سوال: مفتی صاحب ! کیا ایک طلاق دینے سے نکاح ٹوٹ جاتا ہے؟ رجوع کا کیا طریقہ ہوگا؟

جواب: واضح رہے کہ اگر ایک بار دی گئی طلاق "طلاق رجعی" ہو، تو عدت (تین ماہواری بشرطیکہ حاملہ نہ ہو) کے اندر رجوع کرنے کی صورت میں نکاح برقرار رہتا ہے، اور دوبارہ نکاح کرنے کی ضرورت نہیں ہوتی۔
طلاق رجعی کی صورت میں قولی اور فعلی دونوں طرح رجوع کیا جا سکتا ہے، رجوع کرنے کا طریقہ یہ ہے کہ زبان سے کہہ دے کہ "میں نے رجوع کرلیا ہے" تو رجوع ہوجائے گا، اور بہتر یہ ہے کہ اس پر دو گواہ بھی بنالے، اور اگر زبان سے تو کچھ نہ کہے، مگر بیوی سے ازدواجی تعلقات قائم کرلے، یا خواہش اور رغبت سے اس کو ہاتھ لگالے، تب بھی رجوع ہو جائے گا، البتہ اگر عدت میں رجوع نہیں کیا اور عدت گزر گئی، تو عدت گزرتے ہی طلاق رجعی، طلاق بائن میں تبدیل ہوجائے گی، ایسی صورت میں باہمی رضامندی سے نیا مہر مقرر کرکے گواہوں کی موجودگی میں دوبارہ نکاح کرنا ہوگا۔
اور اگر ایک بار دی گئی طلاق "طلاقِ بائن" ہو، تو ایسی صورت میں طلاق دیتے ہی نکاح ٹوٹ جاتا ہے، اور عدت کے اندر محض زبانی یا قولی رجوع کافی نہیں ہوتا، بلکہ میاں بیوی کو عدت میں یا عدت کے بعد باہمی رضامندی سے نیا مہر مقرر کرکے گواہوں کی موجودگی میں دوبارہ نکاح کرنا ضروری ہوتا ہے۔