سوال: براہ کرم اس حدیث کی تصدیق فرمادیں: "سیدنا حضرت عبدالرحمن بن عوف ؓ سے روایت ہے، انہوں نے فرمایا: میں نے رسول اللہ ﷺ سے سنا، آپ ﷺ فرما رہے تھے: جب تم میں سے کسی کو (نماز کے دوران) دو اور ایک (رکعت) کے درمیان شک ہو جائے تو وہ ایک رکعت شمار کرے اور (اگر) دو اور تین کے درمیان شک ہو تو دو رکعتیں شمار کر لے، اگر تین اور چار کے درمیان شک پڑ جائے تو تین رکعتیں سمجھ لے، پھر باقی نماز پوری کر لے، حتی کہ شک زیادتی کے بارے میں رہ جائے، پھر سلام پھیرنے سے پہلے بیٹھے بیٹھے دو سجدے کر لے۔

جواب: جی ہاں! سوال میں مذکور حدیث "حسن لغیرہ" ہے اور یہ حدیث کی مشہور کتاب "سنن ابن ماجہ" میں درج ذیل سند و متن کے ساتھ موجود ہے:
1209- حَدَّثَنَا أَبُو يُوسُفَ الرَّقِّيُّ مُحَمَّدُ بْنُ أَحْمَدَ الصَّيْدَلَانِيُّ قَالَ : حَدَّثَنَا مُحَمَّدُ بْنُ سَلَمَةَ ، عَنْ مُحَمَّدِ بْنِ إِسْحَاقَ ، عَنْ مَكْحُولٍ ، عَنْ كُرَيْبٍ ، عَنِ ابْنِ عَبَّاسٍ ، عَنْ عَبْدِ الرَّحْمَنِ بْنِ عَوْفٍ ، قَالَ : سَمِعْتُ رَسُول اللَّهِ صَلَّى اللَّهُ عَلَيْهِ وَسَلَّمَ يَقُولُ : إِذَا شَكَّ أَحَدُكُمْ فِي الثِّنْتَيْنِ وَالْوَاحِدَةِ ، فَلْيَجْعَلْهَا وَاحِدَةً ، وَإِذَا شَكَّ فِي الثِّنْتَيْنِ وَالثَّلَاثِ فَلْيَجْعَلْهَا ثِنْتَيْنِ ، وَإِذَا شَكَّ فِي الثَّلَاثِ وَالْأَرْبَعِ فَلْيَجْعَلْهَا ثَلَاثًا ، ثُمَّ لِيُتِمَّ مَا بَقِيَ مِنْ صَلَاتِهِ حَتَّى يَكُونَ الْوَهْمُ فِي الزِّيَادَةِ ، ثُمَّ يَسْجُدْ سَجْدَتَيْنِ وَهُوَ جَالِسٌ قَبْلَ أَنْ يُسَلِّمَ".
(سنن ابن ماجہ: 379/2، كتاب إقامة الصلاة والسنة فيها/ باب ما جاء في من شك في صلاته فرجع إلى اليقين، رقم الحديث: 1209، ط: دار الجيل، بيروت )
ترجمہ:
سیدنا حضرت عبدالرحمن بن عوف ؓ سے روایت ہے، انہوں نے فرمایا: میں نے رسول اللہ ﷺ سے سنا، آپ فرما رہے تھے: جب تم میں سے کسی کو (نماز کے دوران) دو اور ایک (رکعت) کے درمیان شک ہو جائے، تو وہ ایک رکعت شمار کرے اور (اگر) دو اور تین کے درمیان شک ہو، تو دو رکعتیں شمار کر لے، اگر تین اور چار کے درمیان شک پڑ جائے، تو تین رکعتیں سمجھ لے، پھر باقی نماز پوری کر لے، حتی کہ شک زیادتی کے بارے میں رہ جائے، پھر سلام پھیرنے سے پہلے بیٹھے بیٹھے دو سجدے کر لے۔
واللہ تعالٰی اعلم بالصواب
دارالافتاء الاخلاص،کراچی