سوال: مفتی صاحب ! کیا قضاء نمازیں ادا کرنے کی قرآن میں کہیں کوئی تاکید ہے اور اس کے متعلق احادیث میں کوئی بات کہی گئی ہے؟ براہ کرم رہنمائی فرمادیں۔

جواب: جس مسلمان نے اپنی غفلت اور لاپرواہی کی وجہ سے  نمازیں نہ پڑھی ہوں، تو اس پر لازم ہے کہ وہ اپنے اس فعل پر نادم ہوکر توبہ کرے اور ان فوت شدہ نمازوں کی قضا کرے۔
اگر اسے ان فوت شدہ نمازوں کی تعداد یاد نہ ہو تو اسے چاہیے کہ خوب اچھی طرح سوچ کر ایک محتاط حساب کے مطابق اندازہ لگا کر اپنی فوت شدہ نمازیں ادا کرنا شروع کریں، یہاں تک کہ اس کو یقین ہوجائے کہ اب میرے ذمہ کوئی قضاء نماز باقی نہیں ہے، مثلاً ایک شخص چودہ یا پندرہ سال کی عمر میں بالغ ہوا، اور اس نے پانچ چھ سال تک نماز نہیں پڑھی، یا کبھی پڑھی اور کبھی نہیں پڑھی اور یہ مدت اس شخص کے غالب گمان میں مثلاً پانچ سال کی ہوئی ، تو اس شخص کو اپنے غالب گمان کے مطابق اتنے ہی سالوں کی نماز قضا کرنا ضروری ہوگا۔
آسانی کی غرض سے علماء کرام نے یہ طریقہ بتایا ہے کہ ہر وقتی فرض نماز کے ساتھ ایک قضا نماز بھی ادا کرلی جائے، تاکہ قضا نمازوں کی ادائیگی بھی آہستہ آہستہ ہوتی رہے، البتہ یہ طریقہ لازمی اور ضروری نہیں ہے، بلکہ جس قدر جلدی ادا کرسکے ادا کرلے، چنانچہ ایک وقت میں متعدد قضا نمازیں پڑھنا بھی درست ہے۔
قرآن وحدیث سے یہ بات ثابت ہے کہ مسلمان کو اپنے تمام فوت شدہ نمازوں کی قضا کرنی چاہیے۔
چنانچہ حضرت انس رضی اللہ عنہ سے روایت ہے کہ حضور اکرم صلی اللہ علیہ وسلم  نے ارشاد فرمایا ہے کہ :
"جو شخص کوئی نماز پڑھنا بھول جائے، تو اس پر لازم ہے کہ جب بھی اسے یاد آئے، وہ نماز پڑھے، اس کے سوا اس کا کوئی کفارہ نہیں، اللہ کا ارشاد ہے : میری یاد آنے پر نماز قائم کرو"۔ (صحیح بخاری، حدیث نمبر:597)
صحیح مسلم کی روایت میں ہے کہ: جب تم میں سے کوئی شخص نماز سے سوجائے یا غفلت کی وجہ سے چھوڑ دے، تو جب بھی اسے یاد آئے وہ نماز پڑھے، کیونکہ اللّٰہ تعالیٰ نے فرمایا ہے کہ "اقم الصلوۃ لذکری" ( میری یاد آنے پر نماز قائم کرو)۔ (صحیح مسلم، حدیث نمبر:684)
ان احادیث مبارکہ میں واضح طور پر یہ اصول بیان کردیا گیا ہے کہ جس شخص کی نماز غفلت یا سونے وغیرہ کی وجہ سے چھوٹ جائے تو تنبہ ہونے پر اس کی قضا کرے۔
نیز ان احادیث مبارکہ میں آخر میں قرآن مجید کی آیت ذکر کرکے اللہ کے رسول (صلی اللہ علیہ وسلم) نے اس بات کی طرف اشارہ فرمادیا کہ یہ آیت غفلت کی وجہ سے فوت شدہ نمازوں کی قضا کو بھی شامل ہے کہ یاد آنے پر ان نمازوں کی قضا کیجائے گی، محض توبہ واستغفار کافی نہیں ہے۔
اسی طرح جناب رسول اللہ (صلی اللہ علیہ وسلم) نے اپنے عمل سے بھی اس بات کی تعلیم دی ہے کہ نماز قضا ہوجانے کے بعد اس کی ادائیگی ضروری ہے، محض توبہ واستغفار اور ندامت کافی نہیں ہے۔ چنانچہ احادیث مبارکہ میں یہ واقعہ تفصیل سے ملتا ہے کہ آپ صلی اللہ علیہ وسلم نے غزوہ خندق کے موقع پر فوت شدہ تمام نمازوں کی قضا فرمائی۔
اس کے علاوہ احادیث مبارکہ میں ایک دوسرا واقعہ بھی مذکور ہے، جس میں آپ صلی اللہ علیہ وسلم نے عملاً فوت شدہ نماز قضا کرنے کی اہمیت کی طرف اشارہ کیا ہے۔
چنانچہ حضرت ابوہریرہ رضی اللہ عنہ فرماتے ہیں کہ آپ صلی اللہ علیہ وسلم  صحابہٴ کرام کے ساتھ غزوہٴ خیبر سے واپس آرہے تھے، رات میں چلتے چلتے جب نیند کا غلبہ ہوا تو آپ صلی اللہ علیہ وسلم  نے رات کے اخیر حصہ میں ایک جگہ قیام فرمایا اور حضرت بلال رضی اللہ عنہ کو نگہبانی کے لیے متعین فرماکر آپ صلی اللہ علیہ وسلم  لیٹ گئے اور صحابہ بھی سو گئے۔ جب صبح قریب ہوئی تو حضرت بلال رضی اللہ عنہ (تھکان کی وجہ سے) اپنی سواری سے ٹیک لگاکر بیٹھ گئے ، پس آپ پر نیند غالب ہوئی اور آپ بھی سو گئے اور باقی سب حضرات بھی ایسے سوئیں کہ طلوعِ آفتاب تک نہ اللہ کے رسول صلی اللہ علیہ وسلم  کی آنکھ کھلی اور نہ حضرت بلال رضی اللہ عنہ کی، نہ کسی اور صحابی کی۔جب سورج طلوع ہوا اور اس کی شعاعیں ان حضرات پر پڑیں تو سب سے پہلے رسول اللہ صلی اللہ علیہ وسلم  بیدار ہوئے اور گھبرا کر حضرت بلال رضی اللہ عنہ کو اٹھایا۔ پھر صحابہٴ کرام کو آگے چلنے کا حکم دیا، صحابہٴ کرام اپنی سواریاں لے کر آگے بڑھے اور ایک جگہ حضور اکرم صلی اللہ علیہ وسلم  نے وضو کیا اور حضرت بلال رضی اللہ عنہ کو اقامت کہنے کا حکم دیا۔ حضرت بلال رضی اللہ عنہ نے اقامت کہی اور آپ صلی اللہ علیہ وسلم  نے نماز پڑھائی۔ جب نماز سے فارغ ہوئے تو فرمایا: جو نماز کو بھول جائے اس کو چاہیے کہ وہ یاد آنے پر اس کو پڑھ لے۔
(صحیح مسلم، حدیث نمبر:680)
قضا نمازوں کی ادائیگی سے متعلق یہ موقف صرف امام اعظم ابوحنیفہ رحمہ اللہ کے نزدیک ہی نہیں؛ بلکہ امام شافعی رحمہ اللہ، امام مالک رحمہ اللہ اور امام احمد بن حنبل رحمہ اللہ کا بھی یہی موقف ہے، بلکہ علامہ ابن تیمیہ رحمۃ اللہ علیہ نے اس موقف کو جمہور علمائے کرام کا موقف قرار دیا ہے۔