سوال: مندرجہ ذیل حدیث کی تصدیق فرمادیں: حضرت حذیفہ رضی اللہ عنہ فرماتے ہیں کہ لوگ حضرت محمد ﷺ سے خیر کی باتیں پوچھا کرتے تھے اور میں آپ ﷺ سے شر کے بارے میں تحقیق کیا کرتا تھا کہ کہیں ایسا نہ ہو کہ وہ مجھے لا علمی کی وجہ سے پہنچ جائے، فرماتے ہیں: میں نے ایک دفعہ عرض کیا یارسول اللہ! ہم جاہلیت اور شر میں پھنسے ہوئے تھے، حق تعالیٰ شانہ نے (آپ کی بدولت) ہمارے پاس یہ خیر (اسلام) بھیج دی تو کیا اس خیر کے بعد بھی کوئی شر ہوگا؟ حضور ﷺ نے فرمایا: ہاں! میں نے کہا اور اس شر کے بعد کوئی خیر ہوگی؟ حضور ﷺ نے فرمایا : ہاں! مگر اس میں کدورت ہو گی، میں نے کہا کدورت کیا ہوگی؟ حضور ﷺ نے فرمایا: کچھ لوگ ہوں گے، جو میری سنت کے بجائے دوسری چیزوں کی تلقین کریں گے، ان میں نیک و بد کی آمیزش ہوگی، میں نے کہا یارسول اللہ! ذرا ان کا حال تو بیان فرمائیے، حضورﷺ نے فرمایا: وہ ہماری ہی قوم سے ہوں گے اور ہماری ہی زبان بولیں گے، میں نے عرض کیا: اگر یہ برا وقت مجھ پر آجائے تو آپ مجھے کیا ہدایت فرماتے ہیں؟
حضور ﷺ نے فرمایا: مسلمانوں کی جماعت اور ان کے امام سے چمٹے رہنا، میں نے کہا: اگر اس وقت نہ مسلمانوں کی جماعت ہو اور نہ امام تو پھر؟ حضور ﷺ نے فرمایا: ان تمام فرقوں سے الگ رہو، خواہ تمہیں کسی درخت کی جڑ میں جگہ بنانا پڑے، حتی کہ اسی حالت میں تمہاری موت آ جائے۔

جواب: سوال میں مذکور الفاظ صحیح بخاری کی حدیث کا ترجمہ ہیں، جبکہ اس کی روشنی میں بیان کی گئی تشریح غیر واضح ہے، لہذا ذیل میں اس حدیث کو مکمل سند، متن، ترجمہ اور مختصر تشریح کے ساتھ ذکر کیا جاتا ہے:
- حَدَّثَنَا يَحْيَى بْنُ مُوسَى، حَدَّثَنَا الوَلِيدُ، قَالَ: حَدَّثَنِي ابْنُ جَابِرٍ، قَالَ: حَدَّثَنِي بُسْرُ بْنُ عُبَيْدِ اللَّهِ الحَضْرَمِيُّ، قَالَ: حَدَّثَنِي أَبُو إِدْرِيسَ الخَوْلاَنِيُّ، أَنَّهُ سَمِعَ حُذَيْفَةَ بْنَ اليَمَانِ يَقُولُ: كَانَ النَّاسُ يَسْأَلُونَ رَسُولَ اللَّهِ صَلَّى اللهُ عَلَيْهِ وَسَلَّمَ عَنِ الخَيْرِ، وَكُنْتُ أَسْأَلُهُ عَنِ الشَّرِّ مَخَافَةَ أَنْ يُدْرِكَنِي، فَقُلْتُ يَا رَسُولَ اللَّهِ إِنَّا كُنَّا فِي جَاهِلِيَّةٍ وَشَرٍّ، فَجَاءَنَا اللَّهُ بِهَذَا الخَيْرِ، فَهَلْ بَعْدَ هَذَا الخَيْرِ مِنْ شَرٍّ؟ قَالَ: "نَعَمْ" قُلْتُ: وَهَلْ بَعْدَ ذَلِكَ الشَّرِّ مِنْ خَيْرٍ؟ قَالَ: "نَعَمْ، وَفِيهِ دَخَنٌ" قُلْتُ: وَمَا دَخَنُهُ؟ قَالَ: "قَوْمٌ يَهْدُونَ بِغَيْرِ هَدْيِي، تَعْرِفُ مِنْهُمْ وَتُنْكِرُ" قُلْتُ: فَهَلْ بَعْدَ ذَلِكَ الخَيْرِ مِنْ شَرٍّ؟ قَالَ: "نَعَمْ، دُعَاةٌ إِلَى أَبْوَابِ جَهَنَّمَ، مَنْ أَجَابَهُمْ إِلَيْهَا قَذَفُوهُ فِيهَا" قُلْتُ: يَا رَسُولَ اللَّهِ، صِفْهُمْ لَنَا؟ فَقَالَ: "هُمْ مِنْ جِلْدَتِنَا، وَيَتَكَلَّمُونَ بِأَلْسِنَتِنَا". قُلْتُ: فَمَا تَأْمُرُنِي إِنْ أَدْرَكَنِي ذَلِكَ؟ قَالَ: تَلْزَمُ جَمَاعَةَ المُسْلِمِينَ وَإِمَامَهُمْ، قُلْتُ: فَإِنْ لَمْ يَكُنْ لَهُمْ جَمَاعَةٌ وَلاَ إِمَامٌ؟ قَالَ: "فَاعْتَزِلْ تِلْكَ الفِرَقَ كُلَّهَا، وَلَوْ أَنْ تَعَضَّ بِأَصْلِ شَجَرَةٍ، حَتَّى يُدْرِكَكَ المَوْتُ وَأَنْتَ عَلَى ذَلِكَ".
(صحيح البخاري: رقم الحدیث: 3606)
ترجمہ:
حضرت حذیفہ بن یمان رضی اللہ عنہ فرماتے ہیں: میرے ساتھی صحابہ کرام تو رسول اللہ صلی اللہ علیہ وسلم سے خیر کے متعلق سوال کیا کرتے تھے، لیکن میں شر کے بارے میں پوچھتا تھا، اس خوف سے کہ کہیں میں ان میں نہ پھنس جاؤں۔ تو میں نے ایک مرتبہ رسول اللہ صلی اللہ علیہ وسلم سے سوال کیا: یا رسول اللہ! ہم جاہلیت اور برے حالات میں تھے، پھر اللہ تعالیٰ نے ہمیں یہ خیر (اسلام) عطا فرمائی، اب کیا اس خیر کے بعد کوئی شر کا زمانہ آئے گا؟ آپ صلی اللہ علیہ وسلم نے فرمایا کہ ہاں، میں نے سوال کیا، اور اس شر کے بعد پھر خیر کا کوئی زمانہ آئے گا؟ آپ صلی اللہ علیہ وسلم نے فرمایا کہ ہاں، لیکن اس خیر پر کچھ دھواں ہو گا؟ (یعنی وہ خیر محض نہیں ہوگی، بلکہ اس میں کدورت ہوگی، جیسے آگ میں دھواں ہو تو وہ خالص آگ نہیں ہوتی) میں نے عرض کیا: اس خیر میں وہ دھواں کیا ہو گا؟ آپ صلی اللہ علیہ وسلم نے ارشاد فرمایا کہ کچھ لوگ ہوں گے، جو میری سنت اور طریقے کے علاوہ دوسرے طریقے اختیار کریں گے، ان میں کوئی بات اچھی ہوگی اور کوئی بات بری ہوگی۔ (بعض باتیں جائز اور بعض باتیں نا جائز ہوں گی،) میں نے سوال کیا: کیا اس خیر کے بعد پھر شر کا کوئی زمانہ آئے گا؟ آپ صلی اللہ علیہ وسلم نے ارشاد فرمایا: ہاں! کچھ لوگ جہنم کے دروازوں (گمراہی) کی طرف بلانے والے ہوں گے، جو ان کی بات قبول کرے گا، اسے وہ جہنم میں جھونک دیں گے۔
(اس سے دین حق سے بھٹکانے والے باطل فرقوں کے لوگ مراد ہیں)
میں نے عرض کیا: یا رسول اللہ! ان لوگوں کے کچھ اوصاف بھی بیان فرما دیجئیے، تو آپ صلی اللہ علیہ وسلم نے فرمایا کہ وہ لوگ ہمارے ہی کنبے کے ہوں گے اور ہماری ہی زبان بولتے ہوں گے۔ میں نے عرض کیا: اگر میں ان لوگوں کا زمانہ پاؤں تو میرے لیے آپ کی کیا ہدایت ہے؟ آپ صلی اللہ علیہ وسلم نے فرمایا: مسلمانوں کی جماعت اور ان کے امام سے چپکے رہنا، میں نے عرض کیا اگر مسلمانوں کی کوئی جماعت نہ ہو اور نہ ان کا کوئی امام موجود ہو، (تب میں کیا کروں)؟ اس پر آپ صلی اللہ علیہ وسلم نے ارشاد فرمایا: پھر ان تمام فرقوں سے جدا رہنا، اگرچہ تجھے اس کے لیے کسی درخت کی جڑ چبانی پڑے، یہاں تک کہ تیری موت آ جائے اور تو اسی حالت پر ہو۔
تشریح:
مذکورہ بالا حدیث کے شروع میں یہ بات بيان كى گئی ہے کہ حضرت حذیفہ رضی اللہ عنہ کو اس بات کى فکر لاحق تھى کہ کسى طرح نبی اکرم صلى اللہ علیہ وسلم سے آئندہ زمانے میں پیش آنے والے احوال کے متعلق ہدایات محفوظ کر لوں، تاکہ اس زمانے میں کسى فتنے کا شکار نہ ہوں، اس سلسلے میں آپ صلى اللہ علیہ وسلم نے ارشاد فرمایا کہ جب آخر زمانے میں فتنہ پھیل جائے، تو اس موقع پر مسلمانوں کى اجتماعیت کے ساتھ رہنا، مسلمانوں کے امیر کى (جائز امور میں) اطاعت کرتے رہنا، لیکن اگر مسلمانوں کى اجتماعیت باقی نہ رہے، بلکہ وہ مختلف جماعتوں اور فرقوں میں بٹےہوئے ہوں، یا مسلمانوں کا کوئی امیر نہ ہو، تو پھر کسى ایک جماعت کى اتباع کے بجائے ان سے الگ تھلگ رہنا، خواہ تمہیں اس الگ رہنے میں کتنى ہى مشقت برداشت کرنا پڑے۔
نیز یہاں یہ بھى واضح رہے کہ جن فرقوں سے کنارہ کشی کا حکم دیا گیا ہے، اس سے باطل نظریات والے فرقے مراد ہیں، جو اہل السنة والجماعة کے طریقے سے ہٹ گئے ہوں، کیوں کہ آپ صلى اللہ علیہ وسلم نے ارشاد فرمایا:
"عن عبد الله بن عمرو قال: قال رسول الله صلى الله عليه وسلم: ليأتين على أمتي ما أتى على بني إسرائيل حذو النعل بالنعل، حتى إن كان منهم من أتى أمه علانيةً لكان في أمتي من يصنع ذلك، وإن بني إسرائيل تفرقت على ثنتين وسبعين ملةً وتفترق أمتي على ثلاث وسبعين ملةً، كلهم في النار إلا ملة واحدة، قالوا: ومن هي يا رسول الله؟ قال: «ما أنا عليه وأصحابي»".
(سنن الترمذی:ج5، ص26، باب افتراق الأمة، ط: دار إحیاء التراث العربي)
ترجمہ:
حضرت عبداللہ بن عمرو رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: میری امت پر بھی وہی حالات آئیں گے، جیسے بنی اسرائیل پر آئے، جیسے ایک جوتا دوسرے جوتے کے برابر ہوتا ہے، یہاں تک کہ اگر ان میں سے کسی شخص نے اپنی ماں سے اعلانیہ بدکاری کی ہوگی تو میری امت میں بھی ایسا شخص ہوگا، جو یہ کام کرے گا، اور بنی اسرائیل بہتر فرقوں میں بٹے اور میری امت تہتر فرقوں میں بٹے گی، سب جہنم میں ہوں گے سوائے ایک جماعت کے، صحابہ رضی اللہ عنہم نے عرض کیا: اے اللہ کے رسول ﷺ وہ کون ہوں گے؟ آپ ﷺ نے فرمایا: جس طریقے پر میں اور میرے صحابہ ہیں (اس کے مطابق چلنے والی جماعت)۔