سوال: حضرت سعید بن زید رضی اللہ عنہ کہتے ہیں کہ رسول اللہﷺ نے فرمایا: جس کا وضو نہیں اس کی نماز نہیں، اور جس نے «بسم اللہ» نہیں کہا، اس کا وضو نہیں ہوا۔(سنن ابن ماجہ حدیث نمبر ٣٩٨) کیا یہ حدیث صحیح ہے؟

جواب: سوال میں ذکر کردہ روایت ’’سنن ابن ماجۃ‘‘میں موجود ہے۔ذیل میں مکمل روایت سند،متن، ترجمہ اور تشریح کے ساتھ ذکر کی جاتی ہے:حدثنا الحسن بن علي الخلال قال: حدثنا يزيد بن هارون قال: أخبرنا يزيد بن عياض قال: حدثنا أبو ثفال، عن رباح بن عبد الرحمن بن أبي سفيان، أنه سمع جدته بنت سعيد بن زيد تذكر أنها سمعت أباها سعيد بن زيد، يقول: قال رسول الله صلى الله عليه وسلم: «لا صلاة لمن لا وضوء له، ولا وضوء لمن لم يذكر اسم الله عليه»(باب ما جاء في التسمية في الوضوء،حدیث نمبر:398،ج:140/1،ط: دار إحياء الكتب العربية)
ترجمہ:
حضرت سعید بن زید رضی اللہ عنہ سے راویت ہے کہ جناب رسول اللہ ﷺ نے ارشاد فرمایا: ’’اس شخص کی نماز نہیں ،جس کا وضو نہیں اور اس شخص کا وضو نہیں ، جس نے وضوکے شروع میں ‘‘بسم اللہ‘‘نہیں پڑھی ‘‘
تشریح:
واضح رہے کہ جمہور فقہاء کرام اور محدثین کرام کے نزدیک وضو سے پہلے ‘‘بسم اللہ‘‘ پڑھنا سنت ہے اور جس حدیث میں یہ آتا ہے کہ ’’اس شخص کی نماز نہیں ،جس کا وضو نہیں اور اس شخص کا وضو نہیں ، جس نے وضوکے شروع میں ‘‘بسم اللہ‘‘نہیں پڑھی ‘‘ ، اس حدیث کا مطلب یہ نہیں کہ ‘‘بسم اللہ‘‘ پڑھے بغیر وضو ہی صحیح نہیں ہوتا ہے ،بلکہ اس حدیث کا مطلب ہے کہ ‘‘بسم اللہ‘‘ پڑھے بغیر وضو کامل نہیں ہوتا ، ناقص ہوتا ہے ، کیونکہ حدیث کے الفاظ میں ‘‘لا‘‘ نفی کمال کے لیے ہے،نہ کہ نفی صحت کے لیے اور حدیث کے الفاظ میں ‘‘لا‘‘ نفی کمال کے لیےمراد لینے کی کئی وجوہات ہیں:
۱۔وضو سے متعلق بہت سے صحابہ کرام سے روایات مروی ہیں ،جن میں وضو سے متعلق تمام تر تفصیلات ہیں ،لیکن کسی روایت میں ‘‘بسم اللہ‘‘کا ذکر نہیں ہے، اگر ‘‘بسم اللہ‘‘ کا پڑھنا ضروری ہوتا تو سب ہی راوی اس کا تذکرہ کیوں چھوڑتے؟
۲۔امت میں عام طورپروضو سے پہلے ‘‘بسم اللہ‘‘کا معمول نہیں ہے،اگر ‘‘بسم اللہ‘‘پڑھنا ضروری ہوتا تو امت اس میں غفلت نہ کرتی۔
۳۔ وضوکے شروع میں ‘‘بسم اللہ‘‘پڑھنے کے واجب اور ضروری نہ ہونے پر گویا امت کا اجماع ہے،چند حضرات کے سواسب ہی وضوکے شروع میں ‘‘بسم اللہ‘‘پڑھنے کے واجب اور ضروری نہ ہونےکا انکار کرتے ہیں۔
۴۔ وضوکے شروع میں ‘‘بسم اللہ‘‘پڑھنےسے متعلق روایت تمام اسانید کے ساتھ ضعیف ہے،مذکورہ بالا روایت کا مدار‘‘رباح ابن عبدالرحمن پر ہے اور ان پر محدثین کرام نے کلام کیا ہے اور اسی طرح اس روایت کی سند میں‘‘أبو ثفال‘‘ راوی ہیں ،ا ن کے بارے میں امام بخاریؒ لکھتے ہیں : ’’وفی احادیثیہ نظر ‘‘یعنی ان کی احادیث تحقیق طلب ہیں ، اس لیے امام ترمذی نے اس روایت کو نقل کرنے بعدامام احمد بن حنبل کا قول نقل کیا ہے:لااعلم فی ھذا الباب حدیثا لہ إسناد جید یعنی اس مسئلہ میں میرے علم ایسی کوئی حدیث نہیں ہے،جس کی سند عمدہ ہو۔
علامہ منذری ؒ فرماتے ہیں: اس مسئلہ میں کئی حدیثیں ہیں ،جن کی سند درست نہیں۔
شاہ ولی اللہ ؒ فرماتے ہیں :حدیث کا علم رکھنے والوں نے اس حدیث کی تصحیح پر اتفاق نہیں کیا ہے۔
۵۔حضرت ابوھریرہ رضی اللہ عنہ سے مرفوعاً مروی ہے:من توضأ وذكر اسم الله تطهر جسده كله , ومن توضأ ولم يذكر اسم الله لم يتطهر إلا موضع الوضوء»(سنن دارقطنی،باب التسمية على الوضوء،حدیث نمبر:232،ج:124/1،ط:مؤسسۃ الرسالۃ)
ترجمہ:جس نے وضو کیا اور اللہ تعالی کا نام لیا اس کا پورا جسم پاک ہوگیا اورجس نےوضو کیا اور اللہ تعالی کا نام نہیں لیا ، اس کے صرف وضوکے اعضا ء ہی پاک ہوئے۔
اس روایت سے بھی یہ بات معلوم ہوتی ہے کہ اگر وضو کے شروع میں ‘‘بسم اللہ‘‘نہ پڑھی جائے تو بھی وضو درست اور معتبر ہوتا ہے۔
خلاصہ کلام :
وضوکے شروع میں ‘‘بسم اللہ‘‘پڑھنا سنت ہے ،البتہ فرض یا واجب نہیں ہے ،لہذا اگر کوئی "بسم اللہ‘‘ پڑھے بغیر وضو کرلے تو بہرحال وضو ہوجائے گا۔