سوال: حضرت صاحب ! پوچھنا یہ تھا کہ فون پر نکاح ہو جاتا ہے؟

جواب: شریعت نے نکاح کے انعقاد کے لیے ایک ضابطہ رکھا ہے اور وہ ضابطہ یہ ہے کہ شرعاً نکاح کے صحیح ہونے کے لیے ایجاب و قبول کی مجلس ایک ہونا اور اس میں جانبین میں سے دونوں کا  خود موجود ہونا  یا ان کے وکیل کا موجود ہونا ضروری ہے، نیز مجلسِ نکاح میں دو گواہوں کا ایک ساتھ موجود ہونا اور دونوں گواہوں کا اسی مجلس میں نکاح کے ایجاب و قبول کے الفاظ کا سننا بھی شرط ہے، ٹیلفون پر نکاح میں  مجلس کی شرط مفقود ہوتی ہے، کیوں کہ شرعاً نہ تو یہ صورت حقیقتاً مجلس کے حکم میں ہے اور نہ ہی حکماً، کیوں کہ وہ ایک مجلس ہی نہیں ہوتی، بلکہ فریقین دو مختلف جگہوں پر ہوتے ہیں، جب کہ ایجاب و قبول کے لیے عاقدین اور گواہوں  کی مجلس ایک ہونا ضروری ہے، اس لیے ٹیلفون کے ذریعے نکاح منعقد نہیں ہوتا، البتہ اگر صرف لڑکا یا لڑکی فون کے ذریعے رابطہ میں ہوں اور ان کے وکیل عقدِ نکاح کی مجلس میں موجود ہوں، اور وہ ان کی طرف سے گواہوں کے سامنے ایجاب وقبول کریں، تو نکاح منعقد ہوجائیگا۔