سوال: آج کل ہاؤسنگ سوسائٹیز والے فائلیں بیچ دیتے ہیں، بسا اوقات پلاٹ متعین ہوتے ہیں اور بسا اوقات پلاٹ متعین نہیں ہوتے، خریدنے والے فائلیں آگے بیچ دیتے ہیں اور اس طرح یہ سلسلہ چل پڑتا ہے، جبکہ قبضہ کسی کا بھی نہیں ہوتا۔ کیا اس طرح فائلوں کا خریدنا اور بیچنا جائز ہے؟

جواب: ہاؤسنگ سوسائٹی والوں کی طرف سے جس خریدار کے نام پلاٹ کی الاٹمنٹ کی جاتی ہے، اور اس کے نام فائل کردی جاتی ہے تو اس خریدار کیلئے اس پلاٹ کی فائل کو آگے بیچنے کے بارے میں تفصیل یہ ہے کہ اگر سودے کے دوران اس پلاٹ کی مکمل حقیقت واضح کردی گئی ہو اور اس کے حدود اربعہ متعین کرکے بیان کردئیے گئے ہوں اور اس پلاٹ کا محل وقوع بھی اس طرح متعین کرلیا گیا ہوکہ کہ خریدار نقشے کی مدد سے اپنے پلاٹ کی حدود کا اندازہ لگا سکتا ہو کہ وہ کس جانب ہوگا اور اس میں کسی نزاع کا اندیشہ نہ ہو تو اس صورت میں پلاٹوں کی خرید و فروخت فائل کی صورت میں جائز ہےاور خریدار اس پلاٹ کا شرعا مالک بن جاتا ہے، لہذا وہ ایسی فائل کو آگے فروخت بھی کرسکتا ہے، کیونکہ یہ محض فائل کی خرید و فروخت نہیں ہے، بلکہ فائل جس متعین پلاٹ کی نمائندگی کر رہی ہے، اس کی خرید وفروخت کا معاملہ ہے جو کہ جائز ہے، کیونکہ غیر منقولہ جائیداد کی خرید و فروخت کے جائز ہونے کیلئے اتنی تعیین کافی ہے، جس سے نزاع کا اندیشہ نہ ہو، لہذا ایسے پلاٹ کی فائل کی خرید و فروخت جائز ہے، اگرچہ خریدار کو پلاٹ کا حسی قبضہ نہ ملا ہو اور قیمت کی ادائیگی بھی نہ کی ہو۔
لیکن اگر ہاؤسنگ سوسائٹی کی طرف سے پلاٹ کی حقیقت اس طرح واضح نہ ہو، اس کی حدود اربعہ متعین نہ ہوں اور اس کی تعیین میں نزاع کا اندیشہ ہو تو ایسی صورت میں پلاٹ کے مجہول ہونے کی وجہ سے اس کی خرید و فروخت جائز نہیں ہے، لہذا ایسے پلاٹ کی فائل بھی آگے فروخت کرنا شرعا درست نہیں ہے۔