سوال: مفتی صاحب ! اگر بس میں جماعت کا وقت ہو جائے تو بس سے اتر کر جماعت میں شریک ہونا چاہیے یا گھر پہنچ کر نماز پڑھ سکتے ہیں؟

جواب: مردوں کے لئے نماز کو باجماعت ادا کرنا سنتِ مؤکدہ ہے، اور بلاعذر جماعت ترک کرنا گناہ ہے، احادیثِ مبارکہ میں جماعت ترک کرنے پر سخت وعید آئی ہے: رسول اللہ ﷺ نے ارشاد فرمایا:
"جس وقت کسی بستی یا جنگل میں تین افراد ہوں، اور وہ نماز کی جماعت نہ کریں، تو سمجھ لو کہ ان لوگوں پر شیطان غالب آگیا ہے، اور تم لوگ اپنے ذمہ جماعت سے نماز لازم کرلو ، کیونکہ بھیڑیا اسی بکری کو کھاتا ہے، جو کہ اپنے ریوڑ سے علیحدہ ہوگئی ہو۔ (سنن النسائی:حدیث نمبر: 847)
لہٰذا آپ کو اس بات کی کوشش کرنی چاہیے کہ آپ بس میں سوار ہونے سے پہلے یا دوران سفر بس سے اتر کر باجماعت نماز ادا کرنے کا اہتمام کریں، البتہ اگر کبھی جماعت سے نماز پڑھنے کا موقع میسر نہ ہو، اور جماعت چھوٹ جائے، تو ایسی صورت میں انفرادی طور پر گھر میں بھی نماز ادا کرنے کی شرعاً اجازت ہے، تاہم اس صورت میں بھی بہتر یہی ہے کہ تنہا نماز پڑھنے کے بجائے گھر والوں کو جمع کرکے جماعت سے نماز ادا کرنے کا اہتمام کیا جائے۔