سوال: حضور ﷺ نے عدی بن حاتم سے پوچھا: اے عدی ! کیا تم نے حیرہ دیکھا ہے؟ اگر تمہاری زندگی لمبی ہوئی تو تم ایک بڑھیا کو دیکھو گے کہ حیرہ سے چلے گی، حتی کہ کعبہ کا طواف کرے گی، خدا کے سوا کسی سے نہ ڈرے گی، چنانچہ عدی فرماتے ہیں کہ میں نے وہ زمانہ اپنی آنکھوں سے دیکھا کہ ایک عورت حیرہ سے اکیلی اونٹ پر سوار ہوکر آئی، کعبہ کا طواف کیا اور اس کو الله کے سوا کسی کا ڈر نہیں تھا۔ (بخاری: 3595)
مندرجہ بالا حدیث کی تشریح فرمادیں، کیونکہ لوگ اس حدیث کو سعودی حکام کی عورت کے لیے بغیر محرم اجازت حج کی پالیسی کے درست ہونے پر دلیل دے رہے ہیں۔

جواب: 1۔سوال میں ذکرکردہ روایت کو موجودہ حالات میں سعودی حکام کے عورت کو بغیر محرم سفرحج و عمرہ کی اجازت دینے کی پالیسی پر چسپاں کرنا اور یہ استدلال کرنا کہ عورت کا بغیر محرم کے حج و عمرہ کا سفر کرسکتی ہے ، بالکل درست نہیں ہے۔ ذیل میں سوال میں ذکرکردہ روایت کے اس حصہ کا ترجمہ اور تشریح ذکر کی جاتی ہے:
ترجمہ:حضرت عدی بن حاتم رضی اللہ عنہ سے روایت ہے کہ میں جناب نبی کریم ﷺ کی خدمت میں حاضر تھا کہ ایک صاحب آئے اور آپ ﷺ سے فقر و فاقہ کی شکایت کی، پھر دوسرے صاحب آئے اور راستوں کی بدامنی کی شکایت کی، اس پر آپ ﷺنے فرمایا: عدی! تم نے مقام حیرہ دیکھا ہے؟ (جو کوفہ کے پاس ایک بستی ہے) میں نے عرض کیا کہ میں نے دیکھا تو نہیں، البتہ اس کا نام میں نے سنا ہے۔ آپ ﷺ نے فرمایا: اگر تمہاری زندگی کچھ اور لمبی ہوئی تو تم دیکھو گے کہ ہودج میں ایک عورت اکیلی حیرہ سے سفر کرے گی اور (مکہ پہنچ کر) کعبہ کا طواف کرے گی اور اللہ کے سوا اُسے کسی کا بھی خوف نہ ہو گا۔ صحیح البخاری: (حدیث نمبر: 3595، ط: دار طوق النجاۃ)(۱)
تشریح :
حدیث شریف میں صحابی (رضی اللہ عنہ) کے راستوں کی بد امنی کی شکایت کرنے پر آپﷺ نے امن کی بشارت اور خوش خبری دیتے ہوئے بطورِ تمثیل فرمایا: اگر تمہاری زندگی لمبی ہو، تو تم دیکھو گے کہ ہودج میں ایک عورت حیرہ کے مقام سے سفر کرے گی اور مکہ پہنچ کر کعبہ کا طواف کرے گی اور اسے اللہ تعالی کے سوا کسی اور کا خوف نہیں ہوگا۔
غور کیا جائے تو بات واضح ہوجاتی ہے کہ آپ ﷺ کا ارشاد مبارک امن کی حالت اور کیفیت کو بیان کرنا تھا کہ اس قدر امن ہوگا کہ اگر کوئی عورت اکیلے بھی سفر کرے گی، تو اسے کوئی خوف نہ ہوگا، آپ ﷺ کی اس بات پر حضرت عدی بن حاتم رضی اللہ عنہ کو تعجب ہوا، کیونکہ حرہ سے مکہ آتے ہوئے راستے میں قبیلہ طی کے ڈاکو قافلوں کو لوٹ لیا کرتے تھے۔(۲)
2۔ دوسری بات یہ ہے کہ احادیث کی روشنی میں عورت کے لیے سفر حج و عمرہ کے علاوہ کوئی بھی سفر (شرعی مسافت کے بقدر) بغیر محرم کے کرنا جائز نہیں ہے۔
حدیث شریف میں آتا ہے:
۱۔ حضرت ابوھریرہ رضی اللہ عنہ سے روایت ہے کہ جناب رسول اللہ ﷺ نے ارشادفرمایا: اللہ تعالی اور آخرت پر ایمان رکھنے والی کسی عورت کے لیے حلال نہیں کہ وہ دن و رات کا سفر بغیر محرم کے کرے۔(بخاری شریف،حدیث نمبر:1088،ط: دارطوق النجاۃ)(۳)
۲۔حضرت عبداللہ ابن عباس رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: کوئی مرد کسی عورت سے تنہائی میں نہ ملے اور کوئی عورت سفر نہ کرے، مگر اس حال میں کہ اس کے ساتھ اس کا محرم ہو، تو ایک شخص نے عرض کیا: اے اللہ کے رسول ﷺ میرا نام فلاں غزوے (جہادی لشکر) میں لکھا گیا ہے، اور میری بیوی حج کے لیے نکل چکی ہے، آپ ﷺ نے فرمایا: اب تم اپنی بیوی کے ساتھ حج کرو۔(بخاری شریف،حدیث نمبر:5233)(۴)
اسی لیے فقہائے کرام نے فرمایا: عورت کے ساتھ اس کا شوہر یا کوئی محرم سفرِ حج پر جائے گا، لہٰذا اگر محرم یا شوہر عورت کے ساتھ سفر کے لیے میسر نہ ہو تو عورت پر حج فرض نہیں ہوگا۔(۵)
کتاب الفتاوی (ج:4،ص:43،ط:زمزم پبلیشرز) میں ہے:عورت کے محرم کے بغیر سفرنہ کرنے کے بارے میں رسول اللہ ﷺ کے متعدد ارشادات ہیں، جو حدیث کی کتابوں میں موجود ہیں، اس لیے خواتین کو محرم کے بغیر سفرحج سے گریز کرنا چاہیے، کیونکہ عبادتوں کا اصل مقصود اللہ تعالی کی رضا اور خوشنودی حاصل کرنا ہے اور جب شریعت میں ایک بات سے منع کردیا گیا ہو تو اس کے ارتکاب کی وجہ سے بجائے ثواب کے گناہ ہی کا اندیشہ ہے۔
شرعی اور فقہی نقطۂ نظر سے ہٹ کر عملی طورپر بھی سفرِ حج میں خواتین کے ساتھ شوہر یامحرم کا ہونا نہایت ضروری محسوس ہوتا ہے، آب و ہوا کی تبدیلی کی وجہ سے بار بار طبیعت خراب ہوتی ہے ، مقام کی اجنبیت، ازدحام اور زبان کی عدمِ واقفیت کی وجہ سے خواتین کو بار بار مدد کی ضرورت پیش آتی ہے، بہت سی جگہ طویل قیام کرنا پڑتا ہے اور بہت سی دشوار قانونی کارروائیوں سے گزرنا پڑتا ہے، ان مواقع پر محرم رشتے دار یا شوہر کا قدم قدم پر تعاون مطلوب ہوتا ہے۔
اس تفصیل سے واضح ہوگیا کہ سوال میں ذکر کردہ حدیث سےسعودی حکام کی عورت کے لیے بغیر محرم اجازت حج کی پالیسی کے درست ہونے پر دلیل پکڑنا صحیح نہیں ہے۔