سوال: بخاری شریف کی اس حدیث کی وضاحت فرمادیں: "رسول اللہﷺ نے فرمایا: اگر کوئی شخص مر جائے اور اس کے ذمہ روزے واجب ہوں تو اس کا ولی اس کی طرف سے روزے رکھ لے"۔ (صحیح بخاری#1952)

جواب: سوال میں ذکرکردہ روایت صحیح بخاری، صحیح مسلم، سنن أبی داؤد، مسند أحمد، معجم الاوسط للطبرانی، السنن الکبری للنسائی، السنن الکبری للبیھقی، سنن دارقطنی، صحیح ابن خزیمہ اور صحیح ابن حبان میں موجود ہے، ذیل میں صحیح بخاری کی مکمل روایت، سند، متن، ترجمہ اور تشریح کے ساتھ ذکر کی جاتی ہے۔
حدثنا محمد بن خالد، حدثنا محمد بن موسى بن أعين، حدثنا أبي، عن عمرو بن الحارث، عن عبيد الله بن أبي جعفر، أن محمد بن جعفر، حدثه عن عروة، عن عائشة رضي الله عنها، أن رسول الله صلى الله عليه وسلم، قال: «من مات وعليه صيام صام عنه وليه»، تابعه ابن وهب، عن عمرو، ورواه يحيى بن أيوب، عن ابن أبي جعفر
(حدیث نمبر:1952، 35/3،ط:دارطوق النجاۃ)
ترجمہ:
حضرت عائشہ رضی اللہ عنہا سے روایت ہےکہ جناب رسول اللہ ﷺ نے فرمایا:جو شخص اس حال میں مر جائے کہ اس کے ذمے روزے واجب ہوں، تو اس کا ولی اس کی طرف سے روزے رکھ لے۔

تشریح:

کسی شخص کا انتقال ہوجائے اور اس کے ذمے روزے ہوں، تو کیا اس کا کوئی وارث یا کوئی بھی شخص اس کی طرف سے نیابۃً روزے رکھ سکتا ہے؟
مذکورہ بالا حدیث سے اس کا جواز معلوم ہوتا ہے۔
جمہور علمائے کرام فرماتے ہیں کہ عبادات بدنیہ میں نیابت جاری نہیں ہوتی ہے، لہذا ایک شخص کا دوسرے کی طرف سے روزے رکھنا جائز نہیں ہے۔
امام نسائی ؒ نے ‘‘السنن الکبری‘‘ میں روایت نقل کی ہے :
عن ابن عباس، قال: «لا يصلي أحد عن أحد، ولا يصوم أحد عن أحد ولكن يطعم عنه مكان كل يوم مدا من حنطة»
(حدیث نمبر:2930، 257/3،ط:مؤسسۃ الرسالۃ)

ترجمہ :
حضرت ابن عباس رضی اللہ عنہمافرماتے ہیں : ایک شخص دوسرے کی طرف سے نماز نہیں پڑھ سکتا اور ایک شخص دوسرے کی طرف سے روزہ نہیں رکھ سکتا، لیکن اس کی طرف سے ہر دن ایک مُد گندم کھلائے۔
سنن ترمذی میں ہے :
عن ابن عمر، عن النبي صلى الله عليه وسلم قال: من مات وعليه صيام شهر فليطعم عنه مكان كل يوم مسكينا.
(حدیث نمبر:718، 89/2،ط:دارالغرب الإسلامی)
ترجمہ:
حضرت ابن عمر رضی اللہ عنہماسے روایت ہے کہ جناب رسول اللہ ﷺ نے فرمایا:اگر کوئی فوت ہو جائے اور اس پر ایک مہینے کے روزے باقی ہوں، تو اس کے ہر روزے کے بدلے میں ایک مسکین کو کھانا کھلایا جائے۔

ان احادیث مبارکہ سے یہ بات واضح ہوگئی کہ میت کی طرف سے اس کا ولی نیابۃً روزے نہیں رکھ سکتا ہے۔
سوال میں ذکرکردہ حدیث کا مطلب:
۱۔سوال میں ذکرکردہ حدیث کے الفاظ "صام عنہ ولیہ" یعنی اس کا ولی اس کی طرف سے روزے رکھ لے، کا مطلب یہ ہے کہ اس کا ولی اس کی طرف سے روزے کا فدیہ ادا کرے۔
۲۔ علامہ انور شاہ کشمیریؒ فرماتے ہیں کہ اس کا مطلب یہ ہے کہ ولی کو چاہیے کہ روزہ رکھ کر میت کے لیے ایصالِ ثواب کرے اور جہاں تک میت کے ذمے سے روزے کے وجوب کے ساقط ہونے کا تعلق ہے، وہ فدیہ اداکرنے سے ہوگا۔
خلاصہ کلام:
ایک شخص کا دوسرے کی طرف سے روزے رکھنا جائز نہیں ہے، البتہ میت کی طرف سے ہر روزے کے بدلے میں پونے دو کلو گندم یا اس کی قیمت بطورِ فدیہ دے سکتا ہے ،جس کی تفصیل یہ ہے کہ اگر اس شخص نے وصیت کی ہو ،تو ورثاء پر تہائی مال سے فدیہ ادا کرنا لازم ہے اور اگر وصیت نہیں کی ہو، تو ورثاء پر فدیہ ادا کرنا لازم نہیں ہے، البتہ ورثاء اگر میت کی طرف سے فدیہ ادا کرنا چاہیں ،تو ادا ہوجائے گا اور میت پر احسان ہوگا۔