سوال: السلام علیکم
حضرت ! بچہ کی پیدائش کے بعد دائیں کان میں اذان اور بائیں کان میں اقامت دی جانی چاہیے، اگر غلطی سے بائیں میں اذان اور دائیں میں اقامت کہہ دی، تو کیا کیا جائے؟ اذان کون سی ہونی چاہیے، فجروالی یا کوئی بھی؟

جواب: نومولود کے کان میں اذان دینے کا طریقہ یہ ہے کہ جب بچہ  پیدا ہو تو نہلانے کے بعد بچے کو اپنے ہاتھوں پر اٹھائیں  اور قبلہ رُخ ہوکر  پہلے بچے کے دائیں کان میں اذان اور پھر  بائیں کان میں اقامت کہیں ۔ حي علی الصلاة اور حي علی الفلاح کہتے ہوئے دائیں بائیں چہرہ بھی پھیریں، البتہ دورانِ اذان کانوں میں انگلیاں ڈالنے کی ضرورت نہیں۔
واضح رہے کہ نومولود کے کان میں عام اذان دی جائے گی.الصلوة خير من النوم کے الفاظ نہیں کہے جائینگے.
حضرت عبیداللہ بن ابی رافع اپنے والد سے نقل کرتے ہیں کہ: میں نے رسول اللہ صلی اللہ علیہ وسلم کو حسن بن علی کی ولادت کے وقت ان کے کان میں اذان دیتے ہوئے دیکھا جس طرح نماز میں اذان دی جاتی ہے''۔
امام ترمذی رحمہ اللہ اس حدیث کو نقل فرماکر لکھتے ہیں:یہ حدیث صحیح ہے اور اسی پر عمل کیا جاتا ہے۔
یہی روایت سنن ابی داؤد، کتاب الادب، باب المولود یؤذن فی اذنہ، (2/355) (ط: مکتبہ رحمانیہ لاہور) میں بھی موجود ہے۔
مظاہر حق شرح مشکوۃ المصابیح میں علامہ قطب الدین خان دہلوی رحمہ اللہ لکھتے ہیں:
'' اس حدیث سے معلوم ہوا کہ بچہ کی پیدائش کے بعد اس کے کان میں اذان دینا سنت ہے ۔ مسند ابویعلی موصلی میں حضرت حسین رضی اللہ تعالیٰ عنہ نے بطریق مرفوع( یعنی آنحضرت صلی اللہ علیہ وسلم کا ارشاد ) نقل کیا ہے کہ: " جس شخص کے ہاں بچہ پیدا ہو اور وہ اس کے دائیں کان میں اذان دے اور بائیں کان میں تکبیر کہے ، تو اس کو ام الصبیان سے ضرر نہیں پہنچے گا''
بائیں کان میں اذان اور دائیں کان میں اقامت دینا خلافِ سنت ہے، البتہ نفس سنت ( نومولود کے کان میں اذان دینا) ادا ہوگئی، ہاں ! اگر اعادہ کرلیا جائے، تو بہترہے۔