سوال: السلام علیکم، مفتی صاحب ! رہنمائی فرمائیں کہ ہمیں ماشاءاللہ کمپنی کی طرف سے گاڑی اور پیٹرول کی سہولت میسر ہے اور گاڑی دیتے ہوئے کمپنی نے کسی قسم کی کوئی پابندی نہیں لگائی، مگر ہماری کمپنی کی مسجد کے امام صاحب نے جمعہ کے بیان میں کہا کہ کمپنی کی طرف سے دی گئی گاڑی صرف کمپنی کے آنے جانے میں استعمال کرنی چاہیے، ورنہ یہ ناجائز ہے کہ آپ اس میں گھومے پھریں یا اپنے روزمرہ کے کاموں میں استعمال کریں، کمپنی کے ایڈمنسٹریشن کی طرف سے اس طرح کی کوئی پابندی نہیں ہے، برائے مہربانی رہنمائی فرمائیں کہ کیا انکی یہ بات درست ہے؟

جواب: اگر کمپنی کی انتظامیہ نے صراحت کے ساتھ آپ کو یہ اجازت دی ہے کہ آپ اپنے ذاتی سفر وغیرہ میں بھی گاڑی اور پیٹرول کو استعمال میں کر سکتے ہیں، یا آپ کے اس ذاتی استعمال کا کمپنی کی انتظامیہ کو علم ہے، لیکن اس کے باوجود وہ آپ کو منع نہیں کرتے، تو آپ کے لیے ایسا کرنا جائز ہے۔
بصورت دیگر اگر کمپنی نے اجازت نہیں دی یا اس کے علم میں نہیں ہے، تو آپ کے لیے بغیر اجازت کے گاڑی کو اپنے ذاتی سفر میں استعمال کرنا جائز نہیں ہے۔