سوال: مفتی صاحب! میری بیٹی کی عمر اٹھارہ سال ہے، وہ ابھی تعلیم حاصل کررہی ہے تو کیا تعلیم مکمل ہونے تک اس کی شادی روک سکتے ہیں؟

جواب: واضح رہے کہ ہمارے پیارے رسول ﷺنے اسلامی معاشرے کو پاکیزہ بنانے اور بے حیائی کے سد باب کے لیے نکاح کرنے کی بہت تاکید فرمائی ہے اور نکاح میں جلدی کرنے کی ترغیب دی ہے۔
چنانچہ یحیی بن کثیر سے روایت ہے کہ آنحضرت ﷺ نے ارشاد فرمایا: "جب تمہارے پاس ایسا رشتہ آئے، جس کی امانت داری اور اچھے اخلاق سے تم رضامند ہو تو نکاح کردیا کرو، وہ کوئی بھی ہو، اس لیے کہ اگر تم ایسا نہیں کروگے تو زمین میں بڑا فساد پیدا ہوجائے گا"۔(مصنف عبد الرزاق، حدیث نمبر:10325)
حضرت علی کرم اللہ وجہہ سے مروی ہے کہ آپ ﷺ نے ارشاد فرمایا: اے علی! تین چیزوں میں تاخیر نہ کرو: نماز میں جب اس کا وقت ہو جائے، جنازہ میں جب وہ حاضر ہو، اور بیوہ عورت کے نکاح میں جب اس کے جوڑ کا رشتہ مل جائے۔ (سنن ترمذی)
حضرت ابو سعید اور ابن عباس رضی اللہ عنہم فرماتے ہیں کہ رسول اللہ ﷺنے فرمایا: جس کے ہاں بچہ پیدا ہو، اس کی ذمہ داری ہے کہ اس کا اچھا نام رکھے، بالغ ہونے پر اس کی شادی کرے، اگر شادی نہیں کی اور اولاد نے کوئی گناہ کرلیا تو باپ اس جرم میں شریک ہوگا اور گناہ گار ہوگا۔ (مشکوة)
عمر بن خطاب اور انس بن مالک رضی اللہ عنہما سے روایت ہے کہ رسول اللہ ﷺ نے فرمایا: تورات میں درج ہے کہ جس کی بیٹی بارہ سال کی ہوجائے اور وہ اس کا نکاح نہ کرے، پھر لڑکی سے کوئی گناہ ہوجائے تو باپ بھی گناہ گار ہوگا۔ (مشکوة)
موجودہ پر فتن دور میں جب ہر طرف سے بے حیائی کے دروازے کھلے ہوئے ہیں، ان حالات میں آنحضرت ﷺ کے مذکورہ بالا ارشادات گرامی پر عمل پیرا ہونا چاہیے، کسی معقول عذر کے بغیر بلا وجہ لڑکوں اور لڑکیوں کے نکاح میں تاخیر کرنا، اپنے آپ کو فتنے میں مبتلا کرنے کے مترادف ہے، لہذا لڑکیوں کے بالغ ہونے کے بعد دینی و اخلاقی اعتبار سے کسی اچھے لڑکے کا رشتہ آجائے تو جلد از جلد شادی کردینی چاہیے، تعلیم وغیرہ کے مکمل ہونے کے انتظار میں تاخیر کرنا شرعاً کوئی معقول عذر نہیں ہے۔