سوال: السلام علیکم، میں نے ایک حدیث کے بارے میں پوچھنا تھا، میں نے بدنظری سے متعلق کتاب میں ایک حدیث پڑھی تھی "کہ ٹوٹا ہوا دل اللہ کے قریب ہوتا ہے۔" مہربانی فرماکر بتادیں کہ یہ حدیث کس عربی کتاب کی ہے اور اس کے صحیح اور ضعیف ہونے کا کیا حکم ہے؟ جزاکم اللہ خیرا

جواب: واضح رہے کہ جو شخص اللہ تعالى کى رضا کى خاطر اپنى خواہشات کو قربان کرتا ہے تو اللہ تعالى کاخاص تعلق ایسے شخص کے دل میں پیدا ہو جاتا ہےاور اس کا دل اللہ تعالى کى تجلى گاہ بنتا ہے، ان الفاظ : "ٹوٹا ہوا دل اللہ کے قریب ہوتا ہے"، میں اسى مفہوم کو بیان کیا گیا ہے، لیکن یہ الفاظ آنحضرت صلى اللہ علیہ وسلم سے مرفوعا ثابت نہیں ہیں، ملا على قارى رحمہ اللہ (م 1014ھ) نے اپنى کتاب "الأسرار المرفوعة" ص 117، ط: مؤسسة الرسالة-بيروت، میں فرمایا ہے: "ان الفاظ کا مرفوع ہونا ثابت نہیں ہے"، نیز علامہ مرتضى الزبیدى رحمہ اللہ (م1205ھ) نے "إتحاف السادة المتقين" ج 6 ص 290، ط: مؤسسة التاريخ العربي، بيروت-لبنان، میں اس حدیث کے متعلق فرمایا ہے: "گویا کہ یہ حدیث اسرائیلى روایات میں سے ہےاور ائمہ حدیث کے نزدیک اس حدیث کا مرفوع ہونا ثابت نہیں ہے"، لہذا بعینہ ان الفاظ کو آنحضرت صلى اللہ علیہ وسلم کى طرف منسوب کر کے بطور ِحدیث بیان کرنے سے اجتناب کرنا چاہیے۔ (1)
البتہ آنحضرت صلى اللہ علیہ وسلم کے علاوہ حضرت موسى اور حضرت داود علیہما السلام کى طرف نسبت کرکے یہ الفاظ نقل کیے گئے ہیں،ذیل میں ان کوبیان کیا جاتا ہے:
(1) امام احمد بن حنبل رحمہ اللہ (م 241ھ) نے اپنى کتاب "الزھد" ص 64، رقم الحدیث (391)،ط: دار الكتب العلمية، بيروت – لبنان، میں نقل کیا ہے: عمران القصیر تابعی بیان کرتے ہیں کہ حضرت موسى علیہ السلام نے عرض کیا: اے پروردگار! میں آپ کو کہاں تلاش کروں؟ اللہ تعالى نے ارشاد فرمایا: مجھے ٹوٹے ہوئے دلوں میں تلاش کرو اور میں ان شکستہ دلوں سے ہر روز ایک ہاتھ قریب ہوتا ہوں، اگر ایسا نہ ہو تو ان کے دل شدت غم کى وجہ سے منہدم ہو جائیں۔ (2)
(2) حافظ ابو نعیم اصفہانى رحمہ اللہ (م 430ھ) نے اپنى کتاب "حلیة الأولياء" ج 4 ص 31، ط: دار الكتاب العربي – بيروت، میں نقل کیا ہے: حضرت وہب بن منبہ سے مروى ہے کہ حضرت داود علیہ السلام نے عرض کیا: اے میرے اللہ! اگر میں آپ کو تلاش کروں، تو آپ مجھے کہاں ملیں گے؟ اللہ تعالى نے ارشاد فرمایا: (میں) ان لوگوں کے پاس ملوں گا، جن کے دل میرے خوف سے شکستہ ہوں۔ (3)
نیز نبى اکرم صلى اللہ علیہ وسلم سے اس طرح کا مضمون صحیح احادیث مبارکہ سے ثابت ہے، جیسا کہ صحیح مسلم کى حدیث ہے:
حضرت ابوہریرہ رضی اللہ عنہ سے روایت ہے رسول کریم ﷺ نے فرمایا: قیامت کے دن اللہ تعالى فرمائیں گے: اے ابن آدم! میں بیمار ہوا تو نے میری عیادت نہیں کی۔ وہ شخص کہے گا کہ اے میرے رب! میں آپ کی عیادت کیسے کرتا، حالانکہ آپ تو رب العالمین ہیں۔ اللہ تعالیٰ فرمائیں گے: کیا تجھے معلوم نہیں کہ میرا فلاں بندہ بیمار تھا، اگر تم اس کی عیادت کرتے تو مجھے اس کے پاس پالیتے۔ اے ابن آدم میں نے تجھ سے کھانا مانگا تو تم نے مجھے کھانا نہیں کھلایا۔ وہ شخص کہے گا: اے میرے رب ! میں آپ کو کھانا کیسے کھلاتا، حالانکہ آپ تو رب العالمین ہیں۔ اللہ تعالى فرمائیں گے: کیا تمہیں معلوم نہیں کہ میرے فلاں بندے نے تم سے کھانا مانگا، تم اگر اسکو کھانا کھلاتے تو تم اسے میرے پاس پاتے۔ اے ابن آدم! میں نے تم سے پانی مانگا تھا، تم نے مجھے پانی نہیں پلایا، وہ شخص کہے گا: اے میرے رب! میں آپ کو کیسے پانی پلاتا، حالانکہ آپ تو رب العالمین ہیں۔ اللہ تعالیٰ فرمائیں گے: میرے فلاں بندہ نے تم سے پانی مانگا تھا، اگر تم اس کو پلاتے تو تم اسے میرے پاس پاتے۔
(صحیح مسلم:حدیث نمبر: 2569) (4)
تشريح:
ملا على قارى رحمہ اللہ نے مشکاۃ المصابیح کى شرح "مرقاۃ المفاتیح" میں مندرجہ بالا حدیث کى تشریح کے ضمن میں فرمایا ہے کہ اس حدیث میں اس بات کى طرف اشارہ ہے کہ اللہ تعالى کے ہاں عاجزى اور انکسارى کا بڑا مقام ہے، جیسا کہ روایت کیا گیا ہے کہ (اللہ تعالى فرماتے ہیں) جو لوگ میرى وجہ سے شکستہ دل ہوں، تو میں ان کے قریب ہوتا ہوں۔
علامہ طیبى رحمہ اللہ نے فرمایا ہے: مذکورہ بالا حدیث میں اس بات کى طرف اشارہ ہے کہ مریض کى عیادت کا ثواب کسى بھوکے کو کھانا کھلانے اور کسى پیاسے کو پانى پلانے سے زیادہ ہے، کیونکہ مریض کى عیادت کے بارے میں فرمایا ہے: تم مجھے اس کے پاس پالیتے، اس سے معلوم ہوا کہ اللہ تعالى شکستہ دل مسکین کے قریب ہوتے ہیں۔ (5)
خلاصہ کلام:
"میں ٹوٹے ہوئے دلوں میں بستا ہوں" ان الفاظ کو آنحضرت صلى اللہ علیہ وسلم کى طرف منسوب کرکے بیان کرنا درست نہیں ہے، البتہ مذکورہ بالا تشریح کے مطابق ان الفاظ کو بیان کرنے کى گنجائش ہے۔