سوال: شیطان اور نفس انسان کو کیسے بہکاتے ہیں اور ان میں کیا فرق ہے؟ براہ کرم واضح فرمادیں۔

جواب: انسان کے اندر ایک طاقت ہے جس سے وہ کسی چیز کی خواہش کرتا ہے، خواہ وہ خواہش بھلائی کی ہو یا برائی کی، اس کو "نفس" کہتے ہیں، جبکہ شیطان اپنے خاص معنی کے اعتبار سے ابلیس اور اس کی اولادکو کہاجاتا ہے، اور اپنے عمومی معنی کے اعتبار سے ہر باغی و سرکش مخلوق کو شیطان کہا جاتا ہے، خواه وه انسانوں میں سے ہو یا جنات و حیوانات میں سے۔
نفس اور شیطان میں مختلف اعتبار سے فرق ہے:
۱)نفس شیطان سے قوی ہے، کیونکہ جس وقت ابلیس نے آدم علیہ السلام کو سجدہ کرنے سے انکار کیا تھا، اس وقت شیطان نہیں تھا، بلکہ ابلیس کے نفسِ امّارہ نے اس کو سجدہ کرنے سے روکا تھا، اسی وجہ سے نفس کے بارے میں اللہ تعالی نے فرمایا ہے: واما من خاف مقام ربہ ونھی النفس عن الھوی فان الجنۃ ھی الماوٰی۔ (سورۃ النازعات، الآیة: 40، 41) ترجمہ: "لیکن وہ جو اپنے پروردگار کے سامنے کھڑا ہونے کا خوف رکھتا تھا اور اپنے نفس کو بری خواہشات سے روکتا تھا تو جنت ہی اس کا ٹھکانا ہوگی"۔
اس آیت سے نفس کا قوی ہونا معلوم ہوتا ہے،جبکہ شیطان کے بارے میں اللہ تعالی ارشاد فرماتے ہیں: انّ کیدالشیطان کان ضعیفا (سورۃ النساء، الآیة:76) ترجمہ: "(یاد رکھو کہ) شیطان کی چالیں درحقیقت کمزور ہیں۔ لہذا واضح ہوگیا کہ نفس شیطان سے قوی اور بڑا دشمن ہے"۔
۲) شیطان کا کام انسان کے دل میں صرف وسوسے ڈالنا ہے، مگر جب انسان زیادہ دھیان نہیں دیتا تو وہ وسوسےفوراً ختم ہو جاتے ہیں، لیکن اگر بار بار دل میں وسوسے آرہے ہوں اور گناہ کا تقاضا بار بار ہورہا ہو تو یہ نفس کی طرف سے ہے، اور اگر ایک دفعہ ایک گناہ کا تقاضا ہوا اور پھر اگلی مرتبہ دوسرے گناہ کا تو یہ تقاضا شیطان کی طرف سے ہو گا، کیونکہ شیطان کو گناہ سے کوئی لذت اور سرور حاصل نہیں ہوتی، اس کا مقصد انسان سے صرف کوئی گناہ کرانا ہے، جبکہ نفس کو لذت اور سرور بھی حاصل ہوتی ہے۔
۳) نفس گناہوں پر ابھارتا ہے، قرآن مجید میں ہے: إِنَّ النَّفْسَ لَأَمَّارَةٌ بِالسُّوءِ (سورۃ یوسف، الایة:53)ترجمہ:"واقعہ یہ ہے کہ نفس تو برائی کی تلقین کرتا ہی رہتا ہے"۔
جبکہ شیطان صرف گناہ کی دعوت اورمشورہ دیتا ہے، جیسا کہ قرآن مجید میں ہے: وَقَالَ الشَّيْطَانُ لَمَّا قُضِيَ الْأَمْرُ إِنَّ اللَّهَ وَعَدَكُمْ وَعْدَ الْحَقِّ وَوَعَدْتُكُمْ فَأَخْلَفْتُكُمْ وَمَا كَانَ لِيَ عَلَيْكُمْ مِنْ سُلْطَانٍ إِلَّا أَنْ دَعَوْتُكُمْ فَاسْتَجَبْتُمْ لِي (سورۃ ابراہیم، الایة :22)
ترجمہ: "اور جب ہر بات کا فیصلہ ہوجائے گا تو شیطان (اپنے ماننے والوں سے) کہے گا : حقیقت یہ ہے کہ اللہ نے تم سے سچا وعدہ کیا تھا اور میں نے تم سے وعدہ کیا تو اس کی خلاف ورزی کی، اور مجھے تم پر اس سے زیادہ کوئی اختیار حاصل نہیں تھا کہ میں نے تمہیں (اللہ کی نافرمانی کی) دعوت دی تو تم نے میری بات مان لی"۔
اس آیت میں لفظِ "دعوتکم" (میں نے تمہیں اللہ کی نافرمانی کی دعوت دی) سے پتا چلتا ہے کہ شیطان صرف گناہ کا مشورہ دیتا ہے، لہذا واضح ہوا کہ گناہ کا اصل داعی نفس ہوتا ہے، کیونکہ نفس مہیج ہے اور شیطان مشیر (یعنی گناہ کرنے کا مشورہ دیتا )ہے۔ (مستفاد ازملفوظات حکیم الامت:437/26)
۴) جب انسان غافل ہوتا ہے تو شیطان اس کے دل میں وسوسہ ڈالتا ہے اور جب وہ اللہ تعالی کے ذکر میں مشغول ہو جاتا ہے تو اس وقت وہ بھاگ جاتا ہے، لیکن نفس ہر وقت گناہ پر ابھارتا رہتا ہے، جیسا کہ حضرت عبد اللہ بن عباس رضی اللہ عنہما سے "الوسواس الخناس" کی تفسیر میں منقول ہے کہ "الشیطانُ جاثمٌ علیٰ قلبِ ابنِ ادمَ، فَإذا سَهَا و غَفَلَ وَسْوَسَ وَإِذا ذَکر الله خنسَ" یعنی ’’شیطان اولادِ آدم کے دل پر بیٹھ جاتا ہے، پس جب بندہ (اللہ تعالی کو) بھول جاتا ہے اور غفلت میں پڑجاتا ہے تو شیطان وسوسہ ڈالتا ہے اور جب بندہ اللہ کو یاد کرتا ہے تو وہ پیچھے ہٹ جاتا ہے۔
خلاصہ کلام : نفس اور شیطان دونوں ہی انسان کے دشمن ہیں اور دونوں سے اللہ تعالی کی پناہ مانگنی چاہیے، حدیث شریف میں ہے کہ حضرت ابوذررضی اللہ عنہ سے روایت ہے کہ میں جناب نبی اکرم ﷺ کی خدمت میں حاضر ہوا، آپ ﷺمسجد میں تشریف فرما تھے، میں آپ کے پاس بیٹھ گیا تو آپ ﷺ نے فرمایا: اے ابو ذر! شیاطین جن اور شیاطین انس کے شر سے اللہ کی پناہ مانگو، میں نے عرض کیا: یارسول اللہ ! کیا انسانوں میں بھی شیطان ہوتے ہیں؟ فرمایا : ہاں! اس لیے نفس اورشیطان دونوں کے شر سے اللہ تعالی کی پناہ مانگنی چاہیے۔ اللہ تعالی ہمیں نفس اورشیطان کے شرسے محفوظ فرمائے۔ (آمین)