سوال: السلام علیکم، مفتی صاحب ! پوچھنا یہ ہے کہ کہا جاتا ہے کہ کسی مسلمان کا مال اس کی دلی رضا مندی کے بغیر لینا جائز نہیں ہے، اس کی تفصیل بتا دیں۔ ہم دوست آپس میں ایک دوسرے کو کہتے ہیں کہ یار آج تو نے کپڑے اچھے پہنے ہیں، چائے پلا یا کھانا کھلا، کیا یہ جائز ہے؟
اسی طرح گھر میں ایک ہی فریج ہے، اس میں بھائی کی بھی چیزیں ہیں، ہم بغیر ان کی اجازت کے کھا جاتے ہیں کہ بھائی کی ہیں، کیا یہ جائز ہے؟
اسی طرح اگر گھر میں کچھ نہیں پکا، لیکن ہم نے امید لگا لی کہ اوپر آنٹی رہتی ہیں، وہ بھیج دیں گی، کیا یہ طمع میں آئے گا؟
دل کا سوال زبان کا سوال نہیں کرنا، اس کو بھی ذرا تفصیل سے بتا دیں۔ جزاکم اللّه

جواب: حدیث شریف میں ہے: جناب رسول اللہﷺ نے فرمایا : خبردار کسی پر ظلم و زیادتی نہ کرو، خبردار کسی آدمی کی ملکیت کی کوئی چیز اس کی دلی رضامندی کے بغیر لینا حلال اور جائز نہیں ہے۔
اسی طرح ایک اور روایت میں ہے:
حضرت ابو حمید الساعدی رضی اللہ عنہ سے روایت ہے کہ جناب رسول اللہ ﷺ نے فرمایا: کسی آدمی کے لیے اپنے بھائی کی لاٹھی بھی اس کی دلی رضامندی کے بغیراٹھانا حلال نہیں ہے۔
یہ بات آپ ﷺ نے ایک مسلمان کے لیے دوسرے مسلمان کے مال کی اللہ تعالی کی طرف سے حرمت کی سختی اورشدت کی وجہ سے ارشاد فرمائی۔
مذکورہ احادیث مبارکہ میں جناب رسول اللہ ﷺ کے ارشاد کہ طیب نفس کے بغیر کسی کا مال حلال نہ ہونے کا مطلب یہ ہے کہ کسی شخص کا مال اس وقت تک حلال نہیں, جب تک کہ وہ بغیر کسی معاشرتی، اخلاقی اور سماجی دباو کے اپنے مال کے استعمال کی اجازت نہ دے دے، لہذا جہاں یقینی طور پر معلوم ہو کہ یہاں طیب نفس نہیں پایا جا رہا، بلکہ مالک نے کسی دباو کی وجہ سے اجازت دی ہے یا اپنا مال خرچ کیا ہے، تو یقینا اس حدیث کی رو ایسے مال اور ایسی دعوت کا کھانا جائز نہیں، کیونکہ حقیقتاً اجازت وہی ہے، جس میں کسی قسم کا خارجی دباو شامل نہ ہو، بلکہ خالص اپنی رضاء اور خوشی سے یہ اجازت دی گئی ہو۔
لہذا سوال میں ذکرکردہ صورت میں اگر دوست کوئی چیز کھلانے میں ناگواری محسوس کریں، اور دلی رضامندی سے نہ کھلانا چاہیں، تو ان پر دباو ڈال کر اور انہیں مجبور کرکے کھانا جائز نہیں ہے، یہی حکم مشترکہ گھر میں رہتے ہوئے بھائیوں کی چیزیں استعمال کرنے کا ہے۔
حدیث شریف میں آتا ہے کہ جناب رسول اللہ ﷺ نے ارشاد فرمایا: یہ مال سبز و شیریں ہے ( نظر میں خوشنما اور دل کو لذت دینے والا ہے) لہٰذا جو شخص اس مال کو بے پروائی سے( بغیر ہاتھ پھیلائے اور بغیر طمع و حرص کے) حاصل کرتا ہے، تو اس میں برکت عطا فرمائی جاتی ہے، اور جو شخص اسے نفس کے طمع و حرص کے ساتھ حاصل کرتا ہے، تو اس میں برکت نہیں ہوتی اور اس کی حالت اس شخص کی مانند ہوتی ہے، جو کھانا تو کھاتا ہے، مگر اس کا پیٹ نہیں بھرتا، (گویا بے برکتی اور کثرت حرص کی وجہ سے یہ حال ہوتا ہے)
لہذا کسی کی طرف سے کوئی چیز ملنے کی صرف امید کا دل میں پیدا ہوجانا "اشرافِ نفس (طمع) میں نہیں آتا ہے، لیکن اگر انتظار اور امید کے بعد اس چیز کے نہ ملنے پر ناگواری اور تکلیف محسوس ہو، تو یہ "اشراف نفس" (طمع ) میں آتا ہے، جس سے حدیث شریف میں منع کیا گیا ہے۔