سوال: واش روم میں وضو کرنے سے جو پانی نیچے سے اٹھ کر کپڑوں پر لگ جاتا ہے تو وہ پانی پاک ہے یا ناپاک؟ اسی طرح اگر پاک پانی میں مستعمل پانی گر جائے تو پانی ناپاک ہو جائے گا یا نہیں؟

جواب: واش روم میں جس جگہ سے وضو کی چھینٹیں اٹھ کر کپڑوں پر پڑتی ہیں، اگر وہاں کوئی نجاست نہ ہو تو ان چھینٹوں سے کپڑے ناپاک نہیں ہوں گے۔
ماء مستعمل (وہ پانی جو دورانِ وضو یا غسل استعمال کیا گیا ہو) کا حکم یہ ہے کہ وہ پاک ہے، لیکن پاک کر نہیں سکتا ہے، یعنی اس سے وضو اور غسل کرنا درست نہیں ہے، البتہ اگر ماء مستعمل ناپاک چیزوں کو پاک کرنے کے لئے استعمال کیا جائے تو اس سے ناپاک چیزیں پاک ہوجائیں گی، بالفاظ دیگر اس سے نجاست حکمیہ کو زائل نہیں کیا جاسکتا، البتہ اس سے نجاست حقیقیہ کو دور کیا جاسکتا ہے۔