سوال: میرا سوال یہ ہے کہ اگر کوئی مسلمان تنہائی میں نبی کریم ﷺ کی توہین یا ان کی شان میں گستاخی کرے اور ایسا کرنے کے بعد اپنی حرکتوں پر شرمندہ اور نادم ہوکر سچے دل سے توبہ کرے تو کیا اللہ تعالٰی اس کی توبہ کو قبول کرے گا؟
دوسرا سوال: کیا اس شخص کو کسی قاضی، عالم یا عوام کے سامنے اپنے جرم کا اعتراف کرنا چاہیے یا اپنی توبہ کا اظہار کیے بغیر تنہائی میں اس جرم سے توبہ کرلینا کافی ہے؟

جواب: پوچھی گئی صورت میں چونکہ اس شخص نے رسول اللہ ﷺ کی شان میں گستاخی کی ہے، لہذا اس فعل سے یہ شخص کافر اور دائرہ اسلام سے خارج ہوگیا ہے اور اگر شادی شدہ ہے تو اس کا نکاح بھی فسخ ہوگیا ہے۔
لہذا ایسےشخص پر لازم ہے کہ سب سے پہلے اپنے ایمان کی تجدید کرے، یعنی نئے سرے سے کلمہ شہادت پڑھ کر ایمان لائے، اور اگر شادی شدہ ہے تو اپنی بیوی سے شرعی طریقہ پر نئے مہر کے ساتھ گواہوں (دو مسلمان عاقل بالغ مردوں یا ایک مرد اور دو عورتوں) کی موجودگی میں دوبارہ نکاح بھی کرے۔
تاہم گستاخی چونکہ تنہائی میں کی ہے، عام لوگوں کو اس کی خبر نہیں ہے، لہذا توبہ اور تجدید ایمان کے لیے کسی قاضی، عالم یا عوام وغیرہ کو بتانا ضروری نہیں ہے، البتہ اپنے اس عمل پر خوب توبہ واستغفار کرے اور تنہائی میں ندامت کے ساتھ خوب گڑگڑا کر اللہ تعالیٰ سے معافی مانگے اور آئندہ اس گناہ سے بچنے کا پکا عزم بھی کرے۔