سوال: مفتی صاحب! بام میں benzyl alcohol شامل ہو، تو کیا ایسے بام کو استعمال کرسکتے ہیں؟

جواب: واضح رہے کہ بام میں استعمال ہونے والا بینزایل الکحل (benzyl alcohol) اگر اشربہ اربعہ محرمہ یعنی انگور یا کھجور کی شراب سے بنا ہوا ہو، تو وہ ناپاک اور حرام ہے، اس کا کسی قسم کا استعمال چاہے داخلی ہو یا خارجی، ناجائز ہے، یعنی اگر جسم کے کسی بھی حصے پر لگ جائے، تو وہ جگہ ناپاک ہوجائے گی، اور نشہ آور ہونے کی وجہ سے اس کا داخلی استعمال بھی ناجائز ہوگا۔
لیکن اگر وہ ان اشربہ اربعہ محرمہ کے علاوہ کسی اور پاک چیز سے، مثلاً : انگور اور کھجور کے علاوہ کسی اور پھل، پھول یا پیٹرول وغیرہ سے بنا ہوا ہو، تو وہ پاک ہے، اگرچہ حلال نہیں ہے، لہذا پاک ہونے کی بناء پر اس کا صرف خارجی استعمال جائز ہوگا، یعنی اگر جسم کے کسی بھی حصے پر لگ جائے، تو وہ جگہ ناپاک نہیں ہوگی، لیکن نشہ آور ہونے کی وجہ سے اس کا داخلی استعمال پھر بھی ناجائز ہوگا۔