سوال: مجھے نماز میں بھول جانے کی بیماری ہوگئی ہے، کبھی رکعتوں کی تعداد بھول جاتی ہوں تو کبھی وتر میں دعائے قنوت پڑھنا بھول جاتی ہوں اور کبھی پڑھ لیتی ہوں، لیکن ایسا معلوم ہوتا ہے کہ نہیں پڑھی اور کبھی فرض پڑھ کر اس کا اعادہ کر لیتی ہوں، براہ کرم مجھے اس سے چھٹکارے کا حل بتادیں۔

جواب: ۱) سوال میں پوچھی گئی صورت میں چونکہ آپ کو یہ شک (بھولنا) بار بار ہورہا ہے تو آپ کو غالب گمان پر عمل کرنا چاہیے، یعنی جتنی رکعتیں غالب گمان سے یاد ہوں تو آپ سمجھیں کہ اسی قدر رکعتیں پڑھ چکی ہیں، اور اگر غالب گمان کسی جانب نہ ہو تو اس صورت میں کمی کی جانب کو اختیار کریں، مثلاً: ظہر کی نماز میں شک ہوا کہ تین رکعات پڑھی ہیں یا چار، اگر غالب گمان کسی طرف نہ ہو تو تین رکعتیں شمار کرکے چوتھی رکعت پڑھیں، اس صورت میں تیسری رکعت پر بیٹھ کر التحیات پڑھیں اور پھر چوتھی رکعت پڑھنے کے بعد آخر میں سجدہ سہو بھی کرلیں۔
۲) وہم و شک کا اعتبار نہیں ہے، بلکہ غالب گمان کا اعتبار ہے، لہذا اگر دعائے قنوت پڑھنے کا غالب گمان ہو تو سجدہ سہو کرنے کی ضرورت نہیں ہے، نماز ہوجائے گی اور اگر یہ غالب گمان ہو کہ دعائے قنوت نہیں پڑھی ہے تو پھر سجدہ سہو کرنا واجب ہوگا۔
واضح رہے کہ شریعت نے جہاں ہمیں بہت سی چیزوں میں احتیاط سے کام لینے کا حکم دیا ہے٬ وہاں یہ تعلیم بھی دی ہے کہ شک کی طرف توجہ نہ دی جائے، بلکہ جو پہلو یقینی یا غالب گمان کے مطابق ہو، اسی کو اختیار کیا جائے، کیونکہ یقین کے مقابلے میں شک کی کوئی حیثیت اور اہمیت نہیں ہے، اس لیے محض شک یا وہم کی وجہ سے پریشان نہ ہوا کریں، اسے کوئی اہمیت نہ دیں، اوپر بیان کی گئی تفصیل کے مطابق یقین یا غالب گمان والے پہلو کے مطابق عمل کرلیا کریں۔