سوال: السلامُ علیکم، آپ سے ایک مسئلہ پوچھنا چاہتی ہوں، میرے سسرال میں کافی عرصے سے مسائل چل رہے ہیں، خاص کر میرے سسر پردے کا لحاظ نہیں کرتے، کمرے میں آجاتے ہیں، کبھی کبھی کپڑے نوٹ کرتے ہیں، کدھر سوتے ہو، ایسے سوال کرتے ہیں، میرے شوہر مجھ پہ زور دیتے ہیں کہ میرے والدین کی خدمت کرو، شادی کے شروع سالوں میں میں نے انکی کافی خدمت کی بھی ہے، اس کے باوجود مجھے ہی برا کہتے ہیں، سارے خاندان میں مجھے جھوٹا کہا گیا اور میاں بیوی کے آپس کے معاملات میں بھی مداخلت ہوتی ہے، ان سب مسائل کی وجہ سے ہم الگ ہوگئے تھے، مگر اب میرے شوہر پھر کہہ رہے ہیں کہ ان کے ساتھ رہو، مگر میرے سسر کی کچھ حرکات اس طرح کی ہیں، جس کی وجہ سے میں خود کو ان سے غیر محفوظ سمجھتی ہوں، ساس بھی انکی ہاں میں ہاں ملاتی ہیں، کہتی ہیں رہنا ہے تو ہمارے طریقے سے رہنا ہے، میرے ساس سسر کے اپنے تین ذاتی گھر ہیں اور ایک بیٹا ان کا ان کے ساتھ بھی رہتا ہے اور اب وہ دوبارہ ہمیں اپنے ساتھ رہنے پہ مجبور کررہے ہیں اور میرے شوہر بھی مجھے مجبور کررہے ہیں، جبکہ انکے رویے ابھی بھی ویسے ہی ہیں، ان سب وجوہات کی بنا پہ میں اب دوبارہ اپنے ساس سسر کے ساتھ نہیں رہنا چاہتی۔ تو کیا ایسی صورت میں بیوی پہ حق ہے کہ وہ شوہر کی بات مانے؟
اور اس بارے میں شریعت کیا کہتی ہے؟ اس بارے میں براہ مہربانی مجھے جلدی جواب عنایت کیجیے ۔جزاک للہ خیراً

جواب: اگر سوال میں ذکر کردہ صورتِ حال حقیقت پر مبنی ہے،اور عورت کو واقعی اپنے سسر سے فتنے کا خوف ہے تو شوہر کا بیوی سے اپنے والد کی خدمت کروانا درست نہیں ہے، اور عورت کا اپنے شوہر سے ایسی رہائش کا مطالبہ کرنا، جس میں کسی اور کا عمل دخل نہ ہو، جائز ہے۔