سوال: السلام علیکم، ہمارا ایک دوست ہے، جس کا نام سعید ہے، سعید کی بہن کو طلاق ہوگئی، کچھ دن کے بعد طلاق دینے والے لڑکے نے مطالبہ کیا کہ میں حلالہ کرا کے دوبارہ نکاح کرنا چاہتا ہوں، اس پر سعید نے اپنے والدین کو منع کیا کہ اس مقصد کے لئے حلالہ کرانا صیح نہیں ہے، لیکن والدین نہیں مانے، اس پر سعید اور اس کے والدین کے درمیان کافی زیادہ باتیں ہوئیں، جن باتوں کے دوران سعید نے یہ لفظ بولے کہ اگر آپ لوگوں نے ایسا کیا یعنی حلالہ کی نیت سے ہمشیرہ کا نکاح کسی اور سے کروایا اور بعد میں طلاق لے کر عدت پوری ہونے کے بعد پہلے والے لڑکے سے نکاح کرایا تو میں اپنے گھر یعنی سعید کے والدین والی حویلی میں نہیں آؤں گا، اس نے قسم بھی کھائی اور طلاق کے لفظ بھی بولے کہ میں اس حویلی میں آیا تو مجھ پر رن طلاق۔
ادھر سعید کے والدین نے بچی کا نکاح کروایا اور طلاق لینے کے بعد عدت پوری ہونے کے بعد سعید کی ہمشیرہ کا نکاح پہلے والے لڑکے سے دوبارہ کر دیا۔
جناب اب کافی عرصہ گزرنے کے بعد سعید کے والد صاحب شدید علیل ہیں، سعید اپنے والدین کا خیال پہلے رکھتا تھا، لیکن گھر میں داخل نہیں ہوا، اب والد صاحب کی طبیعت زیادہ خراب ہے، اس قسم اور رن طلاق توڑنے کی کیا صورت ہوسکتی ہے کہ سعید اپنے والدین کی حویلی میں جا سکے اور طلاق بھی واقع نہیں ہو؟
برائے مہربانی وضاحت کردیں۔

جواب: طلاق جب کسی شرط کے ساتھ مشروط اور معلق کر دی جائے، تو شرط واپس نہیں لی جاسکتی، شرط پوری ہونے پر طلاق واقع ہو جاتی ہے، لہذا اگر ایک طلاق کو معلق کیا ہو، تو اس سے بچنے کی کوئی صورت نہیں ہے، بہر صورت ایک طلاق رجعی واقع ہوگی اور عدت کے اندر رجوع کا حق حاصل ہوگا۔
صورت مذکورہ میں سعید اگر اپنے والدین کے گھر جائے گا، تو اس کی بیوی پر ایک طلاق رجعی واقع ہوجائے گی، البتہ دوبارہ جانے سے کوئی طلاق واقع نہیں ہوگی، اور آئندہ اسے صرف دو طلاقوں کا اختیار ہوگا۔
نیز سعید نے چونکہ قسم بھی کھائی ہے، لہذا والدین کے گھر جانے سے اس پر قسم کا کفارہ بھی لازم ہوجائے گا۔
قسم کا کفارہ دس مسکینوں کو دو وقت پیٹ بھر کر کھانا کھلانا یا دس مسکینوں کو صدقہ فطر کی مقدار رقم دینا، یا ایک ہی غریب کو دس روز تک روزانہ دو وقت پیٹ بھر کر کھانا کھلانا یا صدقہ فطر کی مقدار رقم دینا، یا دس غریبوں کو پہننے کا کپڑا دینا ہے۔
اگر مذکورہ صورتوں میں سے کسی کی استطاعت نہ ہو، تو پھر تین دن مسلسل روزے رکھنے کا حکم ہے، اگر بیچ میں کسی دن روزے کا ناغہ ہوجائے، تو دوبارہ شروع سے مسلسل تین روزے رکھنے پڑیں گے۔