سوال: السلام علیکم، مفتی صاحب !
ہمارے ابو کی طرف کے رشتے داروں نے ساری عمر میری والدہ کو ہر طرح کی مالی تکلیف دی، رشتے میں زہر گھولہ، ہر بار ان کو معاف کرنے کے بعد وہ پھر ہمیں اور والدہ کو تکلیف دیتے رہیں، ہر طرح کی دخل اندازی کرتی ہیں، میری والدہ بہت کمزور ہیں، شوگر اور خون کی کمی کی مریضہ ہیں، اب ہمت نہیں کہ وہ برداشت کر سکیں۔
میرے والد صاحب نے کبھی میری والدہ کی طرف داری نہیں کی، میرے بھائی کو بھڑکاتی رہتی ہیں، ہم نہ ان کے کسی معاملے میں بولتے ہیں، نہ کبھی تکلیف دی، لیکن آج بھی وہ ہمیں تکلیف دیتی ہیں، میری امی نے ساری عمر ان کو کھلایا، عزت دی، اب سوال یہ ہے کہ کیا ان سے ہم قطع تعلق کرسکتے ہیں؟

جواب: اسلام نے ہمیں رشتہ داروں کے ساتھ احسان اور اچھے برتاؤ کرنے کا حکم دیا ہے، رشتہ ناطہ کو توڑدینا اور رشتہ داری کا پاس ولحاظ نہ کرنا اللہ کے نزدیک حد درجہ ناپسندیدہ ہے، چنانچہ رسول اللہ ﷺ نے فرمایا:
لا يدخلُ الجنةَ قاطعُ رحمٍ
(صحيح مسلم)
ترجمہ: جنت میں رشتہ توڑنے اور کاٹنے والا نہ جائے گا۔
ایک دوسری حدیث میں آپ صلی اللہ علیہ وسلم نے فرمایا کہ "کسی کام کا بدلہ دینا صلہ رحمی نہیں ہے بلکہ صلہ رحمی کرنے والا وہ ہے کہ جب اس کے ساتھ صلہ رحمی کا معاملہ نہ کیا جا رہا ہو تب بھی وہ صلہ رحمی کرے"
(صحیح البخاری)
لہذا اگرچہ رشتہ دار تعلق ختم کریں یا اسکا پاس نہ رکھیں، تب بھی آپ کو اپنی طرف سے تعلق ختم نہیں کرنا چاہیے۔