سوال: میں نے ایک شخص کو کہتے ہوئے سنا کہ "حضرت عمر رضی اللہ تعالی عنہ نے سورہ بقرہ بارہ سال میں ختم کی اور سورہ بقرہ کے ختم پر اونٹ ذبح کیا" کیا یہ بات درست ہے؟

جواب: جی ہاں! یہ بات درست ہے کہ حضرت عمرؓ نے بارہ سال میں سورہ بقرہ ختم کرنے کے بعد اونٹ ذبح کیا تھا، لیکن سورت ختم کرنے سے محض اس کی تلاوت سیکھنا مراد نہیں ہے، بلکہ اس کے معنی و مفہوم کو اچھی طرح سمجھنا اور اس پر عمل کرنا مراد ہے، کیونکہ روایت میں "تعلّم" یعنی سیکھنے کے الفاظ ہیں۔ چنانچہ حضرت عبداللہ بن عمر رضی اللہ عنہما کہتے ہیں کہ "حضرت عمر رضی اللہ عنہ نے سورہ بقرہ بارہ سال میں سیکھی تھی، جب اسے پورا کیا تو اونٹ قربان کیا"۔ (شعب الایمان، حدیث نمبر: 1805)
یہی عمل حضرت عمر ؓ کے فرزند حضرت عبد اللہ بن عمر ؓ کے بارے میں بھی منقول ہے، چنانچہ حضرت ماللی سے مروی ہے کہ "حضرت عبداللہ بن عمر رضی اللہ عنہما سورہ بقرہ پر آٹھ سال تک ٹھہرے رہے تھے، اس کو سیکھتے تھے"۔ (شعب الایمان، حدیث نمبر: 1804)
نیز یہ عمل دیگر صحابہ کرام کے بارے میں بھی منقول ہے کہ وہ حضرات جب تک قرآن مجید کی سیکھی ہوئی آیات مبارکہ کو اچھی طرح سمجھنے کے بعد اس پر عمل نہ کرلیتے، تب تک مزید آیات نہ سیکھتے۔ چنانچہ ابو عبدالرحمن حضرت عبداللہ سے روایت کرتے ہیں کہ "جب ہم نبی کریم صلی اللہ علیہ وسلم سے قرآن مجید کی دس آیات سیکھتے تو جب تک جو کچھ اس میں ہے وہ نہ سیکھتے، تب تک مزید بعد والی دس آیات نہ سیکھتے۔ شریک سے کہا گیا کہ "جو کچھ اس میں ہے" سے مراد علم ہے؟ فرمایا : ہاں"۔ (شعب الایمان، حدیث نمبر: 1801)