سوال: کیا ترمذی میں یہ حدیث صحیح ہے کہ "جس نے صبح و شام سو مرتبہ سبحان اللہ پڑھا تو وہ سو حج کرنے والے کی طرح ہے"؟ براہ کرم وضاحت فرمادیں۔

جواب: جی ہاں ! سوال میں مذکور حدیث ثابت ہے، حدیث کی مشہور کتاب سنن الترمذی میں مذکور ہے، اس حدیث کو امام ترمذی رحمہ اللّٰہ نے "حسن غریب" قرار دیا ہے، لہذا حدیث میں مذکور کلمات کی فضیلت کو حاصل کرنے کے لیے ان کو پڑھنے کا اہتمام کرنا چاہیے۔
ذیل میں اس حدیث کو سند، متن اور ترجمہ کے ساتھ بیان کیا جاتا ہے:

3471 حَدَّثَنَا مُحَمَّدُ بْنُ وَزِيرٍ الْوَاسِطِيُّ حَدَّثَنَا أَبُو سُفْيَانَ الْحِمْيَرِيُّ عَنْ الضَّحَّاكِ بْنِ حُمْرَةَ عَنْ عَمْرِو بْنِ شُعَيْبٍ عَنْ أَبِيهِ عَنْ جَدِّهِ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ مَنْ سَبَّحَ اللَّهَ مِائَةً بِالْغَدَاةِ وَمِائَةً بِالْعَشِيِّ كَانَ كَمَنْ حَجَّ مِائَةَ مَرَّةٍ وَمَنْ حَمِدَ اللَّهَ مِائَةً بِالْغَدَاةِ وَمِائَةً بِالْعَشِيِّ كَانس كَمَنْ حَمَلَ عَلَى مِائَةِ فَرَسٍ فِي سَبِيلِ اللَّهِ أَوْ قَالَ غَزَا مِائَةَ غَزْوَةٍ وَمَنْ هَلَّلَ اللَّهَ مِائَةً بِالْغَدَاةِ وَمِائَةً بِالْعَشِيِّ كَانَ كَمَنْ أَعْتَقَ مِائَةَ رَقَبَةٍ مِنْ وَلَدِ إِسْمَعِيلَ وَمَنْ كَبَّرَ اللَّهَ مِائَةً بِالْغَدَاةِ وَمِائَةً بِالْعَشِيِّ لَمْ يَأْتِ فِي ذَلِكَ الْيَوْمِ أَحَدٌ بِأَكْثَرَ مِمَّا أَتَى بِهِ إِلَّا مَنْ قَالَ مِثْلَ مَا قَالَ أَوْ زَادَ عَلَى مَا قَالَ قَالَ أَبُو عِيسَى هَذَا حَدِيثٌ حَسَنٌ غَرِيبٌ
(سنن الترمذي: كتاب الدعوات باب ما جاء في فضل التسبيح والتكبير والتهليل والتحميد: 5/ 460)
ترجمہ:
٣٤٧١ - حضرت عبداللہ بن عمرو رضی اللہ عنہما روایت کرتے ہیں کہ حضور نبی اکرم ﷺ نے فرمایا : جو شخص سو مرتبہ صبح اور سو مرتبہ شام کو ’’سبحان اللہ‘‘ کہے، وہ سو حج کرنے والے کی مانند ہے۔ جو آدمی صبح و شام سو سو مرتبہ ’’الحمد للہ‘‘ کہے، وہ اس شخص کی طرح ہے، جس نے اللہ تعالیٰ کے راستے میں سو مجاہدوں کو گھوڑوں پر سوار کیا (یعنی انہیں سواری دی) یا فرمایا : وہ سو غزوات لڑنے والے غازی کی طرح ہے، جو شخص صبح و شام سو سو مرتبہ ’’لا الہ الا اللہ‘‘ کہے، وہ اس آدمی کی طرح ہے، جس نے حضرت اسماعیل علیہ السلام کی اولاد سے سو غلام آزاد کئے اور جس نے صبح و شام سو سو مرتبہ ’’اللہ اکبر‘‘ کہا تو اس دن اس سے اچھا عمل کسی نے نہیں کیا، البتہ وہ شخص جو یہ کلمات اسی طرح کہے یا اس سے زائد بار کہے۔