سوال: السلام علیکم، مفتی صاحب ! مجھے آپ سے وراثت سے متعلق ایک مسئلہ دریافت کرنا ہے،
ہم کل ملا کر 6 (چھ) بھائی اور 3 (تین ) بہنیں ہیں، الحمد للہ ! تمام لوگ شادی شدہ ہیں، میرے والد محترم 3 سال قبل وفات پا چکے ہیں، والدہ محترمہ الحمدللہ حیات ہیں۔
والد صاحب اور ہم سب نے پوری زندگی کی محنت سے ایک گھر تعمیر کیا، جس میں 3 (تین) بھائی والدہ کے ساتھ رہائش پذیر ہیں، ظاہر ہے کہ ہر بھائی نے اپنی حیثیت کے حساب سے اپنا مال اس کی تعمیر میں استعمال کیا۔ ( کسی نے کم کسی نے زیادہ اور کسی نے بالکل بھی نہیں )اس گھر کی ملکیت والدہ کے نام ہے، والدہ محترمہ اسکی شرعی وراثت / تقسیم کے بارے میں معلومات حاصل کرنا چاہتی ہیں۔
۱- کیا والدہ اپنی زندگی میں اس گھر کی وراثت کے بارے میں کوئی فیصلہ کر سکتی ہیں؟
۲۔ کیا والد کی ملکیت اور والدہ کی ملکیت کی وراثت کے لئے شرعی قوانین یکساں ہیں یا ان میں فرق ہے ؟ ( کچھ لوگوں کا خیال ہے کہ والدہ اپنی مرضی سے جس اولاد کو چاہے، جتنا بھی حصہ دے سکتی ہیں، جبکہ والد کی وراثت میں ہر بیٹے کو ۲ (دو) اور بیٹی کو ۱ (ایک ) حصہ ہی مل سکتا ہے) براہ کرم وضاحت فرمادیں۔

جواب: (1).....واضح رہے کہ شرعی طور پر وراثت انتقال کے بعد جاری ہوتی ہے، زندگی میں وراثت جاری نہیں ہوتی بلکہ زندگی میں ہر شخص اپنی ملکیت کا خود مالک و مختار ہے، لہٰذا مذکورہ گھر چونکہ آپ کی والدہ کی ملکیت ہے اس لیےاس گھر کو زندگی میں تقسیم کرنا شرعاًان کی ذمہ لازم نہیں ہے اور نہ ہی آپ بھائی بہن ان سے تقسیم کا مطالبہ کرسکتے ہیں، البتہ اگر والدہ خود اپنی خوشی و رضامندی سے اپنی زندگی میں ہی مذکورہ گھر تقسیم کرنا چاہیں تو اس کی اجازت ہے ، لیکن شرعاً یہ میراث نہیں کہلائے گی، بلکہ یہ آپ کی والدہ کی طرف سے اپنی اولاد کے لیے ہبہ (گفٹ) کہلائے گا اور اس پرگفٹ کے احکام جاری ہوں گے۔
مذکورہ گھر زندگی میں تقسیم کرنے کا بہتر طریقہ یہ ہے کہ:
آپ کی والدہ پہلے اپنے لیے اپنے گھر کی قیمت میں سے جو کچھ رکھنا چاہیں رکھ لیں تاکہ بعد میں کسی کی محتاجی نہ ہو، نیز ان پر کسی کا قرض ہوتو وہ بھی ادا کرلیں، اس کے بعد جو بقایا مال و جائیداد بچے، اس میں بہتر یہ ہے کہ اپنی اولاد (آ پ بہن بھائیوں ) میں برابر برابر تقسیم کردیں ،یعنی جتنا حصہ بیٹے کو دیں اتنا ہی بیٹی کو بھی دیں۔
اور اگر میراث کے اصول کو سامنے رکھتے ہوئے بیٹوں کو بیٹیوں سے دو گنا دینا چاہیں تو وہ بھی جائز ہے، کوئی حرج نہیں۔
واضح رہے کہ اولاد میں سے بلاوجہ کسی کو محروم کرنے یا نقصان پہنچانے کی غرض سے اسکے حصہ میں کمی کرنا یا اس کو جائیداد سے محروم کرنا بھی جائز نہیں ہے، البتہ اگران میں سے کوئی زیادہ فرمانبردار ہو،یا دین دار ہو، یا اس کی مالی حالت بہتر نہ ہو تو اس بناء پر کچھ زیادہ دینا جائز ہے۔ اسی طرح جن بیٹوں نے اس گھر کی تعمیر میں اپنا سرمایہ خرچ کیا ہے تو زندگی میں برابری کرنے کے لیےان کو دوسروں کے مقابلے میں کچھ زیادہ حصہ دینا بھی شرعاً درست ہے۔
نیز چونکہ زندگی میں اپنی جائیداد تقسیم کرنا شرعاً ہبہ(گفٹ)ہے، اس لیے اگر کسی جائیداد میں سے کوئی حصہ دینا چاہیں تو اس کو مالک و قابض بناکردینا لازم ہے، پھر آپ کی والدہ کے انتقال کے بعد یہ گھر ان کے ترکہ میں شامل نہیں ہوگا، بلکہ جس کو جو حصہ قابض و مالک بناکر دیا گیا، وہی اس کا مالک ہوگا۔
(2)....جی ہاں ! والد اور والدہ کی ملکیت کی وراثت میں شرعی حکم یکساں ہے اس میں کوئی فرق نہیں ہے، یعنی جس طرح والد کی میراث میں بیٹے کے دو حصے اور بیٹی کا ایک حصہ ہوتا ہے اسی طرح والدہ کی میراث میں بھی یہی طریقہ ہے۔چنانچہ بعض لوگوں کا جو خیال سوال میں ذکر کیا گیا ہے وہ شرعاً درست نہیں ہے، البتہ زندگی میں اپنی ملکیت تقسیم کرنے کے متعلق جو طریقہ اور تفصیل ہے وہ جواب نمبر ایک(1) میں لکھ دی گئی ہے۔