سوال: اکثر سنا گیا ہے کہ جوڑے آسمانوں پر بنتے ہیں، اس جملے کی شرعی حیثیت کیا ہے؟

جواب: واضح رہے کہ ہر انسان کے دنیا میں آنے سے پہلے اللہ تعالی نے اس کی ہر چیز مقررفرمائی ہے، انسان اس کے خلاف ہزارہا کوششیں کرلے، تب بھی کامیاب نہیں ہوسکتا، یہ ہم سب کا بحیثیت مسلمان ایمان اور عقیدہ ہے، جیسا کہ قرآن کریم میں ارشاد باری ہے:قل لن یصینا الاماکتب اللہ لنا ھو مولٰنا و علی اللہ فلیتوکل المؤمنون (سورۃ التوبۃ: آیت نمبر:51) ترجمہ: کہہ دو کہ: اللہ نے ہمارے مقدر میں جو تکلیف لکھ دی ہے، ہمیں اس کے سوا کوئی اور تکلیف ہرگز نہیں پہنچ سکتی۔ وہ ہمارا رکھوالا ہے، اور اللہ ہی پر مومنوں کو بھروسہ رکھنا چاہیے۔
دوسری جگہ ارشاد ہے:وما تشاءون الا أن یشاء اللہ(سورۃ الدھر: آیت نمبر:30) ترجمہ: اور تم چاہو گے نہیں جب تک اللہ نہ چاہے۔
حدیث شریف میں ہے: سیدنا عبداللہ بن مسعود ؓ نے کہا کہ رسول اللہ ﷺ نے ہم سے بیان فرمایا: (اور آپ ﷺ صادق اور مصدوق ہیں) تمہاری پیدائش کے مراحل میں نطفہ ماں کے پیٹ میں چالیس دن تک مجتمع رہتا ہے، پھر اتنے ہی دن جما ہوا خون (لوتھڑا) بن جاتا ہے، پھر اتنے ہی دنوں کے لیے گوشت کی بوٹی بن جاتا ہے، پھر اللہ تعالیٰ اس کی طرف ایک فرشتہ بھیجتا ہے اور اسے چار باتیں لکھنے کا حکم ہوتا ہے، وہ اس کا رزق، اجل (عمر یا موت)، عمل اور یہ کہ وہ خوش بخت ہو گا یا بدبخت، یہ سب لکھ دیتا ہے، پھر اس میں روح پھونک دی جاتی ہے۔ چنانچہ یقیناً تم میں سے کوئی اہل جنت والے عمل کرتا ہے حتیٰ کہ اس کے اور اس (جنت) کے درمیان صرف ایک ہاتھ کا فاصلہ رہ جاتا ہے، مگر اس سے پہلے جس طرح لکھا ہوا ہے اس کے مطابق دوزخیوں والے عمل شروع کر دیتا ہے اور دوزخ میں جا پڑتا ہے، اور بیشک تم میں سے کوئی دوزخیوں والے عمل کرتا رہتا ہے حتیٰ کہ اس کے اور دوزخ کے درمیان صرف ایک ہاتھ کا فاصلہ رہ جاتا ہے، لیکن اس سے پہلے جو لکھا ہے اس کے مطابق وہ جنتیوں والا عمل کر لیتا ہے اور جنت میں چلا جاتا ہے۔ (سنن ابو داؤد، حدیث نمبر:4708)
اس تفصیل سے معلوم ہوا کہ انسان کے ہر فعل کے بارے میں تقدیر میں لکھا ہوا ہے، اسی طرح یہ بھی لکھا ہوا ہے کہ فلاں کی فلاں سے شادی ہوگی، لیکن ان سب کے باوجود انسان کا تقدیر کا سہارا لے کر بیٹھ جانا اور اپنے آپ کو مجبور محض خیال کرکے اسباب کو اختیار نہ کرنا، کسی بھی طرح شرعاً پسندیدہ عمل نہیں ہے اور نہ ہی یہ توکل اور بھروسہ ہے، بلکہ اپنی وسعت اور طاقت کے مطابق اسباب کو اختیار کرنا چاہیے ، کیونکہ اللہ تعالی نے دنیا کو دارالاسباب بنایا ہے، جس میں ہر کام کے لیے بندے کو پہلے کسی سبب کو اختیار کرنا پڑتا ہے۔
خلاصہ کلام:
بندہ اپنی جانب سے اسباب اختیار کرے، اس کے بعد اپنے معاملات کو اللہ تعالی کے سپرد کردے، لہذا اگر اس جملے "جوڑے آسمانوں پر بنتے ہیں" کا مطلب یہ ہو کہ اسباب کے درجے میں مناسب رشتہ تلاش کرنے کی کوشش ہی نہیں کرنی چاہیے تو یہ مطلب درست نہیں ہے، لیکن اگر اس کا مطلب یہ ہوکہ مناسب کوشش اور استخارہ وغیرہ کرنے کے بعد ہوتا وہی ہے جو اللہ تعالی کا فیصلہ ہے اور تقدیر میں لکھا ہوا ہے تو یہ بات درست ہے، لہذا عقل کا تقاضا بھی یہی ہے کہ آسمانوں پر جوڑے بننے کے باوجود ہمیں مناسب رشتہ تلاش کرنے کے لیے کوشش کرنی چاہیے۔