سوال:
سنا ہے کہ ان کلمات (یا رب لک الحمد کما ینبغی لجلال وجھک ولعظیم سلطانک) کا ثواب فرشتے نہیں لکھ سکتے، بلکہ اللہ تعالیٰ خود اس کا ثواب مرحمت فرمائیں گے۔ کیا یہ حدیث صحیح ہے؟
جواب: سوال میں ذکرکردہ روایت سند کے اعتبارسے ’’ضعیف‘‘ہے، البتہ چونکہ اس حدیث کا تعلق فضائل اعمال سے ہے، لہذا اس حدیث کو ضعف کی صراحت کے ساتھ بیان کیا جا سکتا ہے۔ذیل میں اس روایت کا ترجمہ ،تخریج اور اسنادی حیثیت ذکرکی جاتی ہے:
ترجمہ:حضرت عبداللہ بن عمر رضی اللہ عنہما کہتے ہیں کہ جناب رسول اللہﷺنے ان سے بیان کیا کہ اللہ کے بندوں میں سے ایک بندے نے یوں کہا: «يا رب لك الحمد كما ينبغي لجلال وجهك ولعظيم سلطانك» ”اے میرے رب! میں تیری ایسی تعریف کرتا ہوں جو تیری ذات کے جلال اور تیری سلطنت کی عظمت کے لائق ہے“، تو یہ کلمہ ان دونوں فرشتوں (یعنی کراما ً کاتبین) پر مشکل ہوا، اور وہ نہیں سمجھ سکے کہ اس کلمے کو کس طرح لکھیں، آخر وہ دونوں آسمان کی طرف چڑھے اور عرض کیا: اے ہمارے رب! تیرے بندے نے ایک ایسا کلمہ کہا ہے جسے ہم نہیں جانتے کیسے لکھیں، اللہ تعالیٰ نے فرمایا: میرے بندے نے کیا کہا؟ حالانکہ اس کے بندے نے جو کہا اسے وہ خوب جانتا ہے، ان فرشتوں نے عرض کیا: تیرے بندے نے یہ کلمہ کہا ہے «يا رب لك الحمد كما ينبغي لجلال وجهك ولعظيم سلطانك» تب اللہ تعالیٰ نے فرمایا: اس کلمہ کو (ان ہی لفظوں کے ساتھ نامہ اعمال میں) اسی طرح لکھ دو جس طرح میرے بندے نے کہا: یہاں تک کہ جب میرا بندہ مجھ سے ملے گا تو میں اس وقت اس کو اس کا بدلہ دوں گا۔( سنن ابن ماجہ،حدیث نمبر: 3801)
تخریج الحدیث:
۱۔اس روایت کو امام ابن ماجہ (م273ھ)نے’’سنن ابن ماجة‘‘(2/1249،رقم الحديث:3801،ط:دار الرسالة العالمية)میں ذکرکیا ہے۔
۲۔امام أبو بكر محمد بن جعفر الخرائطی(م327ھ)نے’’ فضيلة الشكر لله‘‘(36،رقم الحديث:10،ط:دارالفكر)میں ذکرکیا ہے۔
۳۔امام طبرانی (م360ھ)نے ’’المعجم الکبیر‘‘(12/343،رقم الحديث:13297،ط:مكتبة ابن تيمية) اور ’’المعجم الأوسط‘‘(9/101،رقم الحديث:9249،ط:دارالحرمين)میں ذکرکیا ہے۔
۴۔امام بیہقی (م458ھ)نے’’شعب الإیمان‘‘(4/94،رقم الحديث:4388،ط:دارالكتب العلمية)میں ذکرکیا ہے۔
مذکورہ روایت کی اسنادی حیثیت:
امام بوصیری(م840ھ) رحمہ اللہ فرماتے ہیں : اس کی سند میں کلام ہے ، قدامہ بن ابراہیم کو علامہ ابن حبان رحمہ اللہ نے ثقہ قرار دیا ہے اور دوسرا روای صدقہ بن بشیر ہے جو کہ مجہول ہےاور سند کے باقی رجال ثقہ ہیں۔(۲)
امام طبرانی (م360ھ)نے’’ المعجم الاوسط‘‘میں اس روایت کو ایک اور سند سے نقل کرنے کے بعد فرماتے ہیں:یہ روایت عبداللہ بن عمر سے صرف اسی سند کے ساتھ مروی ہے اور صدقة بن بشير اس کے نقل کرنے میں متفرد ہیں۔
۔۔۔۔۔۔۔۔۔۔۔۔۔۔۔۔۔۔۔۔۔
دلائل:
(۱) سنن ابن ماجة:(2/1249،رقم الحديث:3801،ط:دار الرسالة العالمية)
حدثنا إبراهيم بن المنذر الحزامي ، حدثنا صدقة بن بشيرمولى العمريين، قال: سمعت قدامة بن إبراهيم الجمحي يحدث، انه كان يختلف إلى عبد الله بن عمر بن الخطاب، وهو غلام وعليه ثوبان معصفران، قال: فحدثنا عبد الله بن عمر ، ان رسول الله صلى الله عليه وسلم، حدثهم: "ان عبدا من عباد الله، قال: يا رب، لك الحمد كما ينبغي لجلال وجهك، ولعظيم سلطانك، فعضلت بالملكين، فلم يدريا كيف يكتبانها، فصعدا إلى السماء، وقالا: يا ربنا، إن عبدك قد قال مقالة، لا ندري كيف نكتبها، قال الله عز وجل: وهو اعلم بما قال عبده، ماذا قال: عبدي؟ قالا: يا رب، إنه قال: يا رب، لك الحمد كما ينبغي لجلال وجهك، وعظيم سلطانك، فقال الله عز وجل لهما: اكتباها كما قال عبدي، حتى يلقاني، فاجزيه بها".
هذا الحديث أخرجه الخرائطي في ’’ فضيلة الشكر لله‘‘(36)(10)و الطبراني في’’ معجمه الكبير‘‘(12/343)( 13297)و في ’’معجمه الأوسط‘‘(9/101)(9249) وقال: ’’لا يروى هذا الحديث عن عبد الله بن عمر إلا بهذا الإسناد، تفرد به صدقة بن بشير.‘‘والبيهقي في ’’شعب الإيمان‘‘(4/94)(4388) وعزاه المنذري في ’’الترغيب والترهيب‘‘(2/287) (2437)للإمام أحمد، وجزم البوصيري أنه في ’’المسند‘‘ ولكن لم يوجد في المطبوع
(۲)هذاأورده البويصري في ’’مصباح الزجاجة ‘‘(4/130)وقال:هذا إسناد فيه مقال، قدامة بن إبراهيم ذكره ابن حبان في الثقات وصدقه بن بشير لم أر من جرحه ولا من وثقه وباقي رجال الإسناد ثقات.
واللہ تعالٰی اعلم بالصواب
دارالافتاء الاخلاص،کراچی