سوال: اس حدیث کی تصدیق فرمادیں: "فرمانِ مصطفٰی ﷺ ہے:جو اپنے گھر میں نماز پڑھے اسے ایک نماز کا اور جو اپنے قبیلے کی مسجد میں نماز پڑھے اسے پچیس نمازوں کا اور جو جامع مسجد میں نماز پڑھے اسے پانچ سو نمازوں کا اور جو جامع مسجد اقصی اور میری مسجد (مسجد نبوی) میں نماز پڑھے اسے پچاس ہزار کا اور جو مسجد الحرام میں نماز پڑھے اسے ایک لاکھ نمازوں کا ثواب ملتا ہے۔ (سنن ابن ماجه، کتاب: إقامة الصلاة والسنة فيها حدیث#1413)

جواب: سوال میں مذکور حدیث سنن ابن ماجہ میں مذکور ہے، ذیل میں اس حدیث کو سند، متن اور ترجمہ کے ساتھ ذکر کیا جاتا ہے۔
1413- حَدَّثَنَا هِشَامُ بْنُ عَمَّارٍ، قَالَ: حَدَّثَنَا أَبُو الخَطَّابِ الدِّمَشْقِيُّ، قَالَ: حَدَّثَنَا رُزَيْقٌ أَبُو عَبْدِ اللهِ الأَلْهَانِيُّ، عَنْ أَنَسِ بْنِ مَالِكٍ، قَالَ: قَالَ رَسُولُ اللهِ ﷺ: «صَلَاةُ الرَّجُلِ فِي بَيْتِهِ بِصَلَاةٍ، وَصَلَاتُهُ فِي مَسْجِدِ القَبَائِلِ بِخَمْسٍ وَعِشْرِينَ صَلَاةً، وَصَلَاتُهُ فِي المَسْجِدِ الَّذِي يُجَمَّعُ فِيهِ بِخَمْسِ مِائَةِ صَلَاةٍ، وَصَلَاتُهُ فِي المَسْجِدِ الأَقْصَى بِخَمْسِينَ أَلْفَ صَلَاةٍ، وَصَلَاتُهُ فِي مَسْجِدِي بِخَمْسِينَ أَلْفَ صَلَاةٍ، وَصَلَاتُهُ فِي المَسْجِدِ الحَرَامِ بِمِائَةِ أَلْفِ صَلَاةٍ».
(سنن ابن ماجه:حدیث نمبر: 1413، كتاب إقامة الصلاة والسنة فيها/ باب ما جاء في الصلاة في المسجد الجامع)
ترجمہ:
حضرت انس بن مالک رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: آدمی کو اپنے گھر میں نماز پڑھنے کا ثواب ایک نماز کے برابر ملتا ہے اور اس کا اپنے قبیلے کی مسجد میں نماز پڑھنے کا ثواب پچیس نمازوں کے برابر ملتا ہے اور جس مسجد میں جمعہ ادا کیا جاتا ہے، وہاں نماز پڑھنے کا ثواب پانچ سو نمازوں کے برابر ملتا ہے اور مسجد اقصیٰ میں نماز پڑھنے کا ثواب پچاس ہزار نمازوں کے برابر ملتا ہے اور میری مسجد (مسجد نبوی علی صاحبہ الصلاۃ والسلام) میں نماز پڑھنے کا ثواب پچاس ہزار نمازوں کے برابر ملتا ہے اور اس کا مسجد حرام میں نماز پڑھنے کا ثواب ایک لاکھ نمازوں ثواب کے برابر ملتا ہے۔
حدیث کی اسنادی حیثیت:
علامہ بوصیری رحمۃ اللّٰہ علیہ نے "مصباح الزجاجۃ" میں اور علامہ ابن الجوزی رحمۃ اللّٰہ علیہ نے "العلل المتناھیۃ" میں اس حدیث کی سند کو ضعیف قرار دیا ہے اور علامہ منذری رحمہ اللّٰہ نے "الترغیب والترہیب" میں اس حدیث کو نقل کرنے کے بعد فرمایا ہے: اس حدیث کو ابن ماجہ نے روایت کیا ہے اور اس حدیث کے تمام راوی ثقہ ہیں، سوائے ابو الخطاب الدمشقی کے، ان کے بارے میں مجھے علم نہیں ہے، صحاح ستہ کے مصنفین میں سے صرف امام ابن ماجہ نے ہی ان سے روایت نقل کی ہے۔ واللہ اعلم۔
نوٹ:
مسجد حرام، مسجد نبوی، مسجد اقصیٰ اور دیگر مساجد میں نماز پڑھنے کی فضیلت سے متعلق روایات مختلف ہیں، ان مختلف فضیلت والی روایات کو پیش نظر رکھتے ہوئے، جمہور علماء امت نے یہ موقف اختیار کیا ہے کہ مسجد نبوی کی نماز دیگر تمام مساجد میں نماز پڑھنے سے افضل ہے، البتہ مسجد حرام کی نماز، مسجد نبوی کی نماز سے افضل ہے۔
اگرچہ سنن ابن ماجہ کی مذکورہ بالا روایت میں مسجد نبوی اور مسجد اقصیٰ کی نماز کی فضیلت (یعنی پچاس ہزار نمازوں کے برابر ثواب) یکساں بیان کی گئی ہے، لیکن سند کے اعتبار سے وہی روایات راجح ہیں، جن میں مسجد نبوی کی نماز کی فضیلت علی الاطلاق تمام مساجد (ان میں مسجد اقصیٰ بھی شامل ہے) سے افضل ہے۔
(مأخذہ باختصار: الدر المنضود علی سنن أبی داؤد:319/3، ط: مدنی کتب خانہ کراچی)