سوال:
ہمارے خظیب صاحب نے بیان میں فرمایا ہے کہ حدیث میں آتا ہے کہ "بارش کے دوران دعائیں قبول ہوتی ہیں" کیا یہ حدیث صحیح ہے؟
جواب: بارش کے دوران دعاکی قبولیت کا ذکر سنن ابی داؤد میں ہے۔
عن سهل بن سعد قال: قال رسول الله صلى الله عليه وسلم: "ثنتان لا تردان او قلماتردان الدعاء عند النداء، وعند الباس حين يلحم بعضهم بعضا، قال موسى، وحدثني رزق بن سعيد بن عبد الرحمن، عن ابي حازم، عن سهل بن سعد، عن النبي صلى الله عليه وسلم قال: ووقت المطر".
ترجمہ:
سہل بن سعد رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”دو (وقت کی) دعائیں رد نہیں کی جاتیں، یا کم ہی رد کی جاتی ہیں: ایک اذان کے بعد کی دعا، دوسرے لڑائی کے وقت کی، جب دونوں لشکر ایک دوسرے سے بھڑ جائیں“۔ موسیٰ کہتے ہیں: مجھ سے رزق بن سعید بن عبدالرحمٰن نے بیان کیا وہ ابوحازم سے روایت کرتے ہیں وہ سہل بن سعد رضی اللہ عنہ سے اور وہ نبی اکرم صلی اللہ علیہ وسلم سے آپ نے فرمایا:”اور بارش کے وقت کی“۔
(سنن أبي داود کتاب الجہاد،باب الدعاء عند اللقاء:367/1،ط، قدیمی کتب خانہ، کراچی)، فیض القدیر للمناوی،حدیث نمبر:3566، 340/3،ط ، دارالمعرفہ، بیروت)
واللہ تعالٰی اعلم بالصواب
دارالافتاء الاخلاص،کراچی