَلُ إِنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ: "صَلَاةُ الْأَوَّابِينَ حِينَ تَرْمَضُ الْفِصَالُ".
(الصحیح لمسلم: 1777)
ترجمہ:
حضرت زید بن ارقم رضی اللہ تعالیٰ عنہ نے کچھ لوگوں کو چاشت کے وقت نماز پڑھتے دیکھا تو فرمایا: ہاں یہ لوگ اچھی طرح جانتے ہیں کہ نماز اس وقت کی بجائے ایک اور وقت میں پڑھنا افضل ہے، بے شک رسول اللہ ﷺ نے فرمایا: "اوابین (اللہ تعالیٰ کی طرف رجوع کرنے والےلوگوں) کی نماز اس وقت ہوتی ہے، جب (گرمی سے) اونٹ کے بچوں کے پاؤں جلنے لگتے ہیں۔
لہذا فقہاءِ کرام فرماتے ہیں کہ چاشت کی نماز کا افضل وقت وہ ہے، جب سورج طلوع ہو کر ایک نیزہ تک بلند ہوجائے اور یہ وقت زوال تک رہتا ہے، لہذا اس وقت چاشت کی نماز ادا کرنا افضل ہے، اور یہ اوابین کی نماز کا وقت ہے۔
اور چاشت کی نماز کم از کم دو رکعت اور زیادہ سے زیادہ بارہ رکعتیں ہیں۔
حضرت عائشہ رضی اللہ عنہا کی روایت سے معلوم ہوتا ہے کہ آپ صلی اللّٰہ علیہ وسلم کا عام معمول چار رکعت نمازِ چاشت ادا کرنے کا تھا، اس لیے کم از کم چار رکعت نمازِ چاشت ادا کرنا چاہیے، اور آٹھ رکعتیں پڑھنا افضل ہے۔
نیز مغرب کے فرض اور سنتوں کے بعد جو چھ نوافل پڑھے جاتے ہیں، انہیں بھی "صلاۃ الاوابین" کہا جاتا ہے، ابن المبارک کی الزهد والرقائق میں حضرت محمد بن المنکدر رحمہ اللّٰہ کی مرسل روایت ہے:
1259 - أَخْبَرَنَا ابْنُ الْمُبَارَكِ قَالَ: حَدَّثَنِي حَيْوَةُ بْنُ شُرَيْحٍ قَالَ: حَدَّثَنِي أَبُو صَخْرٍ، أَنَّهُ سَمِعَ مُحَمَّدَ بْنَ الْمُنْكَدِرِ يُحَدِّثُ، أَنَّ النَّبِيَّ صَلَّى اللهُ عَلَيْهِ وَسَلَّمَ قَالَ: «مَنْ صَلَّى مَا بَيْنَ الْمَغْرِبِ إِلَى صَلَاةِ الْعِشَاءِ، فَإِنَّهَا صَلَاةُ الْأَوَّابِينَ» .
(الزهد والرقائق لابن المبارك: 1/ 445)
ترجمہ:
حضرت محمد بن المنکدر رحمہ اللّٰہ سے مرسلا روایت ہے کہ رسول اکرم صلی اللّٰہ علیہ وسلم نے ارشاد فرمایا: جس نے مغرب اور عشاء کے درمیان نفل نماز پڑھی، تو وہ نماز اوابین ہے۔ (یعنی اللہ تعالی کی طرف رجوع کرنے والوں کی نماز ہے)۔
اور مصنف ابن ابی شیبہ میں حضرت عبداللہ بن عمر رضی اللّٰہ عنہما کی موقوف حدیث ہے:
عَنْ عَبْدِاللّٰہِ بْنِ عُمَرَ رَضِیَ اللہُ عَنْہُ قَالَ صَلَاۃُ الْاَوَّابِیْنَ مَابَیْنَ اَنْ یَّنْکَفِتَ اَھْلُ الْمَغْرِبِ اِلٰی اَنْ یُّثَوَّبَ اِلَی الْعِشَائِ۔
(مصنف ابن ابی شیبۃ ج 4ص266،267)
ترجمہ:
حضرت عبد اللہ بن عمر رضی اللہ عنہ فرماتے ہیں کہ ’’صلوۃ الاوابین‘‘ کا وقت اس وقت سے ہے کہ جب نمازی نماز مغرب پڑھ کر فارغ ہوں اور یہ وقت عشاء کا وقت آنے تک رہتا ہے۔
امام بغوی رحمہ اللّٰہ کی شرح السنۃ میں حضرت عبداللہ بن عباس رضی اللّٰہ عنہما کی موقوف حدیث ہے:
عَنِ ابْنِ عَبَّاسٍ رَضِیَ اللہُ عَنْہُ قَالَ اِنَّ الْمَلَا ئِکَۃَ لَتَحُفُّ بِالَّذِیْنَ یُصَلُّوْنَ بَیْنَ الْمَغْرِبِ اِلَی الْعِشَائِ وَھِیَ صَلَاۃُ الْاَوَّابِیْنَ۔
(شرح السنۃ للبغوی ج 2ص439)
ترجمہ:
حضرت ابن عباس رضی اللہ عنہ سے مروی ہے کہ فرشتے ان لوگوں کو گھیر لیتے ہیں، جو مغرب اور عشاء کے درمیان نماز پڑھتے ہیں اور یہ’’صلوۃ الاوابین‘‘ ہے۔
ان نوافل کی تعداد کم از کم چھ اور زیادہ سے زیادہ بیس ہے۔
مفتی بہ قول کے مطابق مغرب کے بعد کی دو رکعات سنتِ مؤکدہ کے علاوہ چھ رکعات اوابین کے نوافل کہلائیں گے۔
البتہ بعض فقہاء فرماتے ہیں کہ دو سنتِ مؤکدہ کو ملا کر مزید چار رکعات ادا کرنے سے بھی چھ نوافل کی فضیلت حاصل ہوجائے گی۔
نیز اوابین کی نماز کا طریقہ بھی وہی ہے، جو عام نوافل کے ادا کرنے کا ہے اور اوابین کی چھ رکعتیں دو دو رکعت کر کے پڑھنا زیادہ بہتر ہے۔